Read Ot Danum KESAH RASUL-RASUL 10 Bible Online

KESAH RASUL-RASUL 10 - Ot Danum bible

KESAH RASUL-RASUL 10

¹Ang Kaisarea anai ihcobehti bahkas bogare Kornelius. Io ihcobehti kapten ‘‘Posukan Italia.’’

²Io ulun ijo mihkoh umba Pohotala tutang koparing jolahaioh sombayang ahkan Pohotala. Io aro dohop ulun-ulun Yahudi ijo porosbolum tutang io toturus bodo'a nokuh Pohotala.

³Aang ihco ondou kira-kira jam tolu hondou io nohto botatu, a'ang sino ponopahjahoh, ihcobehti molehkat Pohotala lombut tutang na'ah io, ‘‘Kornelius!’’ hioi.

⁴Kornelius nopahjah molehkat rih honong mihkoh turus nuhtui, ‘‘Anai inon Tuan?’’ Molehkat rih nuhtui, ‘‘Do'a'mu, tutang kotounbosara ahtoi'mu jari tonorima bain Pohotala tutang Pohotala ingat umba'mu.

⁵Uhuntuh nyuhurih ulun tulak nokuh Yope na'ah Simon ijo arai urasoh Simon Petrus.

⁶Io rahat mohcon ang lohpou ihcobehti ponyamak uhpakohcin bogare Simon, mohcon ang saran tasik.’’

⁷Uliius molehkat rih ijo bopander umba Kornelius rih hihkas, Kornelius na'ah duo behti pohalu ijo ang lohpouoh, tutang ihcobehti sorodadu ponjagaoh ijo borasih.

⁸Kornelius nuhtui ahkan'ndo inon jo jari nyolung, turus nyuhu iro nokuh Yope.

⁹Aanghawun ondouoh kotihka iro beteng jalan tutang kani sapai ang Yope, Petrus nuhkat nokuh isung lohpou ahkan bodo'a.

¹⁰Turus Petrus bolo'u samasino tutang jolik kuman. Pondehan ukun jaham tahtap, io duon sino topahjah.

¹¹Io nohto langit bokuap tutang aang'co kolou benang ijo lumbah tomosuluh nokuh tana, anai tali aang ohpat puhtingoh.

¹²Ang luwangoh anaisombang aro mahcom ohcin hopa'a ohpat kokaron ohcin nyoli tutang bulung-bulung ijo pomolos.

¹³Turus anai auh nuhtui umbaoh, ‘‘Petrus Kuat! Nyombolihrih tutang kumaioh!’’

¹⁴Petrus mutah, ‘‘Eam Tuhan! Jaha pu'u ahku kuman ino-inon ijo pali ata'ai kojilok.’’

¹⁵Tahpi auh orih nuhtui hino umba io, ‘‘Inon ijo jari tonuhtui borasih bain Pohotala, ara ihko ngohuoh kojilok.’’

¹⁶Topahjahoh rih dulangduli, nyiring tolu tikat, pongohino benang rih tonguhut nokuh soruga.

¹⁷Petrus torongo-rongong niruk riman tahkan topahjahoh rih. Pondehan Simon Petrus niruk ang orih, ulun-ulun ijo nyuhu bain Kornelius, sombang lohpou Simon, tutang iro jari anai ang baun bauntukang.

¹⁸Turus iro na'ah ulun ang lohpou turus ngisok ‘‘Kuwohkah ang ohtoi anai bohkonuhtus ijo nginap ijo bogare Simon Petrus?’’

¹⁹Pondehan Simon Petrus magun iou turus ngurah kosolembang riman tahkan tonopahjahoh rih. Roh Pohotala nuhtui umba io, ‘‘O Petrus, anai tolu behti rahat ngurah ihko.

²⁰Has jion nosuluh nokuh pinda tutang ara bimbang homboh iro, tului Ahku ijo nyuhu iro.’’

²¹Mahka Petrus nosuluh nokuh pinda tutang nuhtui umba ulun-ulun rih, ‘‘Ahku tuh io ijo Konduang-konduang ngurah. Konduang-konduang lombut ahkan inon?’’

²²Iro mutah, ‘‘Kapten Kornelius nyuhu ihkai nokuh ohtoi. Io ihcobehti ijo hinut tutang mihkoh umba Pohotala, tutang paham tomohoromat bain paring ulun Yahudi. Ihcobehti molehkat Tuhan nyuhu io nyawot tuan masap nokuh lohpouoh, tului kolou putah ngosan do'aoh io sonuhu ngonih, inon ijo ahkan Tuan nuhtui ahkaioh.’’

²³Mahka Simon Petrus nyuhu iro nyolong ahkan nginap ang anan. Ngohkosoh Petrus monyun tutang tulak homboh iro. Pira-pira ulun porocaya tahkan Yope ka homboh ka'a.

²⁴Ihcoondou ulimba iro johcok lowu Kaisarea. Ang anan iro jari tongindoi bain Kornelius homboh karo ari-konduang tutang injah jolahai, aringoh ijo jari ponaraoh.

²⁵Kotihka Petrus johcok, Kornelius tulak naharang io hawui nehku suhkuntu'utoh nyembah ang toharep Petrus.

²⁶Tahpi Petrus dohop io tombok huli turus nuhtui, ‘‘Tombok! Ahku bongokka kolunon ka'a.’’

