Read Ot Danum KESAH RASUL-RASUL 17 Bible Online

KESAH RASUL-RASUL 17 - Ot Danum bible

KESAH RASUL-RASUL 17

¹Paulus tutang Silas noturus ponomuoi'ndo nguha Ampipolis tutang Apolonia turus johcok Tesalonika. Ang anan anai lohpou sombayang ulun Yahudi.

²Mahka Paulus ka tulak nokuh lohpou sombayang rih — kolou ijo bahutoh io nguaioh amat anai lohpou sombayang ulun Yahudi — turus hokurah-tiruk umba ulun-ulun ang anan tohou ayat-ayat Surat Borasih. Io nguan kolourih, tolu ondou Sabat hototurus.

³Hogalang ayat-ayat Surat Borasih, io monarang tutang pokarah ijo Lahca Ponyolamat ijo tonobowot bain Pohotala puna mongarot nyiring mahtoi, tahpi Io bolum hoduli tahkan popahtoi. ‘‘Yesus ijo ahku mborihtaoh ahkan'kam rih, Io rih Lahca Ponyolamat ijo tonobowot,’’ hion Paulus.

⁴Pira-pira ulun monjadi porocaya turus homboh Paulus doro Silas; kodorih ka'a jumbalah hajo ulun-ulun Yunani ijo mihkoh umba Pohotala, tutang aro hino bawi-bawi bosewut.

⁵Tahpi ulun-ulun Yahudi hiri ahtoioh. Turus iro muhpung ulun-ulun ijo bororangai ang jalan-jalan, tutang napa ulun-ulun gorombolan porusuh. Turus iro moridu aang hopus lowu rih, tutang nyarang lohpou ihcobehti ulun porocaya ijo bogare Yason kani ngurah Paulus tutang Silas, tului iro kani ngomin Paulus doro Silas nokuh luar noharep ulun aro.

⁶Tahpi kotihka iro eam sombang umba Paulus doro Silas, iro nunda Yason tutang pira-pira ulun porocaya ijo bohkonoh, nokuh toharep okon-okon ijo bokowasa ang lowu rih. Iro bokoriak, ‘‘Ulun-ulun tuh moridu ang umo-umoh! Huntuh lowun ihto ka tonokuh bain iro,

⁷tutang Yason tuh jari norima iro ang lohpouoh. Iro paring molanggar aturan-aturan Kaisar Ruma, tului iro mborihta anai hino lahca bohkon ijo bogare Yesus.’’

⁸Umba auh-auh orih iro nguan ulun aro tutang okon-okon ang lowu rih monjadi boho-hombo.

⁹Turus pongowasa-pongowasa ang lowu rih nyuhu Yason tutang ulun-ulun ijo porocaya ijo bohkonoh nonga duit jaminan. Uliorih punan iro konoliwus.

¹⁰Ngolomi orih ka'a ulun-ulun ijo porocaya umba Yesus ang lowu rih nyawot Paulus doro Silas tulak nokuh Berea. Amat johcokoh ang anan Paulus doro Silas nokuh lohpou sombayang ulun Yahudi.

¹¹Ulun-ulun Berea labih bokuap ahtoi'ndo, tahkan ulun-ulun ang Tesalonika. Honong sanang ahtoi iro ngonih borihta tohou Yesus tutang nyinong ondou iro moriksa Surat Borasih ahkan ngota'an inon ajar Paulus rih morong.

¹²Aro ang louk iro porocaya umba Yesus, tutang eam isu-isut hino ulun Yunani ijo bosewut, ijo porocaya; pios bawi oluka bahkas.

¹³Kotihka ulun-ulun Yahudi ang Tesalonika ngonih tohou Paulus mborihta ka'a auh Pohotala ang Berea, iro ka lombut ang Berea tutang ngihit tutang nguan ulun-ulun ang anan monjadi bimbang.

¹⁴Jele-jeleng konduang-konduang ang Berea rih ngitot Paulus nokuh pantai, rahatoh Silas doro Timoteus tehtep mohcon ang lowu rih.

¹⁵Uli iro ngitot Paulus johcok Atene, konduang-konduang rih buli nokuh Berea hawui ngomin potoh Paulus ahkan Silas doro Timoteus ngahasu io soduonjeleng.

¹⁶Pondehan Paulus ngindoi Silas doro Timoteus, ahtoioh sedih nohto lowu rih tuwi umba karon kopahtung dewa.

¹⁷Ang lohpou sombayang Paulus pander ngurah tiruk umba ulun-ulun Yahudi, tutang ulun-ulun bohkonoh ijo nyembah Pohotala ang anan. Kodorih ka'a ang pasar-pasar nyinong ondou Paulus hokurah-tiruk umba nyinong ulun ijo anai ang anan.

