Read Ot Danum YOHANES 9 Bible Online

YOHANES 9 - Ot Danum bible

YOHANES 9

¹Ohkot Yesus nyalan, Io nohto ulun bobulen tahkan io konanak.

²Murid-murid-Oh ngisok umba Yesus, ‘‘Amai Guru ombai ulun tuh tonganak bobulen? Inonrih kotului io bongoi bodusa ata'ai tului inai-amaioh bodusa?’’

³Yesus mutah, ‘‘Io bobulen eam kotului dusaioh bongoi ata'ai inai amaioh bodusa, tahpi mangat ulun tou nohto kowasan Pohotala bogawi aang aropoh.

⁴Kotahin magun hondou, ihto harus monguan gawin Io ijo jari nyuhu Ahku. Pindong ahkan lombut, tutang ihcobehti ka eam ahkan tou bogawi.

⁵ Kotahin Ahku ang kolunon tuh, Ahku rih koloang kolunon.’’

⁶Uli nuhtui kolouorih Yesus ngoluhca kotana, turus ngoluhtok luhca-Oh orih umba tana. Pongohuli Io ngasakoh ang mahtan ulun orih,

⁷turus nuhtui ahkaioh, ‘‘Tulak muhi arop'mu ang Tolaga Siloam.’’ (Siloam rimai ijo ‘Sonuhu’.) Mahka ulun bobulen orih tulak muhi bauimahtaioh. Ohkot io hoduli, io jari dahpot nohto.

⁸Dolang injah-jolahai, tutang ulun-ulun ijo soun nohto io nyodahkah, paringoh nuhtui, ‘‘Eamkah io tuh ulun ijo bahutoh tuot monyodahkah?’’

⁹Anai ijo nuhtui, ‘‘Puna io.’’ Tahpi anai hino ijo nuhtui, ‘‘Eam, io baya mirip uluiorih.’’ Tahpi ulun rih bongoi nuhtui, ‘‘Ahkurih io.’’

¹⁰‘‘Koloukuwoh nyalungoh nyiring ihko tou nohto?’’ hion iro umba io.

¹¹Io mutah, ‘‘Ulun ijo bogare Yesus rih, nguan honjiot luhtektana, turus ngasakoh ang mahtak'ku tutang nuhtui, ‘Tulak muhi baunmahtan'mu nokuh Tolaga Siloam.’ Turus ahku tulak. Tutang kotihka ahku muhi baukmahtak'ku, ahku tou nohto.’’

¹²‘‘Ang umoh ulun orih?’’ hion'ndo. Io mutah, ‘‘Eam ta'an.’’

¹³Ondou rih anai ondou Sabat, kotihka Yesus ngoluhtok tana umba luhca-Oh, mangat nguan ulun bobulen orih duon nohto. Mahka ulun ijo nanaioh bobulen rih konihtot nokuh ulun-ulun Parisi.

¹⁵Iro ka'a ngisok umba io koloukuwoh io dahpot nohto. Io mutah, ‘‘Io ngasak luhtok ang mahtak'ku, turus ahku muhioh tutang ahku tou nohto.’’

¹⁶Pira-pira tahkan ulun-ulun Parisi rih nuhtui, ‘‘Eam touharapoh ulun ijo nguan tuh asaroh tahkan Pohotala, tului Io eam mopoduli ondou Sabat.’’ Tahpi ulun bohkon nuhtui, ‘‘Umoh touharap ulun bodusa nguan katahelan-katahelan koloutuh?’’ Turus lombut kosuat ang louk iro.

¹⁷Mahka ulun-ulun Parisi rih ngisok hino umba ulun rih, ‘‘Inon numbun ihko, tohou Io ijo duon nguan ihko nohto?’’ ‘‘Io nabi,’’ hion ulun orih.

¹⁸Tahpi dolang okon Yahudi rih eam kani porocaya, ijo ulun rih puna bobulen sounumbaoh konanak tutang uhuntuh dahpot nohto. Tului orih iro na'ah ulun okooh,

¹⁹tutang ngisok, ‘‘Morongkah io tuh anak'mu, ijo hion'mu konanak bobulen? Koloukuwoh io tou nohto uhuntuh?’’

²⁰Inai-amai ulun rih mutah, ‘‘Puna io tuh anak ihkai; tutang io puna bobulen tahkan tonganak.

