Read Ot Danum KESAH RASUL-RASUL 20 Bible Online

KESAH RASUL-RASUL 20 - Ot Danum bible

KESAH RASUL-RASUL 20

¹Uli koada'an ang Epesus benyem huli, Paulus na'ah anak ukup hopuhpung tutang ngomba'as iro porocaya. Pongohuli io ngohawot solamat mohcon, tului io noturus ponomuoioh nokuh Makedonia.

²Io masap tanah-tanah Makedonia, tutang nonga aro tingak ahkan ulun-ulun ijo porocaya umba Yesus Kristus ang anan, ahkan ngomba'as koporocayan'ndo. Pongohino io tulak nokuh Yunani.

³Tolu bulan kotahiu io mohcon ang anan. Turus kotihka Paulus rahat botahta-tahtap ahkan bolayar nokuh Siria, anai kabar ijo ulun-ulun Yahudi rahat hopahkat ahkan munu Paulus. Bain tului rih io nuhkas, ahkan hoduli nguha Makedonia.

⁴Sopater anak Pirus ijo asaroh tahkan Berea tulak homboh io; tutang kodorih ka'a Aristarkhus doro Sekundus ulun Tesalonika tutang Gayus ulun Derbe. Ka'a Timoteus, Tikhikus tutang Trofimus, ulun-ulun tahkan Propinsi Asia.

⁵Iro nosolu ihkai, turus ngindoi ihkai ang Troas.

⁶Ulirih ondou Pesta Luhte Eam Boragi, ihkai bolayar nohtah Pilipi. Limo ondou pongohino ihkai hihco hino umba iro ang Troas. Ang anai ihkai mohcon ihco minggu.

⁷Ngalomi minggu ihkai hopuhpung mangat kuman hombo-homboh kolou hokonduang. Paulus pande-pander umba ulun-ulun tului ngohkosoh ngewak tulak. Nyiring tohun ngolomi Paulus pander toturus.

⁸Luwang tahkun ang tikat diang, unuk ihkai hopuhpung rih aro sumbu.

⁹Ihcobehti ulunbiou ijo bogare Eutikus, tuot ang boun pambau. Tului Paulus eam tondo-tondo bopander ulunbiou rih nundu samasino, turus topotiruh ang pambau rih, turus io botahak kopinda tahkan tikat tolu. Ohkot iro ngahtang io, io jari palus.

¹⁰Tahpi Paulus nosuluh nokuh pinda turus nga'ap aropoh isun ulunbiou rih, tutang ngahawonoh. Paulus nuhtui, ‘‘Ara takut, io magun bolum!’’

¹¹Pongohuli Paulus nuhkat nokuh diang turus mombagi luhte tutang kuman hombo-homboh. Uliumba tahi bopander umba ulun-ulun rih, nyiring ngohkos, Paulus botulak.

¹²Ulun-ulun ngitot buli ulunbiu rih, nokuh lohpouoh. Mahka ahtoi iro jorih tutang paham tomahpung.

¹³Ihkai tulak nokuh kapal turus bolayar labih houn nokuh Asos ahkan ngomin Paulus nokuh kapal ang anan. Io jari ngahtuh kodorih, tului io ahkan koanan nguha jalan isuntana.

¹⁴Ulijari hosombang ang Asos, Paulus jeleng jahkat kapal turus ihkai bolayar nokuh Metilene.

¹⁵Tahkan anan ihkai bolayar hino, tutang ngohkosoh johcok ang unuk ijo hotoharep umba Khios. Ulihawun johcok ang Samos tutang ihcoondou pongohino ihkai ang Miletus.

¹⁶Paulus jari nuhkas eam ahkan tondo ang Epesus, mangat ara nihou ohkot ang tana Asia. Tului konohuangoh jeleng johcok Yerusalem ang Ondou Pesta Pentakosta.

¹⁷Tahkan Miletus Paulus ngirim kabar nokuh Epesus ahkan nyawot okon-okon ukup ang anan lombut nyombang umba io.

¹⁸Kotihka iro johcok Miletus, mahka Paulus nuhtui umba iro, ‘‘Konduang-konduang ngota'an koloukuwoh ahku bolum kotahin tuh, ang louk ihkam. Nopara ang ondou ijo pahtukoh ahku johcok ang Asia.

¹⁹Honong randah ahtoi tutang aro nusuhdanum mahta, ahku bogawi ahkan Tuhan, ang tohun-tohun karot ijo ahku nginyamoh tului tiruk ja'at ulun-ulun Yahudi.

