Read Ot Danum KESAH RASUL-RASUL 23 Bible Online

KESAH RASUL-RASUL 23 - Ot Danum bible

KESAH RASUL-RASUL 23

¹Paulus notuneng okon-okon majelis rih, turus io nuhtui, ‘‘Konduang-konduang'ku! Nyiring ang ondou tuh, ahku eam komo bosala umba Pohotala, ang luwang ahtoi bua'ku, tohou pombolum'ku.’’

²Ohkot Paulus nuhtui kolourih, Imam Hajo Ananias nyuhu ulun ijo tombok doni umba Paulus nehpak baun Paulus.

³ Mahka Paulus nuhtui umba imam hajo rih, ‘‘Pohotala noin nehpak ihko, ulun holi'ou ijo pura-pura borasih! Ihko tuot ang anan mosara ahku numbun hukum Museh, podahal ihko bongom ijo molanggar hukum rih, hawui nyuhu ulun nehpak ahku!’’

⁴Ulun-ulun ang bambai Paulus nuhtui umba Paulus, ‘‘Ihko ngonja'at imam hajo Pohotala!’’

⁵ Paulus mutah, ‘‘Oh ahku eam ngosono. Konduang-konduang ijo io imam hajo. Puna tu'u ang Surat Borasih anai tonyurat, ‘A'ai ihko ngonja'at okon uhtus'kam.’ ’’

⁶ Paulus nohto ijo ihcokobarih tahkan anggota-anggota majelis rih tahkan ulun Saduki tutang anai ihcokobarih hino tahkan ulun Parisi. Tului orih io hopander umba majelis rih, ‘‘Ihkam Konduang-konduang! Ahku ihcobehti ulun Parisi, ahku uhtus Parisi. Ahku ponosara ang ohtoi bain tului ahku porocaya, ijo ulun-ulun mahtoi ahkan bolum huli.’’

⁷Kotihka io nuhtui kodorih, ulun-ulun Parisi tutang ulun-ulun Saduki rih nopara hokolawan, nyiring puhpung'ndo rih bobolah monjadi duo kobarih. (

⁸ Tului ulun-ulun Saduki niruk, ijo ulun mahtoi eam ahkan bolum hino, ijo molehkat eam aro, tutang roh-roh ka'a eam aro; tahpi ulun Parisi porocaya ahkan anaioh paringoh orih.)

⁹Mahka lombutrih keridu ijo paham, pira-pira ulun Parisi ijo monjadi guru agama tombok homboh molawan tu'u-tu'u. Iro nuhtui, ‘‘Numbun ihkai ulun tuh eam aro kosalai honjiot ka! Mihkoh puna anai Roh ata'ai Molehkat ijo mander ahkaioh!’’

¹⁰Koboho orih rih monjadi kodorih pahamoh, nyiring komandan pasukan Ruma rih mihkoh jaka Paulus ahkan konorubut bain'ndo. Jadi io nyuhu karon-sorodaduoh rih tulak ngomin Paulus tahkan tohun ulun-ulun rih tutang ngomin io mosuhukoh ang markas.

¹¹Ngolomi pongooh Tuhan Yesus tombok ang silan Paulus tutang nuhtui, ‘‘Ngoba'asoh ahtoi'mu! Ihko jari nonga kosaksian tohou Ahku ang Yerusalem. Ihko noin pahtut bosaksi ka'a ang Ruma.’’

¹²Homboh-ngohkos ang-ngohkos ondouoh ulun-ulun Yahudi nopara nguan haumpahkat, monulut eam ahkan kuman tutang ngorih amat iro jaha munu Paulus.

¹³Anai labih tahkan ohpat pulu behti ijo nguan haumpahkat rih.

¹⁴Iro tulak nokuh imam-imam kopala tutang okon-okon Yahudi hawui nuhtui, ‘‘Ihkai jari nulut-arop sama-sama, eam ahkan kuman, ngorih, ino-inon amat ihkai jaha munu Paulus rih.

¹⁵Nah, huntuh Konduang-konduang honong anggota-anggota Majelis Agama, hondakoh ngirim surat ahkan komandan pasukan Ruma rih, ahkan nyawot io ngomin Paulus huli noharep ihkam, jahka kolou-kolouoh ihkam kani moriksa hino porokaraoh honong labih tolihti. Tutang ihkai sodia ahkan munu io, houn io johcok ang ohtoi.’’

