Read Ot Danum KESAH RASUL-RASUL 16 Bible Online

KESAH RASUL-RASUL 16 - Ot Danum bible

KESAH RASUL-RASUL 16

¹Paulus noturus ponjalanoh nokuh Derbe, ulihino nokuh Listra. Ang anan anai ihcobehti murid Yesus bogare Timoteus, inaioh ihcobehti ulun Yahudi, ijo porocaya umba Yesus; tahpi amaioh ulun Yunani.

²Aang louk ulun-ulun porocaya umba Yesus, ijo mohcon ang Listra tutang Ikonium, Timoteus ulun bosewut kolou ulun ijo morong.

³Paulus jolik mangat Timoteus homboh umba io, tului orih io nyunat Timoteus. Io nguan kodorih tului ulun-ulun Yahudi ang tana rih paringoh ngota'an ijo amai Timoteus ihcobehti ulun Yunani.

⁴Aang nyino-nyinong lowu ijo iro masapoh, iro nyiar ahkan ulun-ulun ijo porocaya koputusan-koputusan ijo ius tonuhkas bain rasul-rasul tutang karon-okon ukup ang Yerusalem. Iro ningak Konduang-konduangoh ijo jari porocaya rih mangat numbun aturan-aturan rih.

⁵Mahka anak-ukup rih tambah ba'as koporocayaoh tutang nyinong ondou turus botambah aro jumbalahoh.

⁶Roh Pohotala, eam mongijin Paulus doro Silas mborihta auh Pohotala ang Propinsi Asia. Jadi ponyalan iro turus nokuh tana Pirigia tutang Galatia.

⁷Kotihka johcok ang holat Misia, iro cuba nyolong Propinsi Bitinia, tahpi Roh Yesus ngohana iro nokuh anan.

⁸Jadi iro nihti Misia tutang turus nokuh Troas.

⁹Homalomoh ang Troas, Paulus nohto ihco pongorinah. Io nohto ihcobehti ulun Makedonia tombok ang toharepoh sambir nyawot honong paham mangat io tulak nokuh Makedonia ahkan dohop iro.

¹⁰Uliius Paulus norima topahjah rih, ihkai turus botahta-tahtap ahkan tulak nokuh Makedonia. Tului honong yakin ihkai ngomin koputusan, ijo Pohotala nyuhu ihkai mborihta Kabar Hinut rih, ahkan ulun-ulun ang anan.

¹¹Ihkai nohtah Troas tutang bolayar turus nokuh Samotrake, tutang hawunoh hino nokuh Neapolis.

¹²Tahkan anan ihkai nokuh Pilipi, ihco lowu ang distrik ijo pahtukoh ang Makedonia. Pilipi anairih ihco jajahan kolahca'an Ruma. Ang anan ihkai mohcon pira-pira ondou.

¹³Ang ondou Sabat, ihkai tulak nokuh saran sungoi, ijo ang luar bauntukang lowu, tului ihkai komo ang anan anai unuk sombayang ahkan ulun Yahudi. Turus ihkai tuot tutang bopander umba ulun-ulun bawi ijo hopuhpung ang unuk rih.

¹⁴Ihcobehti tahkan louk iro anai podagang benang ungu, araioh Lidia tutang asaroh tahkan Tiatira. Io sita Pohotala mahka Roh Tuhan nggerek ahtoioh, mangat io norima inon ijo Paulus ngajar ahkaioh.

¹⁵Lidia tutang 'cakojolahan ang lohpouoh ponopondus. Uli ponopondus io morawe 'kai, io nuhtui, ‘‘Amat Konduang-konduang komo ahku tu'u-tu'u jari porocaya umba Tuhan Yesus, olai mohcon ang lohpou ehkai.’’ Turus io hojojuan, mangat ihkai kani numbun auh sawotoh.

¹⁶Ang sino ondou kotihka ihkai rahat tulak nokuh unuk bodo'a ihkai hosombang umba ihcobehti bawi; iorih jihpon. Ulunbawi rih tongowasa bain roh ja'at, ijo duon ponuneng ang'conyolung-ang'conyolung ijo ahkan lombut. Umba monuneng nasib ulun, bawi rih nonga utung ijo hajo ahkan Tuan-tuanoh.

¹⁷Ulunbawi rih turus ih ngohasu Paulus tutang ihkai hawui ngoriak, ‘‘Ulun-ulun tuh jihpon Pohotala Ijo Mahaisung! Iro lombut ahkan mborihta ahkan Konduang-konduang koloukuwoh caraoh ihkam duon solamat!’’

¹⁸Pira-pira ondou kotahiuoh ulunbawi rih turus ngociak-ciak, kodorih Paulus nihou kosabaroh, nyiring io ngulos turus nuhtui umba roh ja'at rih, ‘‘Aang aran Yesus Kristus ahku moretah ihko soluka tahkan ulunbawi tuh!’’ Ohkot orih ka'a roh ja'at rih nohtah ulunbawi rih.