¹⁸Guru-guru aliran Epikuros tutang aliran Stoa hokolawan ka'a umba io. Pira-pira tahkan iro nuhtui, ‘‘Ulun tuh kota'an inon? Pongotaanoh baya honjiot, tahpi aro nyamaioh!’’ Pira-pira ijo bohkon nuhtui, ‘‘Kolouoh io mborihta tohou dewa-dewa uhtus bohkon.’’ Iro nuhtui kolouorih, tului Paulus pander tohou Yesus, tutang tohou bolum hoduli uli mahtoi.

¹⁹Turus iro ngomin Paulus nokuh puhpung ang Puruk Areopagus. Ang anan iro nuhtui umba io, ‘‘Ihkai jolik kota'an ajar bohua ijo mborihta bain ihkam rih.

²⁰Tului ihko nyorihtaoh hal-hal ijo konahan aneh ang tolingan 'kai. Bain tului rih ihkai jolik ngota'an rimaioh.’’ (

²¹Tului paring ulun Atene tutang ulun-ulun bohkonuhtus ijo mohcon ang anan paham pohias ngohpah ohkot kotuhkoi ahkan ngonih tutang pander, tohou hal-hal ijo bohua.)

²²Aang ohkot Paulus tombok ang toharep ulun-ulun ijo hopuhpung ang Areopagus rih, Paulus nuhtui, ‘‘O, ulun-ulun Atene! Ahku nohto ijo a'ang hal-hal ihkam puna tu'u-tu'u boagama.

²³Tului kotihka ahku nyala-nyalan ang kodiling lowun'kam tutang nolihti unuk-unuk sombayang ihkam. Ahku nohto ka'a ihco unuk ihkam nonga porahpah; ang unuk orih tonyurat, ‘Ahkan Pohotala Ijo Eam Kosonan 'kai.’ Orih, Pohotala ijo ihkam nyembah tapi eam ngosono-Oh, Iorih ijo ahku mborihtaoh ahkan'kam.

²⁴ Pohotala ijo ngonjorian kolunon tuh hawui kokaro usiouoh, Iorih Tuhan ijo ngosan langit tutang tana. Io eam mohcon ang luwang lohpou-lohpou dewa ijo tonapa bain kolunon.

²⁵Io ka'a eam ngurah pondohop ulun, tului Iorih ijo nonga pombolum tutang hasong, tutang kokaron aang'co ahkan ulun.

²⁶Tahkan ihcobehti kolunon Io ngonjorian kokaron uhtus, tutang nyuhu iro mohconoh nyuang hopuskolunon. Io ka'arih ijo nuhkasoh tahkan pahtukoh, mira tutang ang umoh iro tou bolum.

²⁷Pohotala nguan ohrih mangat iro ngurah Io. Ayau-ayauoh iro sombang umba Io aang ohkot iro ngurah-ngurah Io. Tahpi kotu'ui Pohotala eam mahcu tahkan ihto nyinong-behti.

²⁸Kolou ijo tonuhtui ulun, ‘Ihto bolum, ihto guet-gehta tutang mohcon ang kolunon tuh tului kowasa Aiu-Oh.’ Sama ka'a umba ijo tonuhtui bain pira-pira ponyair'kam. Iro nuhtui, ‘Ihto paringoh anairih anak-anak-Oh!’

²⁹Nah, tului ihto anairih anak-anak Pohotala, ihto eam tou ngohu Pohotala sama kolou hopahtung tahkanumba bulou ata'ai perak ata'ai bahtu ijo tonapa numbun kopihtar ulun.

³⁰Wayah kobureng ihto rih jari nolingou bain Pohotala, tahpi huntuh Io nyuhu paring ulun ang hopus kolunon hubah tahkan dusa-dusan iro.

³¹Tului Io jari nuhkasoh sino ohkotoh mosara hopus kolunon tuh honong koadiloh. Gawi rih ahkan tonguan bain ihcobehti ijo jari ngopili Pohotala ahkan orih. Tutang ahkan paring ulun jahkin ahkan hal rih. Pohotala jari mombolumoh hoduli ulun rih tahkan popahtoi!’’

³²Kotihka ulun-ulun rih ngonih tohou bolum hoduli uli popahtoi, anai tahkan louk iro ngota'oauh Paulus rih. Anai ka'a ijo nuhtui, ‘‘Ihkai jolik ngonih Konduang mborihta hino tohou hal orih.’’

³³Turus Paulus nohtah puhpung rih.

³⁴Tahpi anai ang louh iro, ijo hobarih umba Paulus tutang porocaya umba Yesus, tahkan louk iro rih: Dionisius anggota majelis Areopagus, tutang ihcobehti bawi ijo bogare Damaris, tutang pira-pira behti ulun hino.