Read Ot Danum KESAH RASUL-RASUL 11 Bible Online

KESAH RASUL-RASUL 11 - Ot Danum bible

KESAH RASUL-RASUL 11

¹Rasul-rasul tutang ulun-ulun ijo porocaya ahkan Yesus ang sohopus Yudea ngonih ijo ulun-ulun, ijo eam boagama Yahudi ka jari norima auh Pohotala.

²Pongohuli Petrus tulak nokuh Yerusalem ulun-ulun Yahudi ka ijo jari porocaya ahkan Yesus rih mosalan Petrus.

³Iro nuhtui ahkan Petrus, ‘‘Ombai ihko tulak nokuh lohpou ulun-ulun ijo eam tonyunat? Nyiring ihko kuman ka'a homboh umba iro!’’

⁴Bain tului rih Petrus nonga monyorihtaoh ahkan'ndo paringoh ijo jari nyolung nopara tahkan pahtukoh Petrus nuhtui,

⁵‘‘Ahku rahat bodo'a ang lowu Yope turus ahku nohto ihco pongorinah. Ahku nopahjah anai angihco kolou ihcokolambar benang bolambah, ponosuluhrih tahkan langit, tonokuak aang ohpat putingoh, pongohuli tondo ang silan ahku.

⁶Ohkot ahku nokilik nokuh luwangoh ahku nohto ohcin-ohcin hopa'a ohpat, ohcin-ohcin molos, ohcin-ohcin ijo nyoli, ohcin-ohcin naang ijo molos.

⁷Turus ahku ngonih ihco auh nuhtui ahkak'ku, ‘Has kuat Petrus! Nyombolih orih tutang, kumai!’

⁸Tahpi ahku mutah, ‘Eam, Tuhan! Jaha pu'u ahku kuman ukun ijo kojilok tutang pali.’

⁹Tahpi auh orih nuhtui hino tahkan langit, ‘Ramu ijo jari tongorinah borasih bain Pohotala ararih ihko ngohawotoh kojilok.’

¹⁰Ahku nohto hal rih nyiring tolu tikat tutang kojoriaioh paringoh hogahtang hoduli nokuh soruga.

¹¹Tohorong aang ohkot orih ka'a, kototolu behti tahkan Kaisarea ijo sonuhu nokuh ahku, ang lohpou unuk ahku mohcon.

¹²Turus Roh Pohotala nyuhu ahku tulak homboh iro hawui eam bimbang. Koonom behti Konduang tuh ka'a, umba homboh ahku nokuh Kaisarea, tutang ihkai paringoh nyolong nokuh luwang lohpou Kornelius.

¹³Pongohino Kornelius nyorihta ahkan ihkai, koloukuwoh io nohto ihcobehti molehkat tombok ang lohpouoh tutang nuhtui, ‘Nyuhu ulun nokuh Yope na'ah ihcobehti bahkas bogare Simon Petrus.

¹⁴Io ahkan monyorihta ahkan'kam borihta ijo ahkan monyolamat ihko tutang injah-jolahan'mu.’

¹⁵Tutang aang ohkot ahku nopara nuhtui kodorih,’’ kolouorih Petrus noturusoh sorihtaoh, ‘‘Roh Pohotala lombut ka'a ngosan iro, sama kolou ijo nyolung aang ihto lomoi aang pahtukoh.

¹⁶ Turus ahku ingat Tuhan nuhtui, ‘Yohanes mopondus umba danum, tahpi ihkam ahkan ponopondus umba Roh Pohotala.’

¹⁷Jari botarang Pohotala nongaoh ka'a ahkan ulun-ulun ijo eam nambit agama Yahudi rih, pononga ijo sama, ijo Io nongaoh ahkan ihto aang ohkot ihto porocaya umba Tuhan Yesus Kristus. Tului orih kuwoh tou ahku ngohana Pohotala!’’

¹⁸Ulirih ngonih auh orih iro eam nosalan io hino. Turus iro monara Pohotala. Iro nuhtui, ‘‘Amat kolouorih ulun-ulun bohkon Yahudi ka tononga kosapet bain Pohotala ahkan hubah tahkan dusa-dusan iro tutang ngenang pombolum ijo sojahti!’’

¹⁹ Uliius Stepanus tomunu, ulun-ulun ijo porocaya umba Yesus nopara tohoduru-duru, nyiring iro rawu-riai nokuh umo-umoh. Anai ijo nokoru dahpot nokuh Penisia, tutang anai hino ijo johcok Siprus tutang Antiokhia. Iro mborihta kabar tahkan Pohotala tihkas ahkan ulun-ulun Yahudi iu.

²⁰Tahpi tahkan louk ulun-ulun porocaya rih, ijo asar tahkan Siprus tutang Kirene, anai ka'a ulun-ulun ijo tulak nokuh Antiokhia tutang mborihta Kabar Hinut tohou Yesus rih, ahkan ulun-ulun ijo eam nambit agama Yahudi ka'a.

²¹Kowasa Tuhan anai ang iro, nyiring aro ulun monjadi porocaya tutang nyarahoh arop ahkan Tuhan.

²²Sorihta-sorihta tohou ang'conyolung-ang'conyolung tuh johcok ka'a ahkan ukup ang Yerusalem. Mahka iro nyuhu Barnabas nokuh Antiokhia.

²³Tutang kotihka Barnabas johcok ang anan, tutang nohto koloukuwoh Pohotala mborehkat ulun-ulun rih, io jorih samasino. Turus io nyawot mangat iro tu'u-tu'u bokehtep umba Tuhan hawui kotuwi ahtoioh.

²⁴Barnabas tuh ulun ijo hinut ahtoioh tutang konowasa bain Roh Pohotala hawui paham porocaya umba Tuhan, nyiring aro ulun nutut Tuhan.

²⁵Pongohino Barnabas tulak nokuh Tarsus ngurah Saulus.

²⁶Uliius io nyombang umba Saulus, io ngomin Saulus nokuh Antiokhia, tutang ihco toun tuwi, iro hopuhpung umba ukup aang anan sambil majar aro ulun. Ang Antiokhia orihrih ulun-ulun ijo porocaya umba Yesus aang pahtuk tikat konohawot Ulun-ulun Kristen.

²⁷Aang uhun orih anai pira-pira nabi lombut tahkan Yerusalem nokuh Antiokhia.

²⁸ Ang loukoh anai ihcobehti bogare Agabus. Tului hojojuan Roh Pohotala io nuhjum, ijo ang hopus kolunon ahkan nyolung wayah bolo'u ijo paham. (Tutang hal rih tu'u nyolung ka'a, aang ohkot Kaisar Klaudius moretah.)

²⁹Mahka paring murid Yesus rih pahkat ahkan ngirim pononga ahkan konduang-konduang ijo mohcon ang Yudea; nyinong-behti nonga numbun koduonoh.

³⁰Kopahkat rih iro molalusoh ka'a, turus Barnabas tutang Saulus sonyuhu ahkan ngihtot pononga rih ahkan okon-okon ukup.