Read Ot Danum KESAH RASUL-RASUL 1 Bible Online

KESAH RASUL-RASUL 1 - Ot Danum bible

KESAH RASUL-RASUL 1

¹ O, Teofilus ijo piosbudibosara, Ang luwang buhku'ku ijo pahtukoh, jari ahku ngonorangan paringoh ijo konuanoh tutang auh ajaroh bain Yesus tahkan Io nopara ang gawiu-Oh,

²johcok ang ondou Io konahtang nokuh soruga. Sounumba Io nuhkat nokuh soruga umba kowasan Roh Pohotala Io nonga potunjuk-potunjuk ahkan rasul-rasul ijo konopili.

³Uliumba Io mahtoi, kotahin ohpat pulu ondou Io bojoin ngorinah arop-Oh umba cara ijo bokorinah samasino ahkan rasul-rasul rih ijo Io puna tu'u bolum. Iro nohto Io, tutang Io hopander umba iro tohou koloukuwohoh Pohotala moretah kolou Lahca.

⁴ Tutang aang ohkot Io hihco umba iro, Io nonga poretah tuh ahkan iro, ‘‘Ara tulak tahkan Yerusalem. Ngindoi ang anan nyiring Amai nonga inon ijo jari tonobowot-Oh, iorih ijo jari Ahku nyorihta ahkan'kam houn.

⁵ Tului Yohanes mopondus umba danum tahpi pira-pira ondou hino ihkam ahkan ponopondus umba Roh Pohotala.’’

⁶Kotihka rasul-rasul rih hopuhpung sama-sama Yesus, iro ngisok Io, ‘‘Tuhan, inonrih huntuh Tuhan kani nombok huli Pomoretah uhtus Israel?’’

⁷Yesus mutah auh'ndo, ‘‘Amai-Ku bongoi ijo nuhkas ondouoh tutang ohkotoh. Orih eam usah ihkam kota'ai, tului orih hak Amai.

⁸ Tahpi ihkam ahkan duon kowasa, amat Roh Pohotala jari lombut ahkan'kam. Tutang ihkam ahkan monjadi saksi-saksi ahkak-Ku ang Yerusalem ang hapus Yudea, ang Samaria tutang nyiring topahkan tana.’’

⁹ Uliius Yesus nuhtui kodorih, Io hogahtang nokuh soruga ang toharep iro paring tutang indongondou nuhtup Io tahkan topahjah'ndo.

¹⁰Pondehan iro magun nopahjah ahkan langit, angohkot Yesus hogahtang, solonga duo behti hopokajan puhti tombok ang silan iro.

¹¹‘‘O, ulun-ulun Galilea,’’ hion koduo behti rih, ‘‘ombai ihkam tombok iou ang anan nokara nokuh langit? Yesus ijo ihkam nohto hogahtang nokuh soruga rih ang toharep'kam, ahkan huli hino umba cara orih ka'a, kolou ijo ihkam nohtooh nanai.’’

¹²Pongohuli, rasul-rasul buli ko Yerusalem tahkan Korong Zaitun. Korong rih anai kira-kira ihco kilomehter kahcuioh tahkan Yerusalem.

¹³ Ang Yerusalem iro tulak nokuh lohpou unuk iro nginap, turus nuhkat nokuh tahkun ijo ang diang. Rasul-rasul rih, iorih Simon Petrus tutang Yohanes, Yakobus tutang Andreas, Pilipus tutang Tomas, Bartolomeus tutang Mateus, Yakobus anak Alpeus, Simon Patriot tutang Yudas anak Yakobus;

¹⁴paringoh toturus umba hihcoahtoioh hopuhpung ahkan bodo'a. Iro bodo'a homboh ulun-ulun bawi tahput Maria inai Yesus tutang konduang-konduang Yesus.

¹⁵Ang ihco ondou kotihka iro rahat hopuhpung — anai kowa solahtus duo pulu behti ijo dumah — Petrus tombok mangat bopander umba ulun aro. Io nuhtui,

¹⁶‘‘Konduang-konduang! Inon ijo tonyurat ang Surat Borasih, orih uras nyalung. Lomoi hopatau Lahca Dawid Roh Pohotala jari nujum tohou Yudas, okon ulun-ulun ijo nawan Tuhan Yesus rih.

¹⁷Yudas anairih anai ihcobehti tahkan ihto, tutang io jari tonopili ka'a ahkan umba bogawi hombo-homboh umba ihto.’’ (

¹⁸ Yudas tuh jari duon tana kolowongoh tahkan upah potanahoh ijo ja'at. Io ngonyahtu tutang mahtoi honong butuioh borutat nyiring usin tonoiuoh soluka paringoh.

¹⁹Paring ulun ijo mohcon ang Yerusalem, kota'an tohou hal orih. Orih kotuluioh a'ang basa iro, iro ngohawot tana rih Akeldama, ijo rimai ‘Tana Daha’.)

²⁰ ‘‘Tului ang luwang buhku Masmur anai tonyurat koloutuh, ‘Nauh unuk mohconoh monjadi tonih; ara ihcobehti ka mohcon ang loukoh.’ Anai tonyurat koloutuh ka'a, ‘Nauhoh unuk ponuotoh onin bain ulun bohkon.’

²¹ Tului orih harus anai ihcobehti ijo hihco umba ihto monjadi saksi ijo Tuhan Yesus jari bolum hoduli tahkan popahtoi. Ulun orih harusoh anai ihcobehti, tahkan louk ulun-ulun ijo hototurus sama-sama umba ihto tahkan ohkot ihto ngahasu Tuhan Yesus 'kan umo-umoh, pahtuk Yohanes nopara mopondus nyiring aang ohkot Yesus konahtang nokuh soruga tahkan tohun-tohun ihto.’’

²³Mahka ulun-ulun ijo tuot aang anai nunjuk duo behti, iorih Yusep ijo konohawot ka'a Barsabas (io konohawot Yustus ka'a) tutang Matias.

²⁴Turus iro bodo'a. Iro nuhtui, ‘‘Tuhan Ihko kota'an ahtoi paring ulun. Yudas jari bokisat tahkan ponuotoh, kolou rasul tutang jari mahtoi. Jadi ngorinah ahkan ihkai iai tahkan duo behti tuh ijo Tuhan mitih ahkan tononga gawi orih ngatioh Yudas.’’

²⁶Uliorih koduo aran rih tonenung, turus tenung ngonyahtu buah Matias. Jadi io ponotuot monjadi rasul ahkan umba hombo-homboh kosobalas rasul ijo bohkonoh rih.