Read Ot Danum KESAH RASUL-RASUL 22 Bible Online

KESAH RASUL-RASUL 22 - Ot Danum bible

KESAH RASUL-RASUL 22

¹‘‘Amai-Amai tutang Konduang-konduang paringoh! Ahku ahkan nonga bela'ku ahkan ihkam. Cuba ngonih houn!’’

²Kotihka iro ngonih Paulus hopander ang bahasa Ibrani iro labih tonih samasino. Mahka Paulus noturus panderoh.

³ ‘‘Ahku tuh ulun uhtus Yahudi,’’ hion Paulus, ‘‘ahku konanak ang Tarsus ang tana Kilikia. Tahpi ahku konohajo ang ohtoi ang Yerusalem tutang sokula honong cermat bain guru hajo Gamaliel aang hukum ijo ius tononga Museh ahkan tahtu ajuh ihto. Sama kolou Konduang-konduang paringoh ang ohtoi ondou tuh, ahku ka paham giat ahkan Pohotala.

⁴ Ahku ngoporos-ngosingon nyiring mahtoi murid-murid ajaran bohua orih. Iro paringoh, pios bahkas olu bawi, ahku nawan tutang posolong iro nokuh luwang sipir.

⁵Imam hajo bongoi, tutang soup Majelis Agama dahpot nonga kosaksian ijo ahku puna eam bobalik. Tului iro orihrih ijo jari nonga ahkak'ku surat kotorangan ijo tonitu ulun-ulun Yahudi ang Damaskus. Tului surat rih ahku dahpot nawan ang anan, ulun-ulun ijo porocaya umba ajar orih tutang ngomin iro nokuh Yerusalem ahkan'ndo tonohukum.’’

⁶‘‘Ohkot ahku rahat aang beteng jalan tutang nyiring johcok ang Damaskus, ohkot tohun ondou, ihco koloang ijo tarang solonga ngorolondang tahkan langit ang kodiling ahku.

⁷Ahku botahak nokuh tana, turus ahku ngonih ihco auh nuhtui umba ahku, ‘Saulus! Saulus! Ombai ihko ngosingon Ahku?’

⁸Turus ahku ngisok, ‘Iai Ihko, Tuan?’ ‘Ahku Yesus ulun Nasaret rih, ijo ihko ngosingoioh,’ hioioh.

⁹Ulun-ulun ijo anai ang anan ijo homboh ahku nohto koloang rih tahpi iro eam ngonih auh ijo hopander umba ahku.

¹⁰Turus ahku ngisok hino, ‘Ahku harus nguan inon Tuhan?’ Tuhan Yesus mutah, ‘Kuatrih tutang nyolong lowu Damaskus. Ang anan noin ihko ahkan duon borihta tohou paring ijo Pohotala kani nyuhu ihko nguai.’

¹¹Ahku nyolung bobulen tului koloang ijo monyilou mahtak'ku. Jari jolahak-jolahak'ku niting ahku nyalan nokuh lowu Damaskus.

¹²Ang anan tohko ihcobehti bogare Ananias. Io ihcobehti ijo borasih tutang tuhit molalus hukum Museh. Paring ulun Yahudi ijo mohcon ang Damaskus uras hormat umba io.

¹³Io lombut masap ahku, turus tombok ang doni ahku, hawui nuhtui, ‘Konduang Saulus, pahtut ihko nopahjah huli!’ Ohkot io nuhtui kodorih ka'a, ahku ngahtang bouk'ku turus duon nohto io.

¹⁴Pongohuli io nuhtui ahkak'ku, ‘Pohotalan tahtu ajuh ihto, mitih ihko, mangat ihko kota'an konohuang-Oh, tutang nohto Yesus; Jihpon Pohotala orih ijo nguan konohuang Pohotala hawui ngonih auh tuhtui Yesus bongoi.

