Read Ot Danum KESAH RASUL-RASUL 2 Bible Online

KESAH RASUL-RASUL 2 - Ot Danum bible

KESAH RASUL-RASUL 2

¹ Kotihka jari johcok Ondou Pentakosta, paring ulun ijo porocaya hopuhpung ang ihco unuk.

²Songela konahan auh tahkan langit kolou bahiu ijo guhtu-guhtuk monyangit. Lohpou ang umoh ulun-ulun rih rahat tuot, sohapusoh tuwi kobain auh rih.

³Mahka iro nohto jola-jola kolou jelak baho nyoli nokuh umo-umoh tutang nahpekaropoh aang iro nyinong behti.

⁴Iro paring konowasa bain Roh Pohotala tutang nopara hopander a'ang hokobohkon basa. Iro pander numbun inon ijo tononga Roh rih ahkan iro mangat konohawotoh.

⁵Aang ohkot orih ulun Yahudi tahkan mahca-mahcam lowu ang hapus kolunon, mohcon ang Yerusalem. Iro anairih ulun-ulun ijo bokehtep umba Pohotala.

⁶Kotihka ngonih auh orih, aro sino ulun lombut hopuhpung. Iro paringoh tokocit ngonih ulun-ulun porocaya rih hopander hapan basa iro nyino-nyinong.

⁷Hawui helan tutang torongo-rongong iro nuhtui, ‘‘Ulun-ulun ijo hopander tuh paringoh ulun-ulun Galilea, kowa?

⁸Koloukuwoh nyolungoh nyiring ihto ngonih iro tou hopander ang luwang basa lowun ihto nyinong behti?

⁹Ihto ulun-ulun tahkan Partia, Media, Elam; tahkan Mesopotamia, Yudea tutang Kapadokia; tahkan Pontus tutang Asia,

¹⁰tahkan Prigia tutang Pamfilia, tahkan Misir tutang karon-daerah Libia doni Kirene, anai louk ihto ijo lombut tahkan Ruma,

¹¹anai ulun-ulun Yahudi tutang anai ka'a ulun-ulun uhtus bohkon ijo jari nyolong agama Yahudi; anai ka'a ijo lombut tahkan Kreta tutang Arab. Ihto paring ngonih iro hopander a'ang basa ihto nyino-nyinong tohou hal-hal ijo helan ijo konuan bain Pohotala!’’

¹²Hawui helan tutang torongo-rongong iro paringoh ngisok sama aropoh, ‘‘Inon rimaioh tuh?’’

¹³Tahpi anai ka'a ulun ijo hololea. Iro nuhtui, ‘‘Ah ulun-ulun tuh tihkas busou ih!’’

¹⁴Turus Petrus tombok homboh sobalas rasul ijo bohkon, pongohuli nuhtui ahkan ulun aro rih. Hapan auh ijo muhing io nuhtui, ‘‘Konduang-konduang ulun-ulun Yahudi tutang paring ijo mohcon aang Yerusalem ngonih bua-buah! Tului hal ituh porulu ahku ngonarang ahkan'kam.

¹⁵Ulun-ulun tuh eam busau kolou ijo hion ihkam ngohu. Tului huntuh punan jam jalu ngokos.

¹⁶Tahpi tuh jari tomborihta bain Pohotala hopatou Nabi Yoël:

¹⁷ Pohotala nuhtui, ‘Ang lain jaman Ahku ahkan nusuh Roh-Ku nokuh isun paring ulun. Anak-anak'kam ijo bahkas tutang anak-anak'kam ijo bawi ahkan mborihta ahkan'kam hal-hal ijo Ahku mborihtaoh ahkan'ndo. Ulun-ulun biumu ahkan nohto hal-hal ijo Ahku ngorinahoh ahkan iro. Ulun-ulun oko'kam ahkan nuhpi dolang nuhpi ijo Ahku nonga ahkan'ndo.

¹⁸Ahkan jihpok-jihpok-Ku ka — pios bahkas kanika bawi — , ahkan Ahku nusuh Roh-Ku ang ondou-ondou rih. Iro ahkan mborihtaoh hal-hal ijo Ahku jari mborihta ahkan'ndo.

¹⁹Ahku ahkan nguanoh kahtahelan-kahtahelan ang diang ahi aang langit, tutang hal-hal ijo luar biasa ang pinda ohtoi ang tana; ahkan anai daha tutang ahpui, sopuluk tutang asep.

²⁰Mahtanondou ahkan monjadi pindong, tutang bulan monjadi bohandang kolou daha sounumba Ondou Tuhan, ondou ijo hajo tutang horomat rih lombut.

²¹Aang ohkot orih, ulun ijo na'ah ahkan Tuhan ahkan tonyolamat.’

²²Konduang-konduang, ulun-ulun Israel! Ngonihrih inon ijo ahku nuhtuioh tuh: Yesus ulun Nasaret rih jari nonga tugas bain Pohotala ahkan konduang. Orih korinah sasino aang kahtahelan-kahtahelan tutang hal-hal luar-biasa ijo Pohotala nguaioh ang louk ihkam hopatou Yesus Kristus. Paring ohrih konduang bongon jari kota'an.

²³ Hosorurui umba rancana-Oh bongoi, Pohotala nuhkas ahkan nyorahoh Yesus ahkan'kam. Tutang kotihka Io tonyarahoh, ihkam munu Io honong mohonou ulun-ulun ja'at mahpak Io.

²⁴ Tahpi Pohotala ngoponyunoh Io huli tahkan louk ulun-ulun mahtoi. Io tonolon bain popahtoi, tahpi Pohotala moliwus-Oh, tului eam anaiharapan Io konowasa toturus bain popahtoi.