¹⁶Tahpi anai anak tahkan konduang ijo bawi Paulus, ngonih rancana pahkat orih rih. Mahka io tulak nokuh markas sorodadu Ruma, hawui nyorihta pahkat ulun rih ahkan Paulus.

¹⁷Mahka Paulus na'ah ihcobehti porowira hawui nuhtui, ‘‘Omin anak-inyam tuh nokuh komandan; io kani nyorihta aangihco ahkaioh.’’

¹⁸Porowira rih ngitot anak-inyam rih, noharep komandan honong nuhtui, ‘‘Paulus, ulun tohanan rih na'ah ahku, tutang nyawot ahku ngitot anak-inyam tuh nokuh Amai; io kani nyorihta aangihco.’’

¹⁹Komandan rih nambit longon anak-inyam orih, turus ngomin io bongoi, nokuh saro tutang ngisok io, ‘‘Ihko kani nyorihta inon umba ahku?’’

²⁰Anak-inyam rih mutah, ‘‘Ulun-ulun Yahudi jari haumpahkat ahkan nyawot Tuan ngomin Paulus noharep Majelis Agama hawun, kolo-kolou iro kani mosara hino porokara Paulus honong labih tolihti.

²¹Tahpi ararih Tuan numbun konohuang'ndo, tului anai labih tahkan ohpat pulu behti ijo rahat mosuhuk ahkan ngipa io ang jalan. Iro paringoh jari nulut-aropoh eam ahkan kuman ngorih, amat iro jaha munu Paulus. Uhuntuh ka iro jari sodia mohcon ngindoi auh putah Tuan ih.’’

²²Komandan rih nuhtui, ‘‘Ara nyorihta ahkan iai ka ijo ihko jari mborihta rih ahkak'ku.’’ Turus komandan rih nyuhu anak-inyam rih buli.

²³Pongohuli komandan rih na'ah duo behti porowira, turus io nuhtui umba iro, ‘‘Nyodia duo rahtus sorodadu, homboh pihtu pulu sorodadu hapa kuda tutang duo rahtus sorodadu hapa lunju, ahkan tulak jam sioi ngolomi tuh ka'a nokuh Kaisarea.

²⁴Nahtap ka'a kuda ahkan tonunggang Paulus tutang ngitot io honong solamat johcok ahkan Gubernur Pelik.’’

²⁵Turus komandan rih nyurat surat ijo auh koloutuh, hioi,

²⁶‘‘Ijo Horomat Gubernur Pelik. Tabe tahkan Klaudius Lisias!

²⁷Ulun tuh ius tonawan bain ulun-ulun Yahudi tutang manyou ih iro tomunuoh, amat ahku eam lombut umba kawan sorodadu tutang monyolamat io; tului ahku ngonih ijo io warga nogara Ruma.

²⁸Tului ahku jolik ngota'an inon kotu'uioh kosala'an ijo iro ndawaoh ahkaioh. Mahka ahku ngomin io nokuh majelis agama iro.

²⁹Korinah io eam nguan angihco ka ijo io kona hukum tutang hukum munu ata'ai nyipir. Dawa iro ahkaioh tihkas hotitu tohou hukum-hukum agaman'ndo bongoi.

³⁰Pongohuli ahku, tonyorihta ijo anai pahkat ja'at, tahkan ulun-ulun Yahudi toharep io. Jadi toturus ahku ngihtot io nokuh Tuan Gubernur. Tutang ahku jari nyuhu iro dolang pondawaoh ngomin pongaduan'ndo toharepoh ahkan Tuan.’’

³¹Mahka kawan-kawan sorodadu rih molalus gawin iro. Iro ngitot Paulus turus ngomin io ngolomi rih johcok Antipatris.

³²Hawunoh iro mohonouoh posukan hapakuda ijo noturus ponyolanan honong Paulus, tutang iro bongon buli nokuh markas.

³³Kotihka posukan hapakuda rih johcok ang Kaisarea, iro nonga surat rih ahkan gubernur, turus nyarah Paulus ahkaioh.

³⁴Ulimba gubernur rih mbasa surat orih, io ngisok umba Paulus tahkan umoh asaroh. Kotihka io ta'an Paulus asaroh tahkan Kilikia,

³⁵io nuhtui, ‘‘Piosrih! Ahku ahkan moriksa porokara'mu, amatmira ulun-ulun ijo ngadu ihko jari johcok ang ohtoi.’’ Turus io momoretah mangat Paulus tonahan ang luwang istana Horodes.