Read Ot Danum KESAH RASUL-RASUL 12 Bible Online

KESAH RASUL-RASUL 12 - Ot Danum bible

KESAH RASUL-RASUL 12

¹Aang wayah orih ka'a Lahca Horodes nopara mohenyek anak-anak ukup.

²Ngosan poretahoh Yakobus, konduang Yohanes tomunu umba padang.

³Kotihka Horodes nohto ijo ang-konuai rih ngojorih ahtoi ulun-ulun Yahudi, io nguai hino ijo kolou orih; io nyuhu ulun nawan Petrus ka'a. Hal rih nyolung ang ohkot Ondou Hajo Luhte Eam Boragi.

⁴ Uli tonawan, Petrus ponosolong'ndo nokuh luwang sipir. Ohpat kokawan sorodadu sonuhuoh ahkan monjaga Petrus ang anan — nyino-nyinong kokawan anai ohpat behti sorodadu. Uli ondou Pesta Paska hopus, punan Horodes mosara Petrus ang tohimo ulun aro.

⁵Jadi Petrus tonahan ang sipir; tahpi anak ukup toturus iou bodo'a umba kotu'un ahtoi'ndo ahkan Tuhan nihtu Petrus.

⁶Aang ngolomi houn umba Horodes ahkan mosara Petrus aang tohimo ulun aro, Petrus tiruh tomanga umba duo koliting ratai ang holang duo sorodadu ponjaga. Ang bauntukang sipir ponjaga-ponjaga bohkon ka'a sama monjaga sipir.

⁷Solenga molehkat Tuhan tombok ang anan tutang ihco koloang ngorolondang luwang kamar sipir. Molehkat rih nigung-nigung Petrus nyiring io monyun. Turus molehkat rih nuhtui, ‘‘Olai jeleng monyun!’’ Uhun rih ka'a ngonyahtu ratai bosi tahkan longon Petrus.

⁸Uliorih molehkat rih nuhtui, ‘‘Kehpan hahtim tutang mohtong tali sorupah'mu.’’ Mahka Petrus kehpan hahtiuoh tutang mohtong tali sorupahoh. Pongohuli molehkat rih nuhtui hino, ‘‘Kehpan jubah'mu tutang nututrih ahku.’’

⁹Mahka Petrus nututoh molehkat rih soluka tahkan sipir. Tahpi Petrus eam borondong, ijo inon ijo rahat konuan bain molehkat rih, anairih, angihco ijo tu'u-tu'u nyolung. Petrus ngohu orih ponopahjahoh budas.

¹⁰Aang ohkot iro jari nyihing unuk pojagaan ijo pahtukoh tutang ijo koduo, iro johcok bauntukang sonaman ijo nihtu lowu. Bauntukang rih bokuap honong bongoi, turus iro soluka tutang nyalan nyuru ijo jalan koik. Solenga molehkat rih nohtah Petrus.

¹¹Uliorih punan Petrus borondong, ahkan inon ijo jari nyolung aang io; turus io nuhtui, ‘‘Huntuh ahku kota'an ijo Tuhan tu'u-tu'u jari ngirim molehkatoh ahkan moliwus ahku tahkan kowasa Horodes tutang tahkan dolang aangihco ijo ahkan konuan bain uhtus Yahudi umba ahku.’’

¹²Uliorih io borondong umba koada'ai rih, Petrus turus tulak nokuh lohpou Maria inai Yohanes ijo konohawot ka'a Markus. Aang anan aro ulun hopuhpung tutang rahat bodo'a.

¹³Petrus ngahtok bauntukang konaha, turus ihcobehti jihpon bawi bogare Rode nokuh kani nguap bauntukang.

¹⁴Turus io kosono auh Petrus. Kotului kojorihoh, io jele-jeleng nyolong huli eam sahpet nguap bauntukang turus mborihta ahkan ulun-ulun ang anan, ijo Petrus anai ang kanaha.

¹⁵‘‘Ihko gila!’’ hion iro. Tahpi Rode jua-juan ka, ijo orih puna tu'u Petrus. Mahka hion'ndo, ‘‘Orih molehkatoh!’’

¹⁶Pondehan orih, Petrus toturus ngahtok bauntukang. Mahka kotihka iro nguap bauntukang, tutang nohto Petrus, iro helan samasino.

¹⁷Petrus nonga tanda umba longoi, mangat iro benyem, pongohuli io monyorihta, koloukuwohoh Tuhan jari ngomin io soluka tahkan sipir. Turus io nuhtui, ‘‘Nyorihta ohrih tuh ahkan Yakobus tutang Konduang-konduang bohkon ka'a.’’ Uliorih Petrus nohtah unuk rih tutang tulak ahkan unuk bohkon.

¹⁸Ngokos hawunoh, nyolungrih koboho ang louk sorodadu ponjaga rih. Iro torongong samasino tohou inon ijo jari nyolung umba Petrus.

¹⁹Turus Horodes nyuhu ulun ngurah Petrus, tahpi iro eam tou nyombang io. Jadi Horodes moretah mangat sorodadu ponjaga rih tongisok turus munu iro. Uliorih Horodes tulak tahkan Yudea tutang mohcon pira-pira ondou ang Kaisarea.

²⁰Horodes sangit samasino umba ulun-ulun Tirus tutang Sidon. Bain tului orih iro hombo-homboh lombut noharep io. Pahtukoh iro ngoto'u Blastus ijo ngopala istana Horodes nyiring io hobarih umba iro. Pongohino iro noharep Horodes turus nyawot hokobuah, tului lowun iro duon ukun tahkan lowun Horodes.

²¹Ang ihco ondou ijo jari iro tonuhkasoh, Horodes hapa pokahjan hajo lahca, turus tuot ang koruci kolahca'an. Tutang nopara podahtu ang toharep ulun-ulun aro.

²²Ulun aro ijo ngonih auh orih iro bosurak, ‘‘Jihtuh auh dewa bohkon auh ulun!’’

²³Aang ohkot rih ka'a molehkat Tuhan napar Horodes, tului io eam nonga horomat ahkan Pohotala. Horodes konukun hondalai turus mahtoi.

²⁴Mahka auh Pohotala sasar konahan ang umoh-umoh tutang mahi ba'as.

²⁵Uli Barnabas doro Saulus ngumbot gawin'ndo iro buli tahkan Yerusalem tutang ngomin Yohanes Markus hombo-homboh iro.