Read Ot Danum KESAH RASUL-RASUL 13 Bible Online

KESAH RASUL-RASUL 13 - Ot Danum bible

KESAH RASUL-RASUL 13

¹Ang luwang ukup ang Antiokhia anai nabi-nabi tutang guru-guru iorih Barnabas, Simeon ijo konohawot Anak Mitom, Lukius tahkan Kirene, Menahem ijo tomohajo homboh Lahca Horodes tutang Saulus.

²Kotihka iro rahat sombayang ahkan Tuhan tutang puasa, Roh Pohotala nuhtui umba iro, ‘‘Ngopili Barnabas doro Saulus, mbarih ahkak-Ku, mangat iro nguan gawi ijo jari Ahku nuhkasoh ahkan iro.’’

³Uli bopuasa tutang bodo'a iro ngahtang longoi ang ngosan Barnabas doro Saulus turus nyoruhan doro.

⁴Tului tonyoruhan bain Roh Pohotala, Barnabas tutang Saulus botulak nokuh Seleukia. Tahkan anan iro bolayar nokuh pulou Siprus.

⁵Kotihka johcok ang Salamis, iro mborihta auh Pohotala ang lohpou-lohpou sombayang ulun Yahudi. Yohanes Markus dohop iro a'ang ponomuoi'ndo.

⁶Sohopus pulou rih, iro ngumbangoh johcok nokuh Pafos. Ang anan iro hosombang umba ihcobehti ulun Yahudi, bogare Bar Yesus. Io tuhkang sihir ijo mongahku aropoh nabi.

⁷Sergius Paulus, gubernur pulou orih, anai jolahan doni umba tuhkang sihir rih. Gubernur rih ulun solembang tutang piosbosara. Io na'ah Barnabas tutang Saulus, tului io jolik ngonih auh Pohotala.

⁸Tahpi Barnabas tutang Saulus konolapong bain Elimas okon sihir rih, tului Elimas (orihrih araioh ang tuhtui Yunani) ngurah-jalan ahkan gubernur ara nyiring porocaya umba Yesus.

⁹Tahpi Saulus — ijo konohawot ka'a Paulus — konowasa bain Roh Pohotala, nyiring io nopahjah okon sihir rih,

¹⁰turus nuhtui, ‘‘O pobula tamam, anak jahanam! Ihko musuh kokaron ijo morong. Ombai ihko eam kani tondo morusak rancana Pohotala ahkan nyolamat ulun?

¹¹Huntuh topahjah, Tuhan kani mohukum 'ko! Ihko ahkan monjadi bobulen, nyiring ihko eam duon nohto koloang mahtan ondou hino honjiot ohkot.’’ Ohkot orih ka'a Elimas komo anai la'a ijo mihtom nuhtup mahtaoh, nyiring io nyalan kajang kahkap ngurah ulun ahkan niting io.

¹²Kotihka gubernur rih nohto inon ijo jari nyolung rih io porocaya umba Yesus; tului io kagum samasino ahkan ajaran tohou Tuhan.

¹³Tahkan Pafos, Paulus tutang injah-injahoh bolayar nokuh Perga ang Pamfilia. Ang anan Yohanes Markus nohtahoh iro, turus buli nokuh Yerusalem.

¹⁴Tahkan Perga iro noturus ponyalan nokuh Antiokhia ang Pisidia, pongohuli ang ondou Sabat iro tulak tuot luwang lohpou sombayang.

¹⁵Uliorih Buhku Museh tutang buhku nabi-nabi tonombasa, okon-okon lohpou sombayang rih nyuhu ulun ngisok umba Paulus tutang injah-injahoh, ‘‘Konduang-konduang, amat konduang anai angihco nasehat ahkan ulun-ulun tuh, olairih ihkam nyapai nasehat rih.’’

¹⁶Paulus ka tombok, turus nonga tanda umba longoioh, pongohuli nuhtui, ‘‘Konduang-konduang'ku uhtus Israel tutang paring konduang-konduang ijo bohkonoh ang ohtoi ijo te'et umba Pohotala! Cuba ngonih auh'ku:

¹⁷ Pohotala uhtus Israel jari ngopili tahtu ajuh ihto, tutang monjadi uhtus tuh, uhtus ijo hajo, ohkot iro mohcon aang Misir kolou ulun bohkonuhtus. Pongohino tului kowasa ijo hajo, Pohotala ngomin iro soluka tahkan Misir.

