Read Ot Danum KESAH RASUL-RASUL 19 Bible Online

KESAH RASUL-RASUL 19 - Ot Danum bible

KESAH RASUL-RASUL 19

¹Pondehan Apolos anai ang Korintus, Paulus rahat nomuoikodiling podalaman tana rih turus johcok ang Epesus. Ang anan io hosombang umba pira-pira ulun ijo jari porocaya umba Yesus.

²Paulus ngisok umba iro, ‘‘Jarikah Konduang-konduang norima Roh Pohotala, kotihka ihkam porocaya umba Yesus?’’ Iro mutah, ‘‘Jaham. Malah ihkai eam pu'u ngonih ijo tohko Roh Pohotala.’’

³‘‘Amat kodorih umba popondus ijo umoh ihkam ponopondus?’’ kisok Paulus. ‘‘Umba popondus Yohanes,’’ hion'ndo.

⁴ Turus Paulus nuhtui, ‘‘Yohanes, mopundus ulun ahkan ngorinah, ijo ulun-ulun rih jari hubah tahkan dusa-dusaoh. Tahpi pondehan rih ka'a Yohanes mborihta ahkan ulun-ulun Israel, ijo iro harus porocaya umba ulun ijo ahkan lombut pongo tahkan io, iorih Yesus.’’

⁵Kotihka iro ngonih auhrih, iro turus ponopondus aang aran Tuhan Yesus.

⁶Tutang aang ohkot Paulus ngina longoioh ang ngosan iro, Roh Pohotala ngowasa iro, turus iro nopara ngohawot bahasa ijo helan, hawui monuhtui borihta tahkan Pohotala.

⁷Jumbalah iro paringoh anai kira-kira duo balas behti.

⁸Kotahin tolu bulan Paulus mborihta honong bohanyi umba ulun-ulun ang lohpou sombayang tutang soaljawab umba iro ahkan moyahkinoh iro tohou koloukuwoh Pohotala moretah kolou Lahca.

⁹Tahpi pira-pira ang louk ulun-ulun rih, mahang kuhungoh tutang eam kani porocaya. Ang toharep paring ulun ijo hopuhpung ang anan, iro nosalan ajaran tohou rancana Pohotala ahkan monyolamat kolunon nguha Yesus. Tului bain orih Paulus nohtah iro, turus tulak homboh murid Yesus nokuh luwang kuliah Tiranus. Ang anan nyinong ondou io hokurah-tiruk umba ulun-ulun.

¹⁰Io nguan ang kodorih hototurus duo toun kotahiu johcok paring ulun ijo mohcon ang Propinsi Asia, pios io ulun Yahudi oluka ulun uhtus bohkon, paringoh ngonih auh Tuhan.

¹¹Pohotala nguan tandahelan-tandahelan helan ijo luar biasa nguha Paulus.

¹²Amat sopu tangan tutang benang pohtong kahangoh ijo pu'u hapan Paulus, omin ulun tahkan io turus nginaoh ang isun ulun-ulun poros, ponyahkit iro nihou, tutang roh sehtan ka soluka tahkan iro.

¹³Anai pira-pira duhkun Yahudi ijo tulak nokuh umo-umoh, muhko roh ja'at tahkan ulun-ulun. Duhkun-duhkun rih cuba-cuba ka'a hapan aran Tuhan Yesus ahkan muhko roh-roh sehtan rih. Iro nuhtui umba roh-roh sehtan rih, ‘‘Aang aran Yesus ijo mborihta bain Paulus rih, ahku muhko ihko!’’

¹⁴Anai pihtu anak bahkas ihcobehti imam kopala ijo bogare Skewa, ijo nguan hal kolouorih.

¹⁵Tahpi roh sehtan rih nuhtui umba iro, ‘‘Ahku kosono Yesus tutang ahku kosono Paulus ka, tahpi ihkam tuh iai?’’

¹⁶Turus ulun ijo sonalung sehtan rih nokehcuk tutang nocahap iro, honong bosiak samasino nyiring iro nokehcuk tahkan lohpou rih honong bohima-himang hawui hoburang, tului hahtin iro tomorutat tahkan behtin iro.

¹⁷Paring ulun Yahudi tutang ulun-ulun uhtus bohkon ijo mohcon ang Epesus ngonih tohou kojodian rih turus iro monjadi mihkoh. Mahka aran Tuhan Yesus mahi tonara-nara.

¹⁸Aro ulun ijo jari porocaya ahkan Yesus, lombut ngahku ang toharep ulunaro, gawin-gawin iro ang wayah houn.

¹⁹Tutang iro ijo bahut molalus kahji koruhoi nipunah buhku-buhku iro tutang mahpong orih ang boun ulun aro. Regan buhku-buhku rih amat tonyombalah paringoh limo pulu kujan duit perak.

²⁰Kolouorih honong ijo hebat rih auh Tuhan mahi tosiar, tutang mahi-mahi ba'as pongarohoh.

²¹Uliumba kojodian-kojodian orih, Paulus nuhkas ahkan tulak nokuh Makedonia tutang Akhaya turus hototurus nokuh Yerusalem. ‘‘Uliumba nokuh anan,’’ hion Paulus, ‘‘ahku harus tulak nokuh Ruma ka'a.’’

