Read Ot Danum KESAH RASUL-RASUL 18 Bible Online

KESAH RASUL-RASUL 18 - Ot Danum bible

KESAH RASUL-RASUL 18

¹Uliorih Paulus nohtahoh lowu Atene tutang tulak nokuh Korintus.

²Ang anan io hosombang umba ihcobehti Yahudi bogare Akwila, boasar tahkan lowu Pontus. Akwila punai lombut tahkan Italia, doro oruhoh Priskila. Iro lombut nokuh Korintus tului Kaisar Klaudius jari nyuhu paring ulun Yahudi, soluka tahkan Ruma. Paulus hihkaslombut masap dororih,

³turus mohcon ang anan umba iro, tutang bogawi sama-sama umba iro, tului ijo nyotiar iro sama kolou gawin Paulus, iorih napa kemah.

⁴Tahpi aang nyinong ondou Sabat, Paulus tulak bopande-pander ang lohpou sombayang ahkan nguan ulun-ulun Yahudi, tutang ulun-ulun Yunani, porocaya umba Yesus.

⁵Uliorih Silas tutang Timoteus johcok tahkan Makedonia, Paulus mongguna koparing ohkotoh ahkan mborihta tahkan Pohotala ahkan ulun-ulun Yahudi, ijo Yesus orihrih Lahca Ponyolamat ijo tonobowot bain Pohotala.

⁶Tahpi tului ulun-ulun rih toturus ih ngolawan tutang nosalan auhoh, mahka Paulus hobirik korawu tahkan hahtiuoh kolou kahta ahkan ngingat iro umba kosalan'ndo. Paulus nuhtui, ‘‘Amat ihkam colahka, kosalan'kam bongom! Ahku borasih tahkan ang orih! Nopara uhuntuh ahku ahkan tulak nokuh ulun-ulun bohkon Yahudi.’’

⁷Turus Paulus nohtah iro tutang tulak, mohcon ang lohpou ijo ang silan lohpou sombayang rih. Lohpou rih lohpou ihcobehti ijo bohkon Yahudi, tahpi io nyembah Pohotala. Aran ulun rih Titius Yustus.

⁸Tahpi Krispus, kopala lohpou sombayang rih tutang paring jolahaioh porocaya umba Tuhan Yesus. Tutang aro ka'a ulun-ulun Korintus bohkonoh, ngonih Kabar ijo popander Paulus ahkan'ndo, tutang iro porocaya umba Yesus turus ponopondus.

⁹Ang sino ngolomi, ang ponopahjahoh, Tuhan nuhtui umba Paulus, ‘‘Ararih mihkoh! Bopander toturus tutang ara tonih.

¹⁰Tului Ahku homboh ihko. Eam aro ihcobehti ka duon nguan ang ja'at umba ihko, tului aro ulun ang lowu tuh anairih ulun-ulun aik-Ku.’’

¹¹Bain tului orih Paulus mohcon ihco sotengah toun kotahiuoh tutang majar auh Pohotala ahkan iro.

¹²Kotihka Galio monjadi gubernur ang Akhaya, ulun-ulun Yahudi hihco ngolawan Paulus tutang ngomin io nokuh bosara.

¹³Iro ngadu ang bosara rih, ‘‘Ulun tuh mopongaroh ulun aro mangat nyembah Pohotala, umba cara ijo hokolawan umba poretah Museh!’’

¹⁴Kodorih Paulus kani mutah, Galio jari houn nuhtui umba ulun-ulun Yahudi, ‘‘O ulun-ulun Yahudi! Amat ijo tongohu ihkam tuh ihco polanggaran ata'ai ihco koja'at, puna kopahtutoh ahku sabar ngonih pongaduanoh ihkam tuh.

¹⁵Tahpi tuh anairih hokolawan tohou auh-auh tutang aran-aran hawui hukum-hukum'kam bongom! Jadi ihkam ijo harus mongobuahoh mohaumoh. Ahku bahat nanyamoh muhtus hal-hal kolouorih!’’

¹⁶Turus Galio muhko iro nokuh luar.

¹⁷Mahka iro nawan Sostenes, kopala lohpou sombayang rih, tutang mahcat io ang boun meja bosara. Tahpi Galio samasino eam poduli hal kolourih.

¹⁸ Ulimba Paulus magun mohcon tahi ang Korintus. Pongohino io ngohawot solamat mohcon ahkan ulun-ulun porocaya ang anan, turus bolayar homboh Akwila doro Priskila nokuh Siria. Ang Kengkrea, Paulus nohtok balouoh ijo jari tohonouoh monjadi ombu, tului anai miatoh umba Tuhan.

¹⁹Kotihka johcok ang Epesus, Paulus nohtahoh Priskila doro Akwila, turus nyolong lohpou sombayang tutang hokurah-tiruk umba ulun-ulun Yahudi ang anan.

²⁰Iro nyawot mangat Paulus kani mohcon labih tahi umba iro, tahpi io eam kani.

²¹Oluka kodorih, ang ohkot Paulus hihkas, io nuhtui, ‘‘Amat Pohotala ijo ngahtuhoh, ahku ahkan hoduli hino nokuh ohtoi.’’ Uliumba nuhtui kodorih, io hihkas tahkan Epesus.

²²Uliumba nosuluh ang Kaisarea, io tulak nokuh Yerusalem ahkan nonga tabe ahkan ukup ang anan, noturus ponyalai nokuh Antiokhia.

²³Uliumba mohcon ang anan pira-pira kotahiu, io tulak hino masap tana Galatia tutang Prigia ahkan ngomba'asoh koporocaya ulun-ulun porocaya.

²⁴Pondehan rih, lombutrih nokuh Epesus ihcobehti ulun Yahudi konanak ang Aleksandria bogare Apolos. Io pihtar bopander tutang paham solembang usin Surat Borasih,

²⁵hawui jari tobajar ahkan kosono ajaran tohou Yesus. Mahka umba somangat ijo honong karas tu'u io mongajar toliti tohou Yesus, oluka punan popondus Yohanes iou ijo kosonaioh.

²⁶Honong bohanyi Apolos nopara nuhtui ang lohpou sombayang, tutang ang ohkot Priskila doro Akwila ngonih auh ajaranoh, iro ngomin io nokuh lohpouoh. Ang anan iro nyorihta ahkaioh, umba labih metuk hino, tohou rancana Pohotala ahkan monyolamat ulun, nguha Yesus.

²⁷Pongohuli Apolos nohuang tulak nokuh Akhaya. Mahka ulun-ulun ijo porocaya umba Yesus ang Epesus nyurat surat ahkan konduang-konduang ijo porocaya ang Akhaya, mangat iro kani norima Apolos. Tutang ohkot Apolos johcok Akhaya, pondohopoh bokorinah paham gunai ahkan ulun-ulun ijo tului ponongaasi Pohotala jari porocaya umba Yesus.

²⁸Tului honong pongaroh Apolos duonmongalah ulun-ulun Yahudi a'ang soaljawab-soaljawab ang toharep ulun aro. Tutang io mombuktioh umba ayat-ayat tahkan Surat Borasih ijo Yesus rih Lahca Ponyolamat ijo tonobowot.