Read Ot Danum KESAH RASUL-RASUL 21 Bible Online

KESAH RASUL-RASUL 21 - Ot Danum bible

KESAH RASUL-RASUL 21

¹Ihkai kopisah umba okon-okon ukup tahkan Epesus rih, pongohino nohtahoh iro. Turus ihkai bolayar turus nokuh pulou Kos; tutang ngohkosoh ihkai johcokoh ang pulou Rodos. Tahkan anan ihkai bolayar turus nokuh polobuhan Patara.

²Ang Patara ihkai sombang kapal ijo kani nokuh Penisia. Mahka ihkai jahkat kapal rih turus hihkas

³tutang bolayar nyiring ihkai nohto pulou Siprus, ang sila komuloi 'kai; tahpi ihkai turus bolayar nitu Siria. Ihkai jahkat nokuh tana ang Tirus, tului ang anai kapal ijo ihkai hombohoh rih, ahkan polua puatoh.

⁴Ang unuk rih ihkai tulak masap ulun-ulun ijo porocaya umba Yesus, turus mohcon umba iro kotahin ihco minggu. Ngosan potunjuk tahkan Roh Pohotala iro nuhtui umba Paulus, mangat a'ai tulak nokuh Yerusalem.

⁵Tahpi ulijari umbot ohkotoh ihkai mohcon ang anan, ihkai nohtah iro tutang noturus ponyalan ihkai. Iro paringoh, honong anak oruhoh iro ngihtot johcok luar lowu. Ang anan ang saran kowang ihkai paring suhkuntu'ut tutang bodo'a.

⁶Uliorih ihkai hotabe, turus ihkai jahkat nokuh kapal, tutang iro ka buli nokuh lohpouoh.

⁷Ihkai bolayar turus tahkan Tirus johcok nokuh Ptolemais. Ang anan ihkai masap Konduang-konduang ijo porocaya Yesus, ahkan nonga tabe ahkan iro turus mohcon ihco ondou umba iro.

⁸ Hawunoh ihkai tulak hino, turus johcok ang Kaisarea. Ang anai ihkai tulak nokuh pomborihta ijo bogare Pilipus, turus mohcon ang lohpouoh. Io anai ihcobehti tahkan pihtu behti ijo konopili ang Yerusalem.

⁹Ohpat behti anak dalaoh jari tononga kodahpot bain Pohotala ahkan mborihta Kabar Hinut tahkan Pohotala.

¹⁰ Ulijari pira-pira kotahiu ihkai ang anan, lombut tahkan Yudea ihcobehti nabi ijo bogare Agabus.

¹¹Io lombut nokuh ihkai, turus ngomin pohtong kahang Paulus. Umba potong kahang rih, io mohtong pa'ai tutang longoi bongoi hawui nuhtui, ‘‘Tuhrih ijo tonuhtui bain Roh Pohotala: Tepun pohtong kahang tuh, ahkan ponohtong koloutuh ang Yerusalem, bain ulun-ulun Yahudi, tutang tonosarah ahkan ulun-ulun bohkon Yahudi.’’

¹²Kotihka ihkai ngonih orih, ihkai tutang paring konduang ijo mohcon ang Kaisarea rih, nyawot hawui paham umba Paulus, mangatoh ara tulak nokuh Yerusalem.

¹³Tahpi ia mutah, ‘‘Inon gunaioh Konduang-konduang nangih koloutuh, nyiring nguan ahtoi'ku lonyuh? Ahku ius sodia eam tihkas baya tonawan ang anan, tahpi ka'a ahkan mahtoi sinoka kotului Tuhan Yesus.’’

¹⁴Paulus eam kani ngonih tingak ihkai, mahka ihkai tondo ngohana io. ‘‘Nauhoh, konohuang Tuhan Pohotala bewe ijo nyolung,’’ hion 'kai.

¹⁵Ulijari mohcon ang anan pira-pira kotahiu, ihkai nahtap puat-puat hahtin ihkai, turus tulak nokuh Yerusalem.

¹⁶Pira-pira konduang tahkan Kaisarea tulak ka'a homboh umba ihkai ahkan ngitot ihkai nokuh lohpou Manason, tului ang lohpouoh ihkai ahkan mohcon. (Manason anai ihcobehti ulun Siprus ijo jari tahi monjadi murid Yesus.)

¹⁷Ohkot ihkai johcok ang Yerusalem, konduang-konduang ang anan noharang ihkai umba jorih ahtoi.

¹⁸Ngohkosoh Paulus tulak homboh ihkai masap Yakobus; tutang hawui paring okon-okon ukup ijo anai ang anan ka'a.

¹⁹Uli ngohawot solamat ahkan'ndo, Paulus nyorihta ahkan iro kokaro angihco ijo ius konuan Pohotala nguha io, ang louk ulun-ulun bohkon Yahudi.

²⁰Kotihka kami ngonih sorihta Paulus rih, iro paringoh monara Pohotala. Pongohino iro nuhtui umba Paulus, ‘‘Konduang Paulus! Konduang harus ta'an, ijo jari bokuhjan-kuhjan ulun Yahudi ijo porocaya ahkan Yesus. Iro paring tohkorih ulun-ulun ijo bokehtep numbun hukum Museh.