²²Mahka Paulus nyuhu duo behti tahkan pohalu-pohaluoh iorih Timoteus tutang Erastus ahkan tulak nokuh Makedonia, pondehan io mohcon pira-pira ohkot kotahiuoh hino ang Propinsi Asia.

²³Kira-kira aang ohkot orihrih nyolung kokihcuh ijo hajo ang Epesus tului ajaran tohou Yesus.

²⁴Tului ang lowu rih anai ihcobehti tuhkang perak bogare Dimetrius, ijo napa lohpou-koramat dewa ahkan Dewi Artemis. Usaha ulun rih polombut hasil ijo hajo ahkan ponggawi-ponggawioh.

²⁵Bain tului rih io muhpung ponggawi-ponggawioh sama-sama umba ponggawi-ponggawi tohkang perak bohkonoh, turus nuhtui, ‘‘Konduang-konduang! Konduang kota'an ijo ihto duon hasil tahkan gawi ihto tuh.

²⁶Uhuntuh Konduang jari nohto tutang ngonih bongon, inon ijo konuan bain Paulus rih. Io nuhtui ijo dewa-dewa ijo tonapa bain kolunon samasino eamrih dewa. Tutang io jari bohasir nguan aro ulun porocaya umba ajaroh, eam tihkas ang ohtoi ang Epesus, tahpi bilak ang hapus tana Asia ka'a.

²⁷Bohayaoh iorih, ijo usaha ihto tuh ahkan norima aran ja'at. Tutang eam baya orih, molekan lohpou Dewi Artemis ka ahkan tonongohu remeh, honong kohajoioh tonihcak-nihcak; podahal io dewi ijo tonohoromat bain paring ulun ang Asia tutang hapus kolunon!’’

²⁸Kodorih ulun-ulun rih ngonih auh orih ahtoi iro monjadi panas, turus iro ngoriak-ngorahang, ‘‘Bolum Artemis dewi ulun Epesus!’’

²⁹Mahka kokihcuh orih monanyap hapus lowu. Pongohino pulou pongihcuh-ngihcuh rih, nawan Gayus tutang Aristarkhus yorih ulun-ulun Makedonia ijo mongawal Paulus ang ponomuoioh, turus nunda iro nokuh alun-alun lowu rih.

³⁰Paulus kani nyolong ngahasu iro, tahpi ulun-ulun ijo porocaya ahkan Yesus ang anan ngohana io.

³¹Pira-pira ulunhajo Propinsi Asia rih ka, ijo hosohabat umba Paulus nyuhu ulun mborihta ahkan Paulus, mangat io ara pokarah aropoh ang alun-alun orih.

³²Pondehan rih ulun-ulun ijo hopuhpung ang alun-alun rih, monjadi boho-bombo. Anai ijo ngoriak koloutuh, anai ijo ngoriak kodorih. Tului topoaro tahkan iro eam ngota'an, inon sabab iro hopuhpung ang anan.

³³Ihcokobarih tahkan ulun-ulun rih ngohu Aleksander biang koladioh, tului io ijo tongonyuhung nokuh baun, bain ulun-ulun Yahudi. Mahka Aleksander nonga tanda umba longoi, nyawot nonga kosapetahkai tou mombela aropoh ang toharep ulun-ulun rih.

³⁴Tahpi kodorih iro nohto ijo io ulun Yahudi, hombo-homboh iro ngoriak muhi-muhing, ‘‘Bolum Artemis, dewi ulun Epesus!’’

³⁵Kojoriaioh jurutulis lowu bohasir potonih ulun aro rih hawui io nuhtui, ‘‘O Ulun Epesus! Nyinong ulun kota'an ijo Epesus tuh lowu ijo mohaga lohpou dewi Artemis tutang bahtu boapuah ijo ngonyahtu tahkan langit.

³⁶Eam aro ihcobehti ka'a duon ngolawan hal rih. Tului orih tonih houn tutang ara nguan aangihco honong sombarang.

³⁷Ulun-ulun tuh, ihkam ngomiu ahkan ohtoi eam kotului iro jari nyirou lohpou dewi'kam ata'ai tului iro jari mohina dewi eto.

³⁸Amat Dimetrius tutang ulun-ulun ponggawioh rih, anai dawa'an tohimo ihcobehti, naohoh iro ngomin dawaoh rih nokuh bosara. Bosara bokuap bagi orih tutang okon-okon pomoretah ka toturus anai.

³⁹Tahpi amat magun anai hino aangihco ijo bohkon, ijo ihkam jolikohrih, harus ngobuahoh ang puhpung ulun aro ijo sah.

⁴⁰Tului inon ijo nyolung ondou tuh, tou morusak ihto. Ihto tou tongohu nguan pomborontak, tului ihto eam aro ngina ihco alasan ka'a ahkan ngomorongoh koboho-bombo tuh.’’

⁴¹Uliumba nuhtui paringoh rih, jurutulis lowu rih nyuhu ulun-ulun aro rih buli.