Read Ot Danum YOHANES 8 Bible Online

YOHANES 8 - Ot Danum bible

YOHANES 8

²Ang hawun ondouoh homboh ngohkos, Io hihkas hino nokuh Lohpou Tuhan, tutang aro ulun lombut nokuh Io. Yesus tuot turus nopara majar ulun aro.

³Pondehan orih, guru-guru agama tutang ulun-ulun Parisi ngomin ahkai-Oh ihcobehti bawi ijo sombang rahat hobandung. Iro nyuhu ulunbawi orih tombok ang tohu-tohun,

⁴turus nuhtui umba Yesus, ‘‘Amai Guru, ulunbawi tuh jari sombang rahat hobandung.

⁵ Ang luwang hukum Museh anai poroturan amat ihcobehti bawi somahcam rih harus tomukah umba bahtu nyiring mahtoi. Uhuntuh koloukuwohoh hion Amai?’’

⁶Iro ngisok kolou orih ahkan nyokohtung Io, mangat iro duon nandah-Oh. Tahpi Yesus nyundop nyurat umba iking-Oh ang tana.

⁷Kotihka iro turus jua-juan, Io ngahtang kuhung-Oh tutang nuhtui umba iro, ‘‘Ulun ijo eam aro dusaioh ang louk ihkam, nauh rih io ijo pahtuk mukah bahtu nokuh ulunbawi atuh.’’

⁸Uliorih Yesus huli nyundop, tutang nyurat hino ang tana.

⁹Uli ngonih Yesus nuhtui kolourih, tulak iro nohtah unuk orih, mihco honong mihco nopara tahkan ijo oko. Laiuoh Yesus botohtah bongoi ang anan, tutang ulunbawi orih ijo magun tombok ang unukoh.

¹⁰Turus Yesus ngahtang kuhung-Oh tutang nuhtui umba ulunbawi orih, ‘‘Koumoh iro paringoh 'nai? Eam anairih ijo mohukum ihko?’’

¹¹‘‘Eam, Amai,’’ hioioh mutah. ‘‘Hinutrih,’’ hion Yesus, ‘‘Ahku ka'a eam mohukum ihko. Uhuntuh ihko buli, ara nguan dusa hino.’’]

¹² Yesus bopander hino umba ulun aro rih, hioi-Oh, ‘‘Ahku tuh koloang kolunon. Ulun ijo nutut Ahku eam ahkan nyalan aang kopindong, tahpi anaitepun koloang pombolum.’’

¹³ ‘‘Uhuntuh Ihko nonga kosaksian tohou arop-Mu bongom,’’ hion ulun-ulun Parisi rih umba-Oh, ‘‘kosaksian-Mu rih eam morong.’’

¹⁴Yesus mutah, ‘‘Oluka Ahku nonga kosaksian tohou arop-Ku bongok, kosaksiak-Ku rih morong; tului Ahku ta'an tahkan umoh Ahku lombut tutang nukoh umoh Ahku tulak. Ihkan eam ta'an tahkan umoh Ahku lombut tutang nokuh umoh Ahku tulak.

¹⁵Ihkam mosara ulun umba cara kolunon; Ahku eam mosara ulun olu ihcobehti ka.

¹⁶Tahpi jahkaioh Ahku mosara ulun, mahka koputusak-Ku rih morong, tului Ahku eam bongok; Amai ijo nyuhu Ahku anai hihco Ahku.

¹⁷Ang luwang hukum Museh tonyurat koloutuh: Kosaksian ijo morong iorih kosaksian duo behti.

¹⁸Ijo nonga kosaksian tohou arop-Ku anai duo — Ahku tutang Amai ijo nyuhu Ahku.’’

¹⁹‘‘Amai-Mu rih ang umoh?’’ hion'ndo. Yesus mutah, ‘‘Ihkam eam kosono Ahku, mahika kosono Amai-Ku. Amatjahkai ihkam ngosono Ahku, musti ihkam kosono Amai-Ku ka'a.’’

²⁰Paring orih tonohawot Yesus aang ohkot Io rahat majar ang Lohpou Tuhan doni pohti unuk pononga. Tahpi eam aro ihcobehti ka ijo nawan Io, tului jaham johcok ohkot-Oh.