²¹Tutang huntuh iro ngonih ijo Konduang mongajar paring ulun Yahudi, ijo mohcon ang louk uhtus bohkon, mangat molopas hukum Museh. Konduang ningak iro, mangat iro a'ai nyunat anak-anak iro ata'ai numbun adat dasar Yahudi.

²²Huntuh ulun-ulun Yahudi ijo jari porocaya rih, puna ahkan ngonih, ijo Konduang jari anai ang ohtoi. Jadi, koloukuwoh huntuh?

²³ Kopiosoh numbun rih tingak ihkai. Anai ohpat behti ang ohtoi ijo jari nguan bowot ahkan Tuhan.

²⁴Olai, konohuangoh Konduang tulak nguan upacara morasih arop hombo-homboh umba iro, tutang nahkung ongkos'ndo, mangat bolau'ndo duon tonguting. Umba kodorih ahkan korinah bagi paring ulun, ijo inon ijo iro ngonih tohou Konduang eam morong, tului Konduang bongon ka numbun hukum Museh.

²⁵ Tahpi tohou ulun ijo bohkon uhtus Yahudi, ijo jari porocaya ahkan Tuhan Yesus, ihkai jari ngirim surat ahkan iro tutang koputusan ihkai ijo iro eam tou hino kuman ukun ijo jari tonyarah ahkan songiang, eam tou kuman daha, ata'ai kuman ohcin mahtoi mudar; tutang ara hino nguan-nguan ijo kihal.’’

²⁶Mahka Paulus tulak umba ko'ohpat behti rih, turus nguan upacara porasiharopoh, sama-sama iro ang ngohkosoh. Pongohuli iro nyolong Lohpou Tuhan ahkan mborihta pira-pira ondou hino, punan upacara porasih rih ohpah, tutang pononga bagi iro nyinong behti tonosarahoh.

²⁷Kotihka tihkas ohkot pihtu ondou rih doni umbot, pira-pira ulun Yahudi tahkan Asia nohto Paulus ang Lohpou Tuhan. Turus iro ngihit ulun aro, uliorih nawan Paulus

²⁸hawui ngoriak-ngoriak, ‘‘Oi ulun-ulun Israel dohop! Tuhrih uluioh ijo tulak ko umo-umoh mongajar ahkan paring ulun ajaran-ajaran ijo molawan uhtus Israel, molawan hukum Museh, tutang molawan Lohpou Tuhan tuh. Tutang huntuh io malah ngomin ulun-ulun bohkon Yahudi nyolung nokuh luwang Lohpou Tuhan tutang napa pali unuk ijo borasih tuh!’’ (

²⁹ Iro nuhtui kodorih tului iro jari nohto Trofimus ulun Epesus rih ang kota homboh Paulus; tutang iro ngohu Paulus jari ngomin io nokuh Lohpou Tuhan.)

³⁰Soup lowu monjadi boho-bombo tutang paring ulun nokoru puhpu-puhpung. Iro nawan Paulus tutang nunda io soluka tahkan Lohpou Tuhan. Ohkot rih ka'a bauntukang Lohpou Tuhan konahtop.

³¹Pondehan korusuh-korusuh rih ngurah jalan munu Paulus, ulun mborihta ahkan komandan kawan sorodadu Ruma ijo soup Yerusalem rahat rusuh.

³²Hunrih ka'a komandan ngomin pira-pira porowira tutang sorodadu turus jele-jeleng tulak hawui iro nokuh unuk porusuh rih. Aang ohkot ulun aro rih nohto komandan rih honong kawan sorodaduoh iro tondo matu Paulus.

³³Komandan rih tulak nokuh Paulus turus nawan io, tutang nyuhu ulun manga io. Pongohuli komandan rih ngisok, tohou iai Paulus rih, inon ijo jari konuaioh.

³⁴Tongai tahkan ulun aro rih, mutah koloutuh, anai mutah kolourih. Koada'an kolourih deroh, nyiring komandan rih eam tou ta'an inon kotu'uioh ijo jari nyolung. Bain tului rih io moretah mangat Paulus omin nokuh markas.

³⁵Kotihka iro ngomin io johcok nokuh tangga, porusuh-porusuh rih, ngomuk kodorih konyangitoh nyiring Paulus harus konohtun bain sorodadu-sorodadu.

³⁶Iro tongohasu tahkan lihkut bain ulun porusuh-porusuh rih, hawui ngoriak-ngombak, ‘‘Munu io!’’

³⁷Kodorih kani nyolong ahkan luwang markas, Paulus nuhtui umba komandan rih, ‘‘Touleh ahku nuhtui honjulu umba Tuan?’’ ‘‘Kuwoh ihko tou bahasa Yunani?’’ hion komandan rih.

³⁸‘‘Amat kodorih, ihko eam ulun Misir rih ijo soun ondou napa borotak ngomin buhou ohpat kujan ulun nguan korusuh bosonjata nyolong padang balambah?’’

³⁹Paulus mutah, ‘‘Ahku ulun Yahudi; ahku warga kota Tarsus, kota ijo mombahtang ang Kilikia. Nonga ahkak'ku poromisi pander umba ulun-ulun atuh.’’

⁴⁰Mahka uli Paulus tononga poromisi pander, Paulus tombok ang lapathejan turus nonga tanda umba longoioh. Paring ulun uras benyem. Pongohuli Paulus hopander umba iro hapan bahasa Ibrani. Paulus nuhtui,