¹⁵Ihko ahkan monjadi saksi, tutang momborihta ahkan paring ulun, inon ijo ihko jari nohto tutang ngonih.

¹⁶Huntuh, ara hino ngindoi dalou tahi. Kuatrih, tombok tutang tongarih arop'mu ponopondus. Na'ahrih umba Tuhan mangat ihko liwus tahkan dusa-dusa'mu.’ ’’

¹⁷‘‘Ahku hoduli nokuh Yerusalem tutang kotihka ahku uhun bodo'a ang Lohpou Tuhan, ahku konowasa Roh Pohotala.

¹⁸Ahku nohto Tuhan; Io pander umba ahku, ‘Jele-jeleng nohtah Yerusalem, tului aro-ulun ang ohtoi eam kani norima kosaksian'kam tohou Ahku.’

¹⁹Ahku nuhtui, ‘Tuhan iro kota'an tu'u ijo ahku jari nyolong lohpou-lohpou sombayang ahkan nawan iro tutang mahcat ulun-ulun ijo porocaya umba Tuhan.

²⁰ Kodorih ka'a kotihka saksi Tuhan, Stepanus rih iro mopahtoi, ahku bongok anai ang anan tutang jorih gawi munu rih. Malah ahku ijo ngindoi hahtin ulun-ulun ijo munu Stepanus.’

²¹Tahpi Tuhan nuhtui hino umba ahku, ‘Tulakrih iou, tului Ahku ahkan nyuhu ihko tulak nokuh unuk ijo mahcu ahkan ulun-ulun bohkon uhtus Yahudi.’ ’’

²²Ulun-ulun magun toturus ngonihoh Paulus pander, tahpi ang kalimat auhoh ijo laiuoh iro ngoriak somuhing-muhingoh, ‘‘Munu ih ulun ijo kolou orih. Io eam pahtut bolum!’’

²³Sambir ngoriak, iro hoburup jubah'ndo tutang morawuh korawu tana nokuh diang.

²⁴Mahka komandan tutang kawansorodadu Ruma rih, nyuhu Paulus tonomin nokuh luwang markas, mangat io tomoriksa ang anan hawui paksa mangat iro ngota'an, tului inon ulun-ulun Yahudi ngoriak kodorih toharep io.

²⁵Tahpi ohkot Paulus jari ponohtong ahkan ponahcat. Paulus nuhtui umba komandan ijo tombok doni anan, ‘‘Inonrih punatoukah ponahcat ihcobehti warga kelahcan Ruma soun umba io ponosara?’’

²⁶Ngonih orih porowira rih tulak nokuh komandan sorodadu turus nuhtui, ‘‘Inon tuh ijo ahkan Amai nyuhu nguaioh?’’ hion'ndo, ‘‘ulun rih warga nogara Ruma!’’

²⁷Mahka komandan ponokawan rih tulak nokuh Paulus hawui ngisok, ‘‘Cuba nyorihta ahkak'ku, inon ihko warga nogara Ruma!’’ ‘‘Yo,’’ hion Paulus, ‘‘ahku warga nogara Ruma.’’

²⁸Komandan rih nuhtui hino, ‘‘Ahku monjadi warga nogara Ruma umba mbayar aro samasino!’’ Paulus mutah, ‘‘Tahpi ahku konanak kolou ulun warga nogara Ruma.’’

²⁹Wayah rih ka'a kawan-kawan sorodadu ijo kani moriksa Paulus rih balang, tutang komandan rih ka nyolung mihkoh tului io jari manga Paulus, padahal Paulus warga nogara Ruma.

³⁰Komandan ponokawan Ruma rih jolik samasino ngota'an inon kotu'ui ijo kotuluioh ulun-ulun Yahudi nosalan Paulus. Bain tului rih, ngohkosoh komandan na'ah imam-imam kopala, tutang Majelis Agama, mangat iro hopuhpung. Turus Paulus konoliwus tahkan pangaoh, pongohuli omin noharep iro paring.