Read Ot Danum KESAH RASUL-RASUL 15 Bible Online

KESAH RASUL-RASUL 15 - Ot Danum bible

KESAH RASUL-RASUL 15

¹ Pira-pira ulun tahkan Yudea lombut nokuh Antiokhia tutang majar ulun-ulun porocaya ang Antiokhia rih, ijo amat iro eam tonyunat numbun hukum Museh, iro eam duon solamat.

²Paulus tutang Barnabas ngolawan paham umba tiruk ulun ijo kolourih. Kojoriaioh tonuhkas mangat Paulus doro Barnabas hawui pira-pira ulun bohkon, tahkan Antiokhia tulak nokuh Yerusalem ahkan hotohou masalah orih umba rasul-rasul tutang okon-okon ukup ijo ang anan.

³Ukup ang Antiokhia ngitot iro johcok nokuh luar lowu, pongohino iro tulak nguha Penisia tutang Samaria. Ang anan iro mborihta koloukuwoh ulun-ulun bohkon Yahudi jari nyarah aropoh ahkan Pohotala. Borihta rih paham ngojorih ulun-ulun porocaya ang anan.

⁴Kotihka iro johcok ang Yerusalem iro noharang honong hinut bain ukup tutang bain rasul-rasul hawui okon-okon, turus iro mborihta ahkan ulun-ulun rih tohou paringoh ijo jari konuan Pohotala nguha iro.

⁵Tahpi pira-pira ulun tahkan barih Parisi ijo jari porocaya tombok tutang nuhtui, ‘‘Ulun-ulun uhtus bohkon, ijo jari porocaya, harus tonyunat tutang nambit hukum Museh.’’

⁶Turus rasul-rasul tutang okon-okon hopuhpung ahkan mahkat masalah orih.

⁷ Tahi sino iro pohihco tiruk. Kojoriai Petrus tombok hawui nuhtui, ‘‘Konduang-konduang! Ihkam bongon kota'an ang pira-pira ohkot ijo houn Pohotala ngopili ahku tahkan louk ihkam ahkan mborihta Kabar Hinut rih, ahkan ulun-ulun bohkon Yahudi, ahkan iro ka'a ngonih tutang porocaya.

⁸ Tutang Pohotala ijo ngosono ahtoi ulun jari ponokarahoh ijo Io norima iro; Pohotala pokarah hal-hal orih hawui nonga ahkan iro Roh Pohotala, sama kolou ijo jari tononga-Oh ahkan ihto ka'a.

⁹Pohotala eam ngobohkon ihto umba iro, Pohotala morasih ahtoi iro, tului iro porocaya.

¹⁰Orih, inon sababoh ihkam kani ngolawan Pohotala uhuntuh hawui ihkam nonga poretah ijo bahat ahkan murid-murid tuh, padahal tahtu ajuh ihto tutang ihto bongon ka eam sanggup nguanaang orih?

¹¹Sobalikoh, ihto porocaya tutang ihto tonyolamat tului sita asi tahkan Yesus Kristus Tuhan; kodorih ka'a iro.’’

¹²Mahka tonihrih paring ulun ijo hopuhpung ang anan. Pongohuli iro ngonih Barnabas tutang Paulus mborihta hoduli paring ang helan tutang hal-hal luar biasa ijo jari konuan bain Pohotala nguha doro ang louk ulun-ulun ijo bohkon Yahudi.

¹³Uliumba iro opah pander Yakobus nuhtui, ‘‘Konduang-konduang! Cuba ihkam ngonih auh'ku.

¹⁴Simon punai ih mborihta koloukuwoh Pohotala aang pahtukoh pokarah konohuang-Oh umba ulun-ulun bohkon Yahudi, honong konohuang ngopili tahkan iro ulun-ulun bohkon ijo ahkan monjadi ukup-Oh.

¹⁵Orih tohorong umba ijo jari nujum bola-nabi lomoi. Tului anai tonyurat koloutuh,

¹⁶ ‘Uliorih Ahku ahkan lombut hino,’ hion Tuhan, ‘Ahku ahkan nombok huli lohpou Dawid ijo jari bokahkas, tutang ngobuah ijo bokahkas rih, turus nombokoh huli;

¹⁷mangat paring ulun ijo putai rih ngurah Tuhan, homboh paring uhtus ijo bohkon Yahudi ijo jari Ahku na'ahoh monjadi ukup-Ku.’ Kodorihrih hion Tuhan,

¹⁸ijo jari mborihta ang rih pahtukoh lomoi.’’

¹⁹‘‘Jadi numbun tiruk'ku,’’ hion Yakobus, ‘‘ihto ara monyusah iro ulun bohkon Yahudi rih, ijo nyarah aropoh ahkan Pohotala.

²⁰ Tahpi ihto harus mitik surat ahkan iro, tutang ningak iro ahkan iro ara kuman ukun ijo pali, ijo jari tonyarah ahkan songiang, ata'ai kuman usin ohcin ijo mahtoi mudar, ata'ai kuman daha. Tutang ka'a ahkan iro ngomahcu aropoh tahkan gawi-gawi ijo eam hobahtek kihal.