²¹Yesus nuhtui hino umba iro, ‘‘Ahku ahkan tulak, tutang ihkam ahkan ngurah Ahku, tahpi ihkam noin mahtoi ang luwang dusa'kam. Nokuh unuk Ahku tulak, ihkam eam dahpot lombut.’’

²²Mahka dolang pongowasa Yahudi, ‘‘Mihkoh Io nohuang munu arop-Oh, tului Io nuhtui, ‘Nokuh unuk Ahku tulak, ihkam eam dahpot lombut.’ ’’

²³Turus Yesus nuhtui umba iro, ‘‘Ihkam lombut tahkan pinda; tahpi Ahku lombut tahkan diang. Ihkam tahkan kolunon; Ahku eam tahkan kolunon.

²⁴Kotului orih Ahku nuhtui ahkan'kam, ijo ihkam ahkan mahtoi ang luwang dusa-dusa'kam. Tutang puna ihkam ahkan mahtoi a'ang dusa-dusan'kam, amat eam porocaya ijo, ‘Ahku tuh Io ijo konohawot AHKU ANAI,’ ’’

²⁵‘‘Ihko iai kotu'uioh?’’ hion'ndo. Yesus mutah, ‘‘Ahkan inon mander hino umba ihkam!

²⁶Magun aro hal tohou ihkam ijo kani Ahku nuhtuioh tutang mosaraoh. Tahpi Io ijo nguhtus Ahku dahpot tomorocaya. Tutang Ahku momborihta ahkan kolunon, inon ijo Ahku ngonih tahkan Io.’’

²⁷Iro eam solembang ijo Io rahat nuhtui umba iro tohou Amai.

²⁸Kotului orih Yesus nuhtui umba iro, ‘‘Noin amat ihkam jari mopoisung Anak Ulun, ihkam ahkan ta'an ijo, ‘Ahku rih Io ijo tonohawot AHKU ANAI,’ tutang ihkam ahkan ta'an ijo eam anai ihco ka ijo Ahku nguai tahkan arop-Ku bongok. Ahku tihkas nuhtui inon ijo tomajar Amai ahkak-Ku.

²⁹Tutang Io ijo nyuhu Ahku anai hihco Ahku. Io eam pu'u mohonouoh Ahku bongok-Ku, tului Ahku hototurus nguan inon ijo monyanangoh ahtoi-Oh.’’

³⁰Ulimba Yesus nuhtui paringoh rih, aro ulun porocaya umba Io.

³¹Pongohuli Yesus nuhtui umba ulun-ulun Yahudi ijo jari porocaya umba Io, ‘‘Amat ihkam bolum numbun ajaran-Ku ihkam tu'u-tu'u murid-Ku,

³²mahka ihkam ahkan ngosono Pohotala ijo morong, tutang bain kotului orih ihkam ahkan tomorodehka.’’

³³ ‘‘Ihkai tuh lihit Abraham,’’ hion'ndo. ‘‘Jaham pu'u ihkai monjadi jihpon iai ka! Inon maksud-Mu umba tuhtui, ‘Ihkam ahkan tomorodehka?’ ’’

³⁴‘‘Tu'u morong auh-Ku tuh,’’ hion Yesus ahkan iro. ‘‘Ulun ijo monguan dusa, anairih jihpon dusa.

³⁵Tutang ihcobehti jihpon eam anai unuk mohcon ijo tahtap ang luwang ukupjolahai, rahatoh anak turus-jahamoh anai unuk luwang ukupjolahai.

³⁶Kotului orih, amat Anak momorodeka ihkam, ihkam tu'u-tu'u morodeka.

³⁷Puna Ahku ta'an ihkam tuh lihit Abraham. Tahpi ihkam kani munu Ahku, tului ihkam eam kani norima ajaran-Ku.

³⁸Inon ijo Ahku nohto aang Amai-Ku, orihrih ijo Ahku nuhtuioh. Rahatoh ihkam nguan inon ijo tongajaroh amai'kam ahkan'kam.’’

³⁹Iro mutah, ‘‘Amai ihkai iorih Abraham.’’ ‘‘Jahkaioh ihkam puna tu'u anak Abraham,’’ hion Yesus, ‘‘puna ihkam nguan inon ijo tonguan bain Abraham.

⁴⁰Ahku nuhtui ahkan'kam kotu'u ijo Ahku ngonihoh tahkan Pohotala, tahpi ihkam kani munu Ahku. Abraham eam nguan kolou orih!