²⁵ Tohou Yesus tuh Dawid pu'u nuhtui, ‘Ahku nohto Tuhan toturus ang toharep'ku; Io mambaioh ahku, mangat ahku eam tohungge bain inon ka'a.

²⁶Orih kotuluioh ahtoi'ku jorih-jirah, nyamak'ku ngohawot auh tara-tara: tutang behtik'ku tuh ahkan ngindoi honong benyem ang luwang kolowong.

²⁷Tului Ihko Tuhan eam mohonau homboruak'ku mohcon ang lowun ulun mahtoi. Ihko eam mohonauoh jihpon-Mu ijo bokehtep rih lonyuh tutang dilap.

²⁸Ihko jari ngorinah ahkak'ku jalan ijo nuju pombolum ijo sojahti. Kojorih'ku momurai-murai tului Ihko anai hihco ahku.’

²⁹Konduang-konduang ahku ijinrih ahku bopander umba ihkam torus tarang tohou Dawid amai lolohor eto rih. Io jari mahtoi tutang jari tonolowongoh ka'a; kolowongoh magun anai ang tohun-tohun ihto nyiring huntuh.

³⁰ Pohotala jari nobowot ahkan Dawid honong tulut ijo anai ihcobehti tahkan lihitoh ahkan ponotuot bain Pohotala monjadi lahca. Tului Dawid kota'an ahkan bowot orih, tutang tului io ihcobehti nabi ka'a,

³¹io kota'an hino, inon ijo ahkan konuan bain Pohotala. Jadi io jari nujum ijo Lahca Ponyolamat ijo tonobowot bain Pohotala ahkan bolum huli tahkan popahtoi. Dawid nuhtui, ‘Io eam tomohonau botohtah ang luwang kolunon ulun-ulun mahtoi; behtiu-Oh eam ahkan monjadi lonyuh tutang lingis.’

³²Yesus tuhrih ijo tonombolumoh hoduli tahkan louk ulun mahtoi bain Pohotala. Ihkai paring jari monyaksioh bangon 'kai hal orih.

³³Io hogahtang nokuh ponuotoh ijo isung tutang ahkai tononga kowasa bain Pohotala, turus norima Roh Pohotala ijo jari tonobowot bain Amai. Tutang ijo ihkam huntuh, tuh ngonih tutang nohto anairih, Roh rih ijo Io nusuhoh ahkan ihkai.

³⁴ Dawid bongoi eam nuhkat nokuh soruga, tahpi Dawid ka'a jari nuhtui, ‘Tuhan nuhtui umba Tuhan'ku:

³⁵Tuotrih ihkam ang hila kotouk-Ku, nyiring Ahku nguan musuh-musuh-Mu monyarah ahkan-Mu!’

³⁶Orih kotuluioh paring ulun Israel pahtut kota'an moro-morong ijo Yesus, ijo ihkam mahpakoh rih. Yesus rih ka'a ijo jari tomotuot Pohotala monjadi Tuhan tutang Lahca Ponyolamat!’’

³⁷Kotihka ulun-ulun rih ngonih hal orih, ahtoi'ndo paham bolisah. Turus iro ngisok umba Petrus tutang rasul-rasul ijo bohkon. ‘‘Konduang-konduang, ihkai harus nguan inon?’’

³⁸Petrus mutah, ‘‘Hubahrih, tahkan dusa-dusan'kam. Tutang pios ihkam nyinong behti ponopondus aang aran Yesus Kristus mangat dusa-dusan'kam tongapun. Mahka konduang-konduang ahkan norima ponongan Roh Pohotala tahkan Pohotala.

³⁹Tului ijo jari tonobowot bain Pohotala rih anai ahkan'kam tutang ahkan lihit-lihit'kam hawui ahkan ulun-ulun ijo anai ang unuk-unuk ijo mahcu — iorih paring ulun ijo tona'ah bain Pohotala Tuhan ihto ahkan lombut ahkai-Oh.’’

⁴⁰Kodorih Petrus monarang kotbah ahkan iro. Tutang umba aro tuhtui ijo bohkon ka'a io nyuhuoh ahkan iro, mangat iro moliwus arop'ndo tahkan uhtus ijo ja'at tuh, ijo ahkan tonohukum bain Pohotala.

⁴¹Aro ulun ijo porocaya ahkan ijo tonuhtui bain Petrus turus iro ponopondus. Mahka jumbalah ulun ijo porocaya ang ondou orih botambah hino umba tolu kujan behti.

⁴²Hawui kokehtep iro bajar tahkan rasul-rasul rih, tutang toturus hopuhpung hombo-homboh. Iro kuman hombo-homboh tutang bodo'a hombo-homboh.

⁴³Aro samasino kahtahelan ijo konuan bain rasul-rasul rih nyiring paring ulun helan tutang mihkoh.

⁴⁴ Ulun-ulun ijo porocaya rih turus hihcoahtoi, tutang inon ijo iro tepui, iro hapaoh sama-sama.

⁴⁵Iro modagang karon-ramui tutang ponahtou ain'ndo, turus magi duitoh, ang louk iro paringoh numbun koporulu nyinong behti.

⁴⁶Nyinong ondou iro turus hopuhpung ang Lohpou Tuhan; hawui kuman hombo-homboh, tutang jorih hawui randah ahtoi ang lohpou-lohpou'ndo.

⁴⁷Iro turus nara-nara Pohotala tutang tongonjorih paring ulun. Nyinong ondou jumbalah iro turus botambah. Tului Tuhan nonga rahat iro ulun-ulun ijo puna ahkan tonyolamat.