²¹Tului hukum Museh jari anai tahkan lomoi konowasa tutang konahan nyinong ondou Sabat ang lohpou-lohpou sombayang tutang mborihta nyinong paring lowu.’’

²²Rasul-rasul tutang okon-okon, hombo-homboh hawui paring anak ukup rih, muhtus ahkan mitih pira-pira ulun tahkan iro ijo ahkan sonuhu nokuh Antiokhia homboh umba Paulus tutang Barnabas. Mahka iro mitih Silas doro Yudas ijo konohawot ka'a Barsabas. Duo behti tuh, anai tahkan ulun-ulun ijo bosewut aang louk ulun-ulun porocaya ang Yerusalem.

²³Hombo-homboh umba soruhan-soruhan rih, iro ngirim ka'a ijo surat ijo auhoh naing tuh, ‘‘Ahkan paring konduang-konduang ijo asar tahkan uhtus bohkon Yahudi, ijo mohcon ang Antiokhia, Siria tutang Kilikia. Tabe tahkan ihkai, rasul-rasul tutang okon-okon, iorih konduang-konduang'kam.

²⁴Ihkai ngonih anai pira-pira ulun tahkan louk ihkai, ijo jari tulak ahkan'kam tutang nderoh hawui mbingung ihkam, umba ajaran-ajaran iro. Padahal ihkai eam aro nyuhu iro nguan orih rih.

²⁵Orih kotuluioh ihkai bohaum tutang paringoh sotuju ahkan mitih pira-pira behti, tutang nyoruhan iro nokuh ihkam. Iro ahkan tulak hombo-homboh umba konduang ihto Barnabas tutang Paulus ijo ihkai ngasihoh.

²⁶Koduo behti tuh tohko ulun-ulun ijo jari nyarah hasong iro tului Tuhan ihto Yesus Kristus.

²⁷Jadi, ihkai nyuhu Yudas doro Silas nokuh Konduang-konduang. Irorih ijo ahkan nyorihtaoh bongoi hapan pander ahkan'kam borihta ijo tonyurat aang surat tuh ka'a.

²⁸Roh Pohotala jari sotuju — tutang ihkai ka'a sotuju — ahkan ihkam ara tononga kopahtut-kopahtut ijo labih bahat tahkan kopahtut-kopahtut ijo puna porulu tuh ih:

²⁹ararih kuman ukun ijo jari tonyarahoh ahkan songiangdewa; ara kuman daha, ara kuman usin ohcin ijo mahtoi mudar, tutang ngomahcu arop'kam umba gawi-gawi ijo eam hobahtek. Amat ihkam ngomahcu arop'kam tahkan hal-hal orih, ihkam jari nguanoh ijo morong. Nyiring tuh iou, solamat!’’

³⁰Uli nuhtuitulak iro ijo tonyoruhan rih, tulak nokuh Antiokhia. Ang anan iro na'ah paring anak ukup turus nonga surat rih.

³¹Kotihka anak-anak ukup ngonih uli ngomasaoh, iro jorih ahtoi, tului auh surat rih ijo nyanang ahtoi'ndo.

³²Yudas tutang Silas ijo puna nabi ka'a, tahi tu'u bopander umba Konduang-konduang ijo porocaya ang Antiokhia rih, ahkan nonga koba'as tutang kohanyi ahkan'ndo.

³³Ulimba Yudas doro Silas mohcon ang anan pira-pira kotahiu, ulun-ulun porocaya ang Antiokhia rih, ngirim iro buli tutang nyuhu iro nyapai tabe ahkan ulun-ulun ijo nyoruhan iro. [

³⁴Tahpi Silas mutus aropoh ahkan mohcon ang Antiokhia.]

³⁵Paulus tutang Barnabas ka'a mohcon pira-pira kotahiu ang Antiokhia ang anan iro majar tutang mborihta auh Tuhan hombo-homboh umba ulun-ulun bohkon.

³⁶Eam tahi pongohino Paulus nuhtui umba Barnabas, ‘‘Has ihto masap huli Konduang-konduang ijo porocaya umba Yesus ang paring lowu-lowu ang amoh ihto jari mborihta auh Tuhan; mangat ihto nohto koloukuwoh koada'an'ndo.’’

³⁷Barnabas jolik ngomin Yohanes Markus umba iro,

³⁸ tahpi Paulus mokomo eam pios ngomin Yohanes Markus tului io eam kani bogawi homboh umba iro tutang nohtah iro ang Pamfilia.

³⁹Mahka Paulus tutang Barnabas hojawab paham, nyiring laiuoh doro hobomilang: Barnabas ngomin Markus ahkan jolahai nomuoi tutang turus bolayar homboh io nokuh Siprus.

⁴⁰Paulus mitih Silas, turus tulak umba io, ulijari Konduang-konduangoh ijo anai ang Antiokhia rih, bodo'a nyarah iro ahkan pononganasi pohaga Tuhan.

⁴¹Iro ka ngodiling tana Siria tutang Kilikia; ang anan iro ngoba'as koporocayan anak-anak ukup.