⁴¹Ihkam nguan inon ijo tonguan bain amai'kam bongom.’’ Hion'ndo, ‘‘Ihkai eam anak-anak lacun. Amai ihkai tihkas ihco, iorih Pohotala bongoi.’’

⁴²Turus Yesus nuhtui ahkan iro, ‘‘Jahkaioh Pohotala rih Amai'kam, ihkam ahkan mongasih Ahku, tului Ahku lombut tahkan Pohotala. Ahku eam lombut hapan konohuang-Ku bongok, tahpi Io jari nyuhu Ahku.

⁴³Ombai ihkam eam solembang inon ijo Ahku nuhtui? Kotului ihkam eam tahan ngonih auh ajaran-Ku.

⁴⁴Sehtanrih amai'kam, tutang ihkam kani numbun konohuang amai'kam. Tahkan topahtukoh sehtan rih pomunu. Io eam pu'u umbabarih komorong, tului eam aro komorong a'ang io. Amat io bobalik orih pahtut, tului puna kolourih sipatoh. Io bobalik tutang puna asar kokaro alik.

⁴⁵Tahpi Ahku nuhtui komorong, tutang kotului orih ihkam eam porocaya umba Ahku.

⁴⁶Iai ang louk ihkam tuh ijo dahpot mombukti tohko dusa aang Ahku? Amat Ahku nuhtui komorong, ombai ihkam eam porocaya umba Ahku?

⁴⁷Ulun ijo asar tahkan Pohotala, ngonih auh Pohotala. Tahpi ihkam eam tahkan Pohotala, kotului orih ihkam eam kani ngonih.’’

⁴⁸Ulun-ulun Yahudi rih mutah auh Yesus, ‘‘Eam rih morong auh 'kai ijo ngohawat Ihko ulun Samaria ijo sonorupang sehtan?’’

⁴⁹Yesus mutah, ‘‘Ahku eam sonorupang sehtan, Ahku nonga horomat ahkan Amai-Ku, tahpi ihkam motanah Ahku.

⁵⁰Ahku eam ngurah horomat tahkan arop-Ku bongok. Anai ihco ijo ngurah kohoromatan bagi-Ku, tutang Io ijo mosara.

⁵¹Kotu'ui morong auh-Ku tuh, ulun ijo numbun auh-Ku kototahiu io eam ahkan mahtoi.’’

⁵²Turus ulun-ulun Yahudi rih, nuhtui umba Yesus, ‘‘Huntuh ihkai ta'an Ihko tu'u-tu'u sonorupang sehtan! Abraham bongoi jari mahtoi, kodorih ka'a paring nabi-nabi. Tahpi Ihko nuhtui, ‘Ulun ijo numbun auh-Ku, kototahiuoh eam ahkan mahtoi.’

⁵³Amat Abraham bongoi jari mahtoi, tutang nabi-nabi paringoh ka'a jari mahtoi, Ihko tuh iai? Kuwohrih Ihko labih hajo umba amai 'kai Abraham!’’

⁵⁴Yesus mutah, ‘‘Jahkaioh Ahku ngurah horomat ahkan arop-Ku bongok, kohoromatan-Ku rih eam aro rimaioh. Ijo mohoromat Ahku anairih Amai-Ku, ijo ihkam ngohu Pohotalan'kam,

⁵⁵podahar ihkam eam kosono Io. Tahpi Ahku kosono Io. Jahkaioh Ahku nuhtui ijo Ahku eam ngosono Io, mahka Ahku ihcobehti bobalik, sama umba ihkam. Ahku ngosono Io, tutang bokehtep umba auh-Oh.

⁵⁶Amai'kam Abraham sanang sino ijo io ahkan nohto ondou-Ku. Io jari nohtooh tutang io sanang!’’

⁵⁷Turus ulun-ulun Yahudi mutah auh Yesus, ‘‘Umur-Mu jaham johcok limo pulu toun, tutang Ihko jari nohto Abraham?’’

⁵⁸Yesus mutah, ‘‘Kotu'ui Ahku nuhtui umba'kam: hounumba Abraham konanak, Ahku jari anai.’’

⁵⁹Turus ulun-ulun Yahudi rih ngomin bahtu kani medak Io; tahpi Yesus nyuhukoh arop, turus soluka nohtahoh Lohpou Tuhan.