Read Ot Danum KESAH RASUL-RASUL 25 Bible Online

KESAH RASUL-RASUL 25 - Ot Danum bible

KESAH RASUL-RASUL 25

¹Tolu ondou ulimba Festus johcok ang tana rih io tulak tahkan Kaisarea nokuh Yerusalem.

²Ang anan imam-imam kopala tutang okon-okon ulun Yahudi nyurung ahkaioh pongaduan'ndo toharep Paulus. Iro toturus iou ngotou Festus,

³mangat ngosan kopios ahtoioh umba iro, io kani nyuhu ulun ngomin Paulus nokuh Yerusalem; Tului iro jari hopahkat ahkan munu io ang beteng jalan.

⁴Festus mutah, ‘‘Paulus uhun tonahan ang Kaisarea; tutang ahku bongok ka eam tahi hino ahkan buli.

⁵Jadi, nauhoh ulun-ulun bosewut ang louk ihkam tulak homboh ahku nokuh Kaisarea tutang moporokara io ang anan, amat puna io jari nguan aang'co kosalan.’’

⁶Ulijari mohcon ang Yerusalem kira-kira jolu ata'ai sopulu ondou hino, Festus buli ahkan Kaisarea. Hawonoh io nguan puhpung bosara tutang momoretah mangat Paulus noharep.

⁷Kotihka Paulus johcok, ulun-ulun Yahudi ijo jari lombut tahkan Yerusalem tombok ang kodiling io, tutang nopara nyurung kadu-kadu ijo bahat toharepoh. Tahpi iro eam duon nongabukti kadu-kadu rih.

⁸Aang pombelaoh, Paulus nuhtui, ‘‘Ahku eam nguan aangihco ka ijo sala toharep hukum Museh ata'ai toharep Lohpou Tuhan ata'ai ka toharep Kaisar Ruma.’’

⁹Tahpi Festus kani ngoto'u ahtoi ulun Yahudi. Maka io ngisok umba Paulus, ‘‘Kanirih ihko tulak nokuh Yerusalem mangat ponosara ang anan ang toharep ahku tohou kadun-kadun iro rih?’’

¹⁰Paulus mutah, ‘‘Ahku rahat tombok ang toharep Majelis Kaisar Ruma; tutang ang unuk orih ahku harus ponosara. Tuan bongon kota'an, ijo ahku eam bosala toharep ulun Yahudi.

¹¹Amat ahku jari molanggar hukum tutang nguan aangihco ijo harus tomohukum umba hukum mahtoi, ahku sodia mahtoi. Tahpi amat kadun-kadun iro eam morong eam ihcobehti ka tou nyarah ahku ahkan iro. Ahku nyawot tomosara ang balaibosara Kaisar!’’

¹²Ulijari hopahkat umba ponosehat-ponosehatoh, Festus nuhtui, ‘‘Ihko nyawot tomosara ang balaibosara Kaisar, jadi ihko harus tulak noharep Kaisar.’’

¹³Eam pira-pira kotahiu uliorih, Baginda Agripa tutang Barnike masap nokuh Kaisarea ahkan ngohawot solamat ahkan Festus.

¹⁴Ulijari iro anai pira-pira ondou ang anan, Festus nyorihta porokara Paulus ahkan Baginda Agripa. Festus nuhtui, ‘‘Anai ang ohtoi ihcobehti tohanan ijo tonohtah bain Pelik.

¹⁵Ohkot ahku anai ang Yerusalem, imam-imam kopala tutang okon-okon Yahudi nyurung kadun'ndo toharep ulun rih tutang nyawot umba ahku, mangat ahku momuatoh hukum ahkaioh.

¹⁶Tahpi ahku mutah ijo ulun Ruma eam tou tonyarah kodorih bewe, ihcobehti tonodawa ahkan tomohukum, amat ulun tonodawa rih, jaha hotohimo umba pondawa-ponodawaoh, tutang nonga kosapet tou mombela aropoh.

¹⁷Jadi ohkot iro lombut ahkanohtoi ahku eam ngindoi tahi-tahi. Hawunoh ahku turus napa puhpung bosara tutang moretah mangat ulun rih konomin noharep.

¹⁸Kotihka dolang pondawa rih tombok monyurung dawa'ndo, iro eam monyurung aangihco koja'atoh ka, kolou ijo ahku ngohuoh, iro ahkan nyurungoh.

¹⁹Iro baya hokobohkon paham umba io tohou agaman iro bongoi tutang tohou ihcobehti ijo bogare Yesus. Ulun orih jari mahtoi, tahpi Paulus mborihta ijo behtin Yesus rih jari bolum hoduli.

²⁰Tului rih ahku bingung tohou koloukuwoh ahku tou duon kotorangan-kotorangan tohou porokara orih, ahku ngisok umba Paulus inonrih io kani tulak nokuh Yerusalem tutang ponosara ang anan ngosan porokara rih.

²¹Tahpi Paulus nyawot naik banding; io nyawot mangat io tahtap ang ponjara nyiring porokaraoh tomuhtus bain Kaisar. Bain tului orih ahku moretahoh mangat io tonahan turus nyiring ahku duon kosapet ahkan ngirim io ahkan Kaisar.’’

²²Turus Agripa nuhtui umba Festus, ‘‘Ahku bongok ka jolik ngonih auh pander ulun orih.’’ ‘‘Hawun Tuan duon ngonihoh,’’ hion Festus.

²³Hawunoh Agripa tutang oruhoh Barnike lombut hapan pokahjan lahca. Iro nyolong nokuh ruang puhpung rih homboh umba okon-okon hajo angkatan parang tutang ulun-ulun basewut ang lowu rih. Ngosan poretah Festus, Paulus tonomin nyolong.

²⁴Turus Festus nuhtui, ‘‘Baginda Agripa tutang dolang pomasap! Ulun tuh jari tonondawa ahkak'ku, bain hopus uhtus Yahudi, pios ijo ang Yerusalem, oluka ijo ang ohtoi. Iro nutut tutang ngoriak-ngoriak ijo io eam pahtut tomohonou bolum.

²⁵Tahpi ahku eam aro nyombang aangihco ka ijo jari konuaioh ijo dahpot tonohukum umba hukum mahtoi. Tutang bain kotului io bongoi, jari nyawot porokaraoh ponosara aang balaibosara Kaisar, ahku jari nuhkas mangat ngirim io nokuh Kaisar.

²⁶Tahpi ahku eam dahpot aangihco kotorangan ijo tegas tohou aropoh mangat tonyurat luwang surat aik'ku ahkan Kaisar. Orih kotuluioh ahku potoharep io umba Tuan-tuan paringoh, pahtukoh sasino ahkan ijo tohoromat Baginda Agripa! Konohuang'ku iorih amat uli pomoriksa tuh anai bahan ahkak'ku unuk nyurat.

²⁷Tului numbun nanyam'ku eam rih anai unukoh ngirim ihcobehti tahanan amat eam aro umba surat ijo ngorinah kosalai-kosalaioh ijo tomondawaoh ahkaioh.’’