²⁰Konduang ngota'an ijo ahku eam aro kihkoh mborihta ahkan ihkam inon ijo boguna ahkan'kam. Ahku majar ihkam ang puhpung-puhpung ulunaro tutang ang lohpou-lohpou.

²¹Pios umba ulun-ulun Yahudi oluka umba ulun-ulun uhtus bohkon, ahku toturus nonga pongingat mangat iro hubah tahkan dusa-dusan iro, tutang lombut nokuh Pohotala, hawui porocaya ahkan Tuhan Yesus.

²²Huntuh ahkan te'et umba poretah Roh Pohotala, ahku hihkas nokuh Yerusalem. Tutang ahku eam kota'an inon ijo ahkan nyolung buah ahku ang anan.

²³Ahku tihkas ngota'an, ijo ang nyino-nyinong lowu, Roh Pohotala jari tarang monyorihta ahkak'ku, ijo ahku ahkan nyolong sipir tutang ahkan ngarot.

²⁴ Tahpi ahku eam poduli umba pombolum'ku tuh, asar ahku duon ngohpah gawi-gawi ijo tomorocaya bain Tuhan Yesus ahkak'ku, tutang asar ahku te'et nyiring ang lain pombolum'ku ahkan mborihta Kabar Hinut rih tohou pononganasi Pohotala.

²⁵Ahku ius masap Konduang-konduang paringoh, tutang mborihta ka'a tohou koloukuwoh Pohotala moretah kolou Lahca. Huntuh ahku nanyam eam ahkan hosombang hino umba Konduang-konduang.

²⁶Bain tului orih honong tarang ahku nuhtui ahkan ihkam ondou tuh, ijo amat anai ang louk ihkam ijo binasa noin, orih eam sala ahku.

²⁷Eam pu'u ahku buhou tahkan angkonuak'ku, ngonorangan ahkan ihkam koparing, rancana Pohotala.

²⁸Hondakrih ihkam monjaga arop tutang monjaga ka'a sohopus ukup ijo jari tonosarah Roh Pohotala ahkan'kam ahkan tonojaga. Tului ihkam jari konahtang monjadi ponuneng ukup rih. Pios ihkam jorih monjaga ukup Pohotala rih kolou sokahtik monjaga tobiri-tobirioh. Tului Pohotala jari ngonjorian ukup rih aiu-Oh bongoi, nguha popahtoi Anak-Oh bongoi.

²⁹Soponulakoh ahku, musti ahkan lombut kokaro harimaung ijo bosiak nokuh tohun ihkam. Tutang ulun-ulun ijo ihkam monjaga rih ahkan ukun harimaung-harimaung rih.

³⁰Malah tahkan louk Konduang-konduang bongon ka, ahkan lombut ulun-ulun ijo ahkan monyiar borihta ijo eam morong. Iro nguan kodorih ahkan ulun-ulun ijo jari porocaya umba Tuhan Yesus Kristus monjadi lacat tutang nutut iro.

³¹Tului orih bojaga-jaga! Ingat ijo tolu toun kotahiu hawui aro danum mahtotumbak, hondou homalom ahku eam pu'u tondo majar nyinong ulun tahkan ihkam.

³²Huntuh ahku nyarah ihkam ahkan Pohotala mangat Io ijo monjaga ihkam, tutang mangat ihkam nambit aang kabar pononganasi Pohotala. Pohotala tepun kowasa ahkan ngomba'asoh ihkam, tutang nonga ahkan'mu borehkat-borehkat ijo jari tonahtap-Oh ahkan paring ukup Aiu.

³³Jaha pu'u ahku jolik duit ata'ai hahtin tahkan ihcobehti ka.

³⁴Konduang bongon kota'an ijo umba koba'as bongok'ku, ahku bogawi nyuhkup ijoboguna ahkak'ku tutang injah-jolahak'ku ijo homboh umba ahku.

³⁵A'ang paring porokara ahku jari nonga sutu ahkan'kam ijo umba gawi karas koloutuh, ihto harus ndohop ulun-ulun ijo eam ba'as. Tului ihto harus ingat, ahkan inon ijo Tuhan Yesus bongoi jari nuhtui, ‘Labih sanangmangat nonga, tahkanumba norima.’ ’’

³⁶Ulijari Paulus ngumbot panderoh, io suhkuntu'ut umba iro paringoh turus bodo'a.

³⁷Iro paringoh nangih tutang ngahawon Paulus, ngohawot solamat jalan.

³⁸Iro karas porosahtoi'ndo, mombahtang Paulus nuhtui ijo iro eam ahkan nohto io hino. Turus iro ngihtot io johcok kapal.