¹⁸ Pohotala sabar toharep hadat-dasar'ndo ang padang balambah ohpat pulu toun kotahiuoh.

¹⁹ Pihtu uhtus, Io polumusoh tahkan tana Kanaan, mangat mbagi-bagioh tana rih ahkan uhtus Israel, mangat tana rih monjadi ain iro.

²⁰ Paringoh rih nyolung ohpat rahtus limo pulu toun kotahiuoh. Ulimba mbagi tana Kanaan rih, Pohotala nongaoh ahkan iro hakim-hakim. Hakim pokolaiuoh iorih Nabi Samuel.

²¹ Pongohino uhtus Israel nyawot ihcobehti lahca. Pohotala nonga ahkan iro Saul anak Kis tahkan lihit uhtus Benyamin, mangat monjadi lahcan iro kotahin ohpat pulu toun.

²² Uliorih Pohotala mindah io tahkan ponuotoh, Pohotala potuot Dawid monjadi lahcan iro. Tutang tuhrih ijo tonuhtui Pohotala tohou Dawid, ‘Ahku jari sombangoh Dawid anak Isai rih, ihcobehti ijo ngojorih ahtoi-Ku. Iorih ulun ijo ahkan nguanaang konohuang-Ku.’

²³Tahkan uhtus Dawid orih Pohotala nahtap ahkan uhtus Israel ihcobehti Lahca Ponyolamat, kolou ijo jari tonobowot-Oh. Tutang Yesus rih Lahca Ponyolamat orih.

²⁴ Sounumba Yesus nopara molalus gawiu-Oh, Yohanes jari nyiar ahkan ulun-ulun Israel, mangat iro hubah tahkan dusan iro tutang ponopondus.

²⁵ Tutang doni lain gawiuoh, Yohanes nuhtui umba ulun-ulun, ‘Iairih ahku tuh numbun tiruk'kam? Ahku eam Ulun ijo konindo-nindoi bain ihkam. Ingat, Ulun orih ahkan lombut uliumba ahku; ahkan nguwat talin soruhpah-Oh ka'a ahku eam pahtut.’

²⁶Konduang-konduang lihit Abraham, tutang paring Konduang-konduang ijo ulun bokonoh, ang ohtoi ijo te'et umba Pohotala! Pohotala jari ngirim ahkan ihto kabar solamat rih;

²⁷tului ulun-ulun ijo mohcon ang Yerusalem, tutang okon-okon iro eam ngota'an ijo Io rih Ponyolamat. Iro eam solembang ajar nabi-nabi, ijo toturus tonombasaoh nyinong ondou Sabat, nyiring iro mohukum Yesus. Tahpi oluka umba nguanoh ijo kodorih, iro kotuluirih inon ijo tonujum bain nabi-nabi jari nyolung.

²⁸ Oluka iro eam tou nyombangoh aang'co ka, aang Io ijo pahtut tonohukum umba hukum mahtoi, mahi iro nyawot umba Pilatus mangat Io tomunu.

²⁹ Tutang uli iro ohpah nguan paringoh, ijo jari tonyurat ang Surat Borasih tohou Io, iro posuluhoh otuioh tahkan kahju sopolahki turus pokaling otui-Oh aang luwang tanom.

³⁰Tahpi Pohotala jari ngomonyun Io hoduli tahkan popahtoi.

³¹ Pongohino nyinong-ondou kotahiuoh Io lombut tutang ngorinah arop-Oh ahkan ulun-ulun ijo jari lombut umba Io tahkan Galilea nokuh Yerusalem. Iro orihrih ijo huntuh monjadi saksi-saksi bagi Io ahkan uhtus Israel.

³²Jari huntuh ihkai tuh ngihtotoh Kabar Hinut rih ahkan ihkam: Inon ijo Pohotala jari nobowotoh ahkan tahtu ajuh ihto,

³³ orih jari Io nguaioh aang ihto honong ngombolumoh Yesus hoduli tahkan popahtoi. Tului ang luwang Surat Masmur ijo koduo anai tonyurat koloutuh: ‘Ihko tuh Anak-Ku, ang ondou tuh Ahku jari monjadi Amai-Mu.’

³⁴ Pohotala jari mombolum Io hoduli tahkan popahtoi. Huntuh Io eam ahkan hino nginyam popahtoi ang luwang tanom. Tohou hal orih Pohotala nuhtui, ‘Ahku ahkan nonga ahkan-Mu bowot borasih ijo musti nyolung ijo jari Ahku nobowotoh umba Dawid.’

