Read Ot Danum KESAH RASUL-RASUL 14 Bible Online

KESAH RASUL-RASUL 14 - Ot Danum bible

KESAH RASUL-RASUL 14

¹Paulus tutang Barnabas nginyam hal ijo sama ang Ikonium. Iro tulak nyolong lohpou sombayang ulun Yahudi tutang pander ang anan, kolouorih kolou nyiring aro ulun Yahudi tutang ulun bohkon Yahudi monjadi porocaya umba Yesus.

²Tahpi ulun-ulun Yahudi ijo eam kani porocaya ngihit ulun-ulun ijo eam ulun Yahudi, nyiring nguan iro ngohiri ulun-ulun ijo porocaya umba Yesus rih.

³Tului orih Paulus tutang Barnabas mohcon tahi ang anan. Tutang honong kohanyi iro nuhtui tohou Tuhan Yesus. Mahka Tuhan ka ngorinahoh ijo kabar bain iro tohou kasih-Oh rih morong; Io nonga ahkan iro kowasa ahkan nguan tandahelan-tandahelan tutang hal-hal luar biasa.

⁴Tahpi ulun-ulun lowu rih hokolawan ihco umba ijo bohkon; anai ijo kobarih umba ulun-ulun Yahudi, tutang anai ijo kobarih umba rasul-rasul rih.

⁵Turus ulun-ulun Yahudi umba okon-okonoh hombo-homboh umba ulun-ulun bohkon Yahudi hopahkat ahkan ngoporos tutang muhkah rasul-rasul rih umba bahtu.

⁶Tahpi rasul-rasul rih borondong umba koada'an orih turus mokila nokuh Listra tutang Derbe, iorih lowu-lowu ang Likaonia tutang nokuh tana hokodilingoh.

⁷Ang anai iro mborihta hino Kabar Hinut rih.

⁸Ang Listra anai ihcobehti bahkas ijo pa'aioh bolomu tahkan pahtokoh konanak, nyiring io eam pu'u duon nyalan, tului pa'aioh paham bolomu.

⁹Ulun rih tuot ang anan ngonih Paulus nuhtui. Paulus nohto ijo ulun rih porocaya, tutang kotului orih io duon konopios. Mahka Paulus nopahjah io

¹⁰tutang hawui auh ijo muhing Paulus nuhtui, ‘‘Tombok morong!’’ Ulun rih nokoru tombok turus nyalan.

¹¹Kotihka ulun aro nohto inon ijo ius konuan bain Paulus, iro ngoriak a'ang basa Likaonia, ‘‘Dewa-dewa ius mosuluh nokuh kolunon kolou behtin ulun.’’

¹²Turus Barnabas iro monggareoh Zeus, tutang Paulus iro monggareoh Hermes, tului Paulus ijo pander.

¹³Imam dewa Zeus, ijo kuiloh (karamat) anai ang bauntukang lowu lombut ngomin sahpi-sahpi dalung tutang dolak-dolak, nokuh bauntukang lowu. Io kani homboh ulun aro rih nonga pononga ahkan rasul-rasul rih.

¹⁴Kotihka Barnabas doro Paulus ngonih, inon ijo kani tononguan bain ulun-ulun rih, iro nisah-nisim hahtin'ndo, iro tombok tohun ulun aro rih turus ngoriak,

¹⁵ ‘‘Oi, ombai ihkam nguanang tuh? Ihkai tuh ulun ka'a, kolou Konduang! Ihkai anai ang ohtoi ahkan mborihta Kabar Hinut ahkan'kam, mangat ihkam nohtah hal-hal ijo eam boguna tuh, tutang ngulos nokuh Pohotala ijo bolum ijo jari naoi langit tutang tana tutang tasik tutang paring ijo anai ang luwangoh.

¹⁶Aang wayah ijo nokalou Pohotala mohonou uhtus-uhtus ulun, ijo bolum numbun konohuang iro bongon-bongon.

¹⁷Tahpi Io eam nolingou nonga tanda-tanda tohou arop-Oh iorih umba nguan ijo Hinut. Io nonga ahkan'kam uhjan tahkan langit tutang nonga bua tana ang wayahoh. Io nonga ukun ahkan'kam tutang ngojorih ahtoi'kam.’’

¹⁸Tahpi honong auh-auh orih ka magun bohali ka'a rasul-rasul rih, baca ulun-ulun rih, nyarahoh pononga ahkan doro.

¹⁹Pira-pira ulun Yahudi ijo lombut nokuh Listra tahkan Antiokhia ang Pisidia tutang tahkan Ikonium mopongaruh ulun aro rih, nyiring ulun aro rih hobarih umba iro. Iro muhkah Paulus hapan bahtu pongohuli nguhut io nokuh luar lowu. Iro ngohuoh io jari mahtoi,

²⁰tahpi kotihka ulun-ulun ijo porocaya ang anan tombok ngodilingoh, io kuat tutang nyolong nokuh lowu. Ngokosoh iro tulak nokuh Derbe homboh umba Barnabas.

²¹Ang Derbe, Paulus doro Barnabas mborihta Kabar Hinut rih tutang aro ulun nyolung porocaya umba Yesus. Uliorih iro hoduli hino nokuh Listra, pongohino nokuh Ikonium, turus nokuh Antiokhia ang Pisidia.

²²Aang lowu-lowu rih iro ngoba'as ahtoi murid-murid Yesus tutang mopingat murid-murid rih porocaya ahkan Yesus, ‘‘Ihto harus aro ngarot houn, punan ihto nginyam kosanangoh Ang Kolunon Bohua Pohotala,’’ kodorih rasul-rasul rih majar murid-murid Yesus ang lowu-lowu rih.

²³Tutang ang nyino-nyinong ukup, Paulus tutang Barnabas potuot okon-okon ang ukup-ukup rih. Turus hawui bodo'a tutang puasa iro nyarah okon-okon rih ahkan Tuhan ijo iro morocayaoh rih.

²⁴Uliorih rih Paulus tutang Barnabas noturus ponyalan iro nguha tana Pisidia tutang johcok nokuh Pamfilia.

²⁵Tutang uliorih iro mborihtaoh auh Pohotala ang Perga, iro tulak nokuh Atalia.

²⁶Tahkan anai iro bolayar hoduli nokuh Antiokhia. Orih rih lowu unuk iro houn tonosarah ahkan ponongaasi Pohotala, ahkan iro nguan gawi ijo huntuh ius iro ngohpahoh.

²⁷Kotihka johcok ang Antiokhia iro mohaum ulun-ulun tahkan ukup rih, turus mborihta paringoh ijo ius konuan bain Pohotala nguha iro. Iro nyorihta ka'a tohou koloukuwoh Pohotala jari nguap jalan mangat ulun-ulun ijo bohkon Yahudi, porocaya umba Yesus.

²⁸Ang lowu rih Paulus tutang Barnabas mohcon tahi hihco ulun-ulun ijo porocaya.