²¹Tahpi koloukuwoh io tou nopahjah uhuntuh, ihkai eam ta'an. Tutang iai ijo nguan io tou nohto, orih ka ihkai eam ngota'an. Ngisok iou umba io tului io jari anaikokoi; io dahpot mutah bongoi.’’

²²Inai-amai ulun orih nuhtui kodorih, kotului iro mihkoh umba dolang okon Yahudi; kotului iro rih jari pahkat, iai ulun ijo ngahku Yesus kolou Lahca Ponyolamat, eam tou hino nyolong nokuh lohpou sombayang.

²³Orih kotuluioh inai-amai ulun orih nuhtui, ‘‘Io umbot kokoi; ngisok iou umba io.’’

²⁴Turus iro na'ah hino ulun ijo nanai bobulen, tutang nuhtui ahkaioh, ‘‘Monulutrih ijo ihko ahkan nuhtui ijo morong. Ihkai kota'an ulun orih ulun bodusa.’’

²⁵‘‘Inon Io ulun bodusa ata'ai eam,’’ hion ulun orih, ‘‘ahku eam ta'an. Tahpi ihco hal ahku ta'an; buha ahku bobulen tahpi uhuntuh ahku tou nohto.’’

²⁶Turus iro nuhtui hino umba io, ‘‘Io nguan inon ahkan'mu? Koloukuwohoh Io nguan ihko nohto?’’

²⁷Ulun orih mutah, ‘‘Jari ahku nuhtui ahkan'kam tahpi ihkam eam kani ngonih. Ombai ihkam kani ngonihoh hino? Mihkohino ihkam kani monjadi murid-murid-Oh ka'a?’’

²⁸Turus iro ngonjea io, tutang nuhtui, ‘‘Ihkorih murid-Oh; ihkai tuh bohkon! Ihkai tuh murid Museh.

²⁹Ihkai ta'an ijo Pohotala jari nuhtui umba Museh. Tahpi tohou ulun orih ihkai eam ta'an tahkan umoh asar-Oh.’’

³⁰Ulun orih mutah, ‘‘Helan samasino ijo ihkam eam ta'an asar-Oh, mahka Io jari nguan mahtak'ku tou nohto.

³¹Ihto ta'an ijo Pohotala eam ngonih ulun bodusa, molekan ulun ijo mohormat Pohotala, tutang nguairih kohondak-Oh.

³²Tahkan kopahtuk kolunon eam pu'u ihto ngonih anai ulun nguan ulun ijo tonganak bobulen tou nohto.

³³Amat ulun rih eam tahkan Pohotala, Io eam ahkan dahpot nguan ino-inon.’’

³⁴Putah iro, ‘‘Inon? Ihko ijo tuwi umba dusa tahkan konanak, ihko kani majar ihkai?’’ Mahka tahkan wayah orih iro baca io nokuh lohpou sombayang.

³⁵Yesus ngonih ijo ulun aro jari baca ulun orih nyolong lohpou sombayang. Io ngurah ulun rih turus nuhtui umba io, ‘‘Inonrih ihko porocaya umba Anak Ulun?’’

³⁶Ulun orih mutah, ‘‘Iai Io, Tuan? Dohop nyorihta ahkak, mangat ahku porocaya umba Io.’’

³⁷‘‘Ihko jari nohto Io,’’ hion Yesus, ‘‘Io rih ijo uhuntuh, rahat bopander umba ihko.’’

³⁸‘‘Ahku porocaya, Tuhan,’’ hion ulun orih, turus io suhkuntu'ut ang toharep Yesus.

³⁹Yesus nuhtui, ‘‘Ahku lombut nokuh kolunon tuh mosara; mangat ulun ijo bobulen tou nohto, tutang ulun ijo tou nohto, monjadi bobulen.’’

⁴⁰Pira-pira ulun Parisi ijo anai ang anan ngonih Yesus nuhtui kodorih, turus iro ngisok umba Yesus, ‘‘Konohuang'Mu ihkai tuh bobulen ka'a?’’

⁴¹Yesus mutah, ‘‘Jahkaioh ihkam bobulen, ihkam eam bodusa. Tahpi tului ihkam nuhtui, ‘Ihkai nohto,’ orih rimai ihkam magun bodusa.’’