²⁷Pondehan hopander umba Kornelius, Petrus turus nyolong lohpou. Ang anan io nohto aro ulun jari hopuhpung.

²⁸Turus Petrus nuhtui umba iro, ‘‘Konduang-konduang, bongon kota'an, ijo ulun Yahudi ngahana bain agamaoh ahkan masap ata'ai hihco umba ulun-ulun tahkan uhtus bohkon. Tahpi Pohotala jari pokarah ahkak'ku, ijo ahku eam tou ngohuoh iai ka'a kojilok tutang pali.

²⁹Orih kotuluioh, kotihka Tuan nyawot mangat ahku lombut, ahku eam bahat anyamoh lombut. Jari huntuh ahku, jolik kota'an ombai Tuan-tuan nyawot ahku lombut.’’

³⁰Kornelius nuhtui, ‘‘Tolu ondou ijo soun, kira-kira aang ohkot koloutuh ahku rahat bodo'a ang lohpou, aang jam tolu cohit. Songela ihcobehti bahkas tombok ang tohimo'ku pokahjan ulun orih rih ngorolinjap.

³¹Io nuhtui, ‘Kornelius! Pohotala jari norima do'a'mu tutang mingat ahkan kopiosbosara ahtoi'mu.

³²Jadi nyuhurih ulun nokuh Yope na'ah ulun ijo bogare Simon Petrus. Io rahat mohcon ang lohpou ihcobehti ponyamak uhpakohcin ijo bogare Simon, lohpouoh doni saran tasik.’

³³Orih kotului orih ahku jion, nyuhu ulun tulak na'ah tuan. Tutang Tuan tu'u-tu'u ulun hinut ahtoi kani lombut nokuh ohtoi. Huntuh ihkai paring hopuhpung ang ohtoi ang tohimo Pohotala, ahkan ngonihoh paring ijo Pohotala nyuhu Tuan nuhtuioh, ahkan ihkai.’’

³⁴ Turus Petrus hopander, ‘‘Uhuntuh ahku tu'u-tu'u borondong ijo Pohotala eam mihtihkolou paring ulun.

³⁵Ulun ijo mihkoh ahkan Pohotala, tutang nguan ijo morong ulun orihrih tonorima bain Pohotala, eam poduli io tahkan uhtus inon.

³⁶Konduang-konduang jari kota'an usin borihta ijo Pohotala johcokoh ahkan uhtus Israel. Borihta orih, anairih Kabar Hinut tohou kobuah nguha Yesus Kristus, yorih Tuhan paring ulun.

³⁷Ihkam kota'an inon ijo jari nyolung ang hopus Yudea, yorih ijo nopara tahkan Galilea uliumba popondus ijo sonuhu bain Yohanes.

³⁸Ihkam ngota'an ijo Pohotala jari mitih Yesus ulun Nasaret rih tutang nonga ahkai-Oh roh Pohotala tutang kowasa, Ihkam kota'an ka'a ijo Yesus rih, tulak nokuh umo-umoh ahkan nguan ijo hinut; Io ngopiosoh paring ulun ijo tongowasa sehtan, tului Pohotala jari homboh Io.

³⁹Ihkai tuh ulun-ulun ijo jari nohto bongon aang'co, ijo Io nguaioh ang lowun ulun Yahudi tutang ang Yerusalem. Oluka kodorih iro mahpakoh tutang munu Io.

⁴⁰Tahpi aang ondou ijo tolu Pohotala ngomonyunoh Io hino tahkan popahtoi, tutang ngorinah Io ahkan ulun;

⁴¹eam ahkan paring ulun, molekan tihkas ahkan ihkai ijo jari tongopili bain Pohotala, labih soun, ahkan monjadi saksi-saksi-Oh: ihkai kuman hawui ngorih umba Io, uliius Io monyun tahkan popahtoi.

⁴²Tutang Io nyuhu ihkai mborihta Kabar Hinut rih ahkan ulun-ulun tutang nonga kosaksian, ijo Io rih jari konahtang bain Pohotala, monjadi hakim ulun-ulun ijo magun bolum, tutang ulun-ulun ijo jari mahtoi.

⁴³Paring nabi-nabi momander tohou Io. Iro nuhtui ijo paring ulun ijo porocaya umba Yesus, ahkan duonapun dusaoh honong kowasa tahkan Yesus.’’

⁴⁴Pondehan Petrus magun nuhtui Roh Pohotala nosuluh tutang ngowasa paring ulun ijo ngonih kabar orih.

⁴⁵Ulun-ulun Yahudi ijo porocaya umba Yesus, tutang iro ijo jari homboh Petrus masap Kornelius rih tahkan Yope paringoh helan, nohto Pohotala nongaoh ka'a Roh-Oh ahkan ulun-ulun uhtus bohkon ijo eam Yahudi.

⁴⁶Tului iro ngonih ulun-ulun rih hopander a'ang aro-mahcam auh tutang monara-nara kohajon Pohotala. Turus Petrus nuhtui,

⁴⁷‘‘Cuba nohtooh, ulun-ulun tuh jari norima Roh Pohotala kolou ihto. Jari dahpotrih ulun ngapeng-ngapeng iro ahkan tonopondus umba danum?’’

⁴⁸Mahka Petrus nyuhu iro ponopondus umba danum ngosan aran Yesus Kristus. Uliorih rih iro nyawot umba Petrus mohcon hihco iro pira-pira ondouhino kotahiuoh.