Read Ot Danum KESAH RASUL-RASUL 24 Bible Online

KESAH RASUL-RASUL 24 - Ot Danum bible

KESAH RASUL-RASUL 24

¹Limo ondou pongohuli Imam Hajo Ananias tutang okon-okon ulun Yahudi tulak nokuh Kaisarea, homboh ihcobehti ponosehat hukum ijo bogare Tertulus. Iro noharep Gubernur Pelik tutang monyapai pongaduan iro nitu Paulus.

²Kotihka Tertulus tona'ah kobaun nuduh Paulus koloutuh, ‘‘Tuan Gubernur ijo Horomat! Aang pinda poretah Tuan lowun ihkai pios tentram. Tutang ang ngosan kopiosbosara Tuan ka jari aro nguan komorong ijo tonolalus ahkan uhtus ihkai.

³Paringoh rih ihkai nyambut toturus hawui norimakasih tutang moregaoh ijo soisung-isungoh tu'u-tu'u, ang umoh ka ka'a.

⁴Tahpi mangat ara dian aro ohkot Tuan, ahku nyawot umba Tuan, ngonih dawa ihkai ijo liwak tuh.

⁵Ihkai nyombang ulun tuh porusuh ijo morusak. Ang amo-amoh io mopolombut kokihcuh ang louk ulun-ulun Yahudi, tutang io monjadi okon gerakan ulun-ulun Nasaret.

⁶Io malah jari mocuba nguan kopali ang Lohpou Tuhan, tahpi ihkai nawan io. [Ihkai nohuang mosara io numbun hukum agaman ihkai bongon.

⁷Tahpi komandan Lisias ngorabutoh tahkan ihkai,

⁸tutang moretah mangat pongadu-pongadu noharep Tuan.] Amat Tuan moriksa ulun tuh, Tuan bongon ahkan ngonih tahkan io, komorong tahkan paringoh ijo ihkai ngaduoh tuh tohimo io.’’

⁹Ulun-ulun Yahudi ijo anai ang anan ka'a umba ndawa Paulus tutang ngomorong paring ijo tonuhtui bain Tertulus.

¹⁰Turus gubernur rih nonga tanda ahkan Paulus ijo io tou hopander. Mahka Paulus nuhtui, ‘‘Ahku kota'an ijo Tuan jari monjadi hakim lowu tuh botoun-toun kotahiuoh. Orih tului ahku komo sanang nyapai mombela arop'ku tuh ahkan toharep Tuan.

¹¹Tuan duon nolihti bongon, ijo eam labih tahkan duo balas ondou ijo houn ahku tulak nokuh Yerusalem ahkan sombayang.

¹²Tutang eam pu'u ulun-ulun Yahudi rih nyombang ahku hokolawan umba ihcobehti ka, ata'ai muhpung ulun ahkan nguan kokihcuh, pios ang Lohpou Tuhan oluka ang lohpou-lohpou sombayang ata'ai amo-amoh iou ang luwang lowu.

¹³Iro ka mahi eam duon mombukti dawa-dawaoh ijo iro nyapaioh ahkan Tuan toharep ahku.

¹⁴Puna ahku harus mongahkuoh umba Tuan, ijo ahku nyembah Pohotala tahtu ajuh ihkai numbun ajaran Yesus ijo iro ngohuoh sala. Tahpi ahku magun porocaya ahkan paringoh ijo tonyurat ang luwang Buhku Museh tutang Buhku Nabi-nabi.

¹⁵Sama kolou iro, ahku ka'a anaingina koporocaya ahkan Pohotala, ijo paring ulun ahkan bolum hoduli, ulijari mahtoi — ulun-ulun morong, oluka ulun-ulun ja'at!

¹⁶Orih kotuluioh, ahku toturus ngurahjalan ijo somoro-morongoh, mangat ahtoi bua aik'ku borasih, tohimo Pohotala tutang borasih toharep kolunon.

¹⁷ Ulijari pira-pira toun eam anai ang Yerusalem, ahku huli nokuh anan, turus ngihtot duit pondohop ahkan uhtus'ku tutang ahkan nonga porahpah ahkan Pohotala.

¹⁸Aang ohkot ahku rahat nguan orih, iro nyombang ahku ang Lohpou Tuhan, ulimba ahku ngopah upacara-upacara porasih arop. Eam anai ulun aro homboh ahku, tutang eam anai ka'a kokihcuh ang anan ang ohkot rih.

¹⁹Tihkas anai pira-pira ulun Yahudi ang anan tahkan Propinsi Asia. Iro rih ijo soharusoh anai ang anan ahkan nonga pongaduan iro ahkan Tuan, amat iro anai aangihco pongaduan nohimo ahku.

²⁰Ata'ai, nauhoh ulun-ulun rih bongoi monyaksi koja'at inon ijo iro sombangoh aang ahku kotihka ahku potohimo iro ang Majelis Agama.

²¹ Iro monyombang baya kalimat ijo ihco tuh iou, ijo ahku nuhtuioh ang toharep iro, iorih kalimat tuh: Ahku ponosara ondou tuh, bain kotului ahku porocaya ijo ulun-ulun mahtoi ahkan ponombolum huli.’’

²²Turus Pelik ijo kota'an aro tohou ajaran Yesus nuhtup puhpung porokara tuh, ‘‘Ahku ahkan muhtus porokara tuh,’’ hion Pelik, ‘‘amat komandan Lisias jari lombut.’’

²³Turus Pelik nonga poretah ahkan porowira ijo botanggung-jawab tohimo Paulus rih, mangat tehtep nahan Paulus, tahpi sambir ka'a nonga honjiot kosoruah ahkaioh. Tutang nonga ijin ahkan injah-injahoh nonga ahkai, inon ijo io poruluoh.

²⁴Pira-pira ondou pongohuli Pelik lombut, homboh umba oruhoh ijo bogare Drosila; io ijobehti Yahudi. Turus Pelik nyuhu ulun ngomin Paulus, pongohino Pelik ngonih Paulus nuhtui tohou porocaya umba Yesus Kristus.

²⁵Tahpi kotihka Paulus noturus panderoh tohou komorong, tutang tahan kojolikbolai, tutang tohou hukum ang Ondou Kiamat, mahka Pelik monjadi paham mihkoh turus nuhtui, ‘‘Ihko tou tulak huntuh. Ahku ahkan na'ah ihko hino amat anai kosapet.’’

²⁶Pondehan rih Pelik moharap ahkan duon duit tahkan Paulus. Orih kotuluioh io pira-pira tikat nyuhu ulun ngomin Paulus mangat hopander umba io.

²⁷Ulijari duo toun kotahiu Perkius Festus ngati Pelik monjadi gubernur. Tutang tului Pelik kani ngomin ahtoi ulun Yahudi, io mohonou Paulus mohcon ang luwang sipir.