³⁵ Kodorih ka'a ang ayat ijo bokon tonuhtui, ‘Ihko eam ahkan mohonauoh Jihpon-Mu ijo te'et rih maram ang luwang tanom.’

³⁶Dawid jari mahtoi tutang tongolowong ka'a sama-sama umba tahtu ajuhoh, ulimba io nguan inon ijo Pohotala nyuhu io nguai. Otun Dawid ka ius opah lonyuh paringoh.

³⁷Tahpi Yesus, ijo Pohotala ngombolum hoduli tahkan popahtoi, Yesus rih eam opah lonyuh.

³⁸Tului orih Konduang-konduang harusrih ihkam kota'an, ijo nguha Yesus tuh borihta tohou pongapun dusa tonyiarrih ahkan'kam; ihkam harus kota'an, ijo nyinong ulun ijo porocaya umba Io bokuwat tahkan kokaro dusa ijo eam duon ngudapoh nguha poretah-poretah Pohotala ijo nyorihta bain Museh.

³⁹

⁴⁰Orih kotuluioh ihkam harus nohtoanioh pios-pios, ara nyiring nyolung aang ihkam, inon ijo bola nabi nuhtui auh tuh,

⁴¹ ‘Nohtoani pio-piosoh ihkam ulun-ulun ijo jolik ngonja'at injahoh! Ihkam ahkan gagum, turus mahtoi! Tului ang jaman tuh Ahku rahat nguan ang'co ijo ihkam bongom eam ahkan porocayaoh, oluka anai ulun mborihtaoh ahkan'kam.’ ’’

⁴²Kotihka Paulus doro Barnabas nohtah lohpou sombayang rih, ulun-ulun ang lohpou sombayang rih nyawot iro hoduli hino ang ondou Sabat pongooh, ahkan monarang sambung tohou hal-hal orih.

⁴³Uli ulun-ulun soluka tahkan lohpou sombayang rih, Paulus doro Barnabas konohasu bain aro ulun Yahudi tutang ulun uhtus bohkon ijo jari nyolong agama Yahudi. Mahka rasul-rasul rih ningak iro, mangat iro turus nyikuh ang pononganasi Pohotala.

⁴⁴Aang ondou Sabat pongooh, nyiring paring ulun ang lowu rih lombut ngonih auh Tuhan.

⁴⁵Kotihka ulun-ulun Yahudi nohto ulun aro rih, iro hiri ahtoi samasino. Iro ngorana Paulus tutang molawan paring ang tonuhtuioh.

⁴⁶Tahpi hawui labih bohanyi Paulus doro Barnabas pander torus-tarang. Iro nuhtui, ‘‘Auh Pohotala puna harus tonyapai ahkan ihkam houn. Tahpi tului ihkam eam kani norimaoh, ihkam jari nuhkasoh bongom, ijo ihkam eam pahtut norima pombolum sojahti tutang kototahiu. Tutang huntuh ihkai nohtah ihkam, tutang tulak nokuh uhtus bohkon.

⁴⁷ Tului tuhrih poretah Tuhan ahkan ihkai. Tuhan nuhtui, ‘Ahku jari ngahtuh ihkam monjadi ihco koloang ahkan ulun-ulun uhtus bohkon ijo eam Yahudi, mangat ihkam mopolombut solamat ahkan paring kolunon.’ ’’

⁴⁸Ang ohkot ulun-ulun uhtus bohkon ijo eam Yahudi ngonih orih, iro jorih ahtoi samasino, turus monara-nara auh Tuhan. Tutang ulun-ulun ijo jari konahtuh bain Pohotala ahkan norima pombolum sojahti tutang kototahiu, ulun-ulun rih porocaya.

⁴⁹Tuhtui Tuhan jari ka tosiar nokuh umo-umoh ang hopus tana rih.

⁵⁰Tahpi okon-okon lowu rih, tutang ulun-ulun bawi tahkan barih ulun-ulun isung ijo mihkoh umba Pohotala, tongihit bain ulun-ulun Yahudi. Iro polombut komusuh toharep Paulus tutang Barnabas, tutang muhko doro tahkan tana rih.

⁵¹ Mahka rasul-rasul rih nokah awun tapa iro ang toharep ulun-ulun rih ahkan pongingat, turus tulak nokuh lowu Ikonium.

⁵²Murid-murid ang Antiokhia karas jorih tutang konowasa Roh Pohotala.