¹⁹Kotihka tuan-tuanoh borondong, ijo kosampet iro ahkan dahpot duit jari nihou, iro nawan Paulus doro Silas, turus nguhut doro nokuh alun-alun noharep ijo bokowasa.

²⁰Iro potoharep Paulus tutang Silas ahkan okon-okon pomoretah Ruma, pongohuli nuhtui, ‘‘Ulun-ulun tuh, ulun Yahudi. Iro monder ang lowun ihto.

²¹Iro nyuhu ulun nguan hadat-dasar ijo hokolawan umba hukum-hukum eto ulun Romawi. Ihto eam duon norima ata'ai numbun hadat dasar'ndo!’’

²²Ulun aro ka umba ngolawan Paulus doro Silas; tutang okon-okon pomoretah, morutat hatin'ndo tahkan behtin kododuo rasul rih turus nyuhu ulun mahcat doro.

²³Uliius doro ponahcat monyangit, iro posolong doro nokuh luwang sipir. Kopala sipir nyuhu njaga iro bua-buah.

²⁴Tului poretah rih, kopala sipir rih, ngina iro ang tahkun sipir paling tohun, tutang manga pa'an'ndo aang panga.

²⁵Kira-kira tohun ngolomi kowa Paulus tutang Silas bodo'a tutang monyanyi auh tara ahkan Pohotala. Ulun-ulun tonahan ijo bohkonoh ka rahat ngonih iro monyanyi.

²⁶Songela nyolung tana tonyukuh tana ijo karas samasino, nyiring galang sipir rih taput ka tonyukuh. Paring bauntukang sipir rih bokuap, tutang rahtai-rahtai ijo manga paring ulun ijo nahan ka lohpas.

²⁷Kopala sipir rih tokohcit turus kuat. Kotihka io nohto bauntukang-bauntukang sipir rih bokuap, io nyilak padangoh kani munu aropoh, tului io ngohuoh ulun-ulun ijo tonahan jari nokoru paringoh.

²⁸Tahpi Paulus na'ah muhing auhoh hioi, ‘‘Ara munu arop'mu! Ihkai paring anai ang ohtoi!’’

²⁹Kopala sipir rih nyawot sumbu turus nokoru nyolong nokuh luwang, hawui nohcot io suhkuntu'ut ang toharep Paulus tutang Silas.

³⁰Pongohino rih io ngomin doro soluka, tutang nuhtui, ‘‘Tuan-tuan, inon ijo pahtut ahku nguai, mangat ahku tonyolamat?’’

³¹Paulus tutang Silas mutah, ‘‘Porocayarih, umba Tuhan Yesus! Ihko ahkan solamat — ihko tutang paring ulun ijo ang lohpou'mu!’’

³²Turus Paulus doro Silas monarang auh Tuhan ahkan kopala sipir tutang ahkan paring ulun ijo anai ang lohpouoh rih.

³³Aang tohun ngolomi rih ka'a kopala sipir rih ngomin doro turus muhi tutang nawas dingan doro. Mahka io tutang paring ulun ijo anai ang lohpouoh turus ponopondus.

³⁴Pongohino io ngomin Paulus tutang Silas nokuh lohpouoh tutang nyorungan ukun ahkan doro. Io tutang paring injahjolahai jorih samasino tului iro huntuh porocaya umba Pohotala.

³⁵Hawun ngohkosoh, okon-okon pomoretah Ruma nyuhu polisi nokuh sipir, ahkan nyapai poretah, mangat Paulus tutang Silas konoliwus ih.

³⁶Kopala sipir rih nyorihta hal orih ahkan Paulus. Io nuhtui, ‘‘Tuan-tuan pojabat-pojabat pomoretah Ruma jari nonga poretah ahkan moliwus Tuan-tuan. Huntuh Tuan-tuan tou buli. Solamat jalan!’’

³⁷Tahpi Paulus nuhtui umba karon-polisi rih, ‘‘Ihkai warga nogara Ruma. Earo ponosara ihkai jari ponahcat ang toharep ulun aro, tutang posolong ahkan luwang sipir. Tutang huntuh iro nyuhu ihkai tulak honong toni-tonih? Ihkai eam kani! Nyuhu pojabat-pojabat pomoretah rih lombut bongoi nokuh ohtoi moliwus ihkai.’’

³⁸Kawan-kawan polisi rih, nuhtui auh ang rih, ahkan pojabat-pojabat pomoretah Ruma. Kotihka pojabat-pojabat pomoretah Ruma rih ngonih, ijo Paulus doro Silas warga nogara Ruma, iro monjadi mihkoh.

³⁹Turus iro nokuh, tutang nyawot apun umba Paulus tutang Silas. Pongohino ngitot doro soluka sipir hawui nyawot umba doro, mangat doro turus tulak nohtah lowu rih.

⁴⁰Paulus tutang Silas nohtah sipir rih, turus tulak nokuh lohpou Lidia. Uli hosombang umba ulun-ulun porocaya ang anan, tutang nonga koba'as ahkan'ndo, Paulus tutang Silas tulak nohtah lowu Pilipi.