Read Ot Danum KESAH RASUL-RASUL 