Read Ot Danum KESAH RASUL-RASUL 27 Bible Online

KESAH RASUL-RASUL 27 - Ot Danum bible

KESAH RASUL-RASUL 27

¹Uliius duonkopuhtusan ijo ihkai harus bolayar nokuh Italia, Paulus tutang pira-pira ulun tohanan ijo bohkon tonyarah ahkan Yulius, porowira posukan sorodadu Ruma ijo konohawot ‘‘Resimen Kaisar.’’

²Ihkai jahkat kapal ijo lombut tahkan Adramitium, pongohuli tulak homboh kapal rih, ijo ius sodia tulak bolayar nokuh polobuhan-polobuhan ang Propinsi Asia. Aristarkhus ihcobehti tahkan Makedonia ijo lombut tahkan Tesalonika, bolayar ka'a hombo-homboh ihkai.

³Ondouhawunoh ihkai johcok ang Sidon. Paulus tonojaga honong pios samasino bain Yulius. Io nongaijin masap injah-jolahanoh mangat iro nonga bohahtiu ijo porulu ahkan Paulus.

⁴Tahkan anan ihkai bolayar turus. Tului bain bohiu hokolawan umba titun kapal, ihkai bolayar nyurusaran pulou Siprus ijo tou ngolindung honjiot tahkan bahiu.

⁵Pongohino ihkai nyuru tohun laut ijo hopohoi umba Kilikia tutang Pamfilia turus johcok ang Mira ang lowu Likia.

⁶Ang anan Komandan Yulius rih ngonduon ihco kapal tahkan Aleksandria ijo kani bolayar nokuh Italia. Mahka io mindah ihkai nokuh kapal rih.

⁷Pira-pira ondou ihkai bolayar dandah tu'u tutang umba kobo'o, kojoriaioh ihkai johcok lowu Knidus. Pongohino tului bahiu magun ka'a ja'at, ihkai eam duon toturus bolayar nokuh titun asaroh. Mahka ihkai bolayar nokuh solahtan pulou Kreta nguha Tanjung Salmone mangat ang anan ihkai ngolindung tahkan bohiu.

⁸Honong kehke hurus ihkai bolayar nyorurui saran pulou rih, nyiring kojoriaioh ihkai johcok ang ihco unuk ijo bogare Polobuhan Bohinoi, eam mahcu tahkan lowu Lasea.

⁹Ang ohkot rih Ondou Pesta Hokobuah ulun Yahudi jari nyihing. Ihkai jari nihou aro ohkot, nyiring jari eam ohkotoh hino ahkan bolayar honong aman. Bain tului orih Paulus nonga tingak tuh umba iro,

¹⁰‘‘Konduang-konduang numbun nanyam aik'ku, anairih paham bohaya amat ihto bolayar toturus. Ihto ahkan nyuru korugi hajo, eam baya aang puatramun ihto tutang kapal ihto, tahpi hasong ihto ka muhitou nihou.’’

¹¹Tahpi Porowira Yulius rih labih porocaya ahkan pongomburi tutang kapten kapal tahkanumba auh-auh Paulus.

¹²Polobuhan ang anan puna eam pios bagi kapal-kapal ngindoi ang wayah sorongin. Bain tului orih paham aro anak kapal sotuju ahkan bolayar hino nohtah polobuhan rih, tului iro kani ngurah jalan johcok ang Peniks tutang mohcon ang anan kotahiu wayah sorongin. Peniks anairih polobuhan ang Kreta ijo noharep Barat Daya tutang Barat Laut.

¹³Aang ohkot rih bohiu solahtan mongius honong dandah. Mahka anak kapal ngohu iro ius duon bolayar hino. Jadi iro nguhut sauh bolayar nyorurui saran pulou Kreta.

¹⁴Tahpi eam tahi pongohino lombut bahiubolowut — iorih bahiu ijo konohawot bohiu Timur Laut — mombolowut tahkan diang tana,

¹⁵tutang napuh kapal ihkai rih. Bain tului orih eam harapan kapal bolayar nohusung bohiu, mahka ihkai bosarah bewe tutang mohonou kapal bohatung tonaput bohiu.

¹⁶Ihkai kolindung honjiot, kotihka ihkai nguha ang hila solahtan pulou Kauda ijo koik rih. Ang anan kehkehurus ihkai bohasir mongowasa sokoci kapal ihkai.

¹⁷Ulimba ius sokoci rih konahtang nokuh kapal, kapal rih bongon tongonahan honong ngahut hapa tali ijo ponohtong nyolu'ang kapal rih. Tului mihkoh sokarah ang isun baras Sirtis ijo tojah, layar ponosuluh, turus kapal tonohanou homboh bahiu.

¹⁸Bahiu turus ngamuk nyiring ngohkos ondouoh, puat kapal nopara tonyahkah nokuh luwang tasik.

¹⁹Ondou pongohino, anak-anak kapal rih, monyahkah hino pokahkas-pokahkas kapal nokuh lout umba longon ain iro bongoi.

²⁰Boondou-ondou kotahiu ihkai eam nohto mahtanondou tutang potion, tutang bohiu ka hototurus ngamuk. Kojoriai nihou koharapan ihkai ahkan duon solamat.

²¹Pira-pira ohkot kotahiuoh ulun-ulun rih eam kuman. Mahka Paulus kuat tombok ang tohun iro hawui nuhtui hioi, ‘‘Konduang-konduang! Amat ihkam jari numbun tingak aik soun, tutang eam tulak bolayar tahkan Kreta, ihto eam monyuru paring korusakoh tutang korugioh koloutuh.

²²Tahpi huntuh ka ahku nyawot honong paham, mangat ihkam hajo ahtoi. Eam ihcobehti ka tahkan Konduang ijo ahkan mahtoi; ihto ahkan nihou tihkas kapal tuh bewe.

²³Tului ngolomi nanai molehkat tahkan Pohotala ijo ahku nyembah, iorih Pohotala ijo tepun ahku, lombut nokuh ahku.

²⁴Molehkat rih nuhtui, ‘Ara mihkoh Paulus! Tului ihko ahkan noharep Kaisar. Tutang ngosan komorong ahtoi Pohotala ahkan'mu, paring ulun ijo bolayar homboh ihko, uras solamat kotului ihko.’

²⁵Bain tului orih, Konduang-konduang, kohondakoh Konduang hajo ahtoi! Tului ahku porocaya umba Pohotala ijo paringoh ahkan nyolung kolou ijo tonuhtui-Oh ahkak'ku.

²⁶Tahpi ihto ahkan sokarah noin ang saran ihco pulou.’’

²⁷Ang ngolomi ijo ko-ohpat balasoh ihkai rahat hanyu-hanyut ang tasik Adria. Kira-kira tohun ngolomi anak kapal komo kapal rahat ngondoni sarantana.

²⁸Jadi iro nguluh tali tuga, ahkan nihpong kondalom tasik rih. Ngota'an unuk rih nyiring ohpat pulu meter kondalomoh. Eam tahi uliorih iro nugaoh hino, turus ngondahpotoh laut ang unuk rih doni tolun pulu meter kondalomoh.

²⁹Iro mihkoh kapal ahkan sokarah ang bahtu karang jadi iro mosuluh ohpat kobawak sauh tahkan hila komburi kapal turus moharapoh amat tou jele-jeleng ondousawah.

³⁰Toni-tonih dolang anak kapal moncoba buhou tahkan kapal rih. Iro mosuluh sokoci nokuh danum, tutang nguan kolo-kolou kani posuluh sauh tahkan holuan kapal.

³¹Tahpi Paulus nuhtui umba porowira tutang sorodadu-sorodadu ijo ang kapal rih, ‘‘Amat anak kapal tuh eam mohcon ang kapal, Konduang-konduang paringoh eam duon solamat.’’

³²Bain tului orih sorodadu-sorodadu rih nohtok huruk sokoci rih nyiring sokoci rih opah hanyut.

³³Ang ohkot jaha boloang Paulus, ngahtuh ahkan iro paringoh kuman. Paulus nuhtui, ‘‘Jari ohpat balas ondou kotahiu Konduang paringoh tihkas ngindo-ngindoi iou aang koada'an ngoli, tutang eam kuman ino-inon.

³⁴Ahku nganjuroh, kuman iou honjiot. Orih pios ahkan ihkam, mangat ihkam borigas huli. Tului Konduang paringoh ahkan solamat tutang eam aro tahpas ino-inon.’’

³⁵Uli nuhtui kodorih rih Paulus ngomin luhte turus nuhtui torimakasih ahkan Tuhan ang boun iro paringoh. Pongohino io mombagi-bagi luhte rih umba longoioh, turus iro kumaioh.

³⁶Mahka uli kuman iro paring komo korigas hoduli tutang umba kuman ka'a.

³⁷Paring ijo anai ang kapal rih, anai duo rahtus pihtu pulu onom behti.

³⁸Uli iro kuman nyiring bosuh, iro nyahkah puat gandum nokuh tasik mangat kapal orih rih mohian.

³⁹Ohkot ondou jari hondou, anak kapal nohto diangtana, tahpi iro eam ngota'an diangtana umoh rih. Iro nohto ijo toluk hawui banutoh. Jadi iro kani nondo kapaloh ang anan amat duon.

⁴⁰Mahka talin-talin sauh opah tonohtok iro, mohonou lohtong ang tasik. Sorurui umba rih ka'a iro nguwat tali ijo ngahut komuri-komuri. Pongohino iro mbirang layar ang hila urung kapal mangat bohiu nahpi kapal rih miar nokuh saro.

⁴¹Tahpi kapal rih sokarah busung baras. Hila urungoh sokarah tutang eam duon hogerek, rahat hila laiuoh bokahkas tonapuh riak ijo karas.

⁴²Sorodadu-sorodadu ang kapal rih boniat kani munu paring ulun tohanan, tului iro mihkoh ara-ara anai ijo nangui nokuh isun tana turus nokoru.

⁴³Tahpi Komandan rih mbalang niat iro rih, tului io kani nyolamat Paulus. Io nyuhu paring ulun ijo duon nangui sohowu soun, tutang nangui nokuh saran kowang;

⁴⁴ijo bohkon bohkonoh uras ngohasu, tutang nambit ang pahpan-pahpan ata'ai sipak kapal rih. Umba jalan orih ihkai paring solamat johcok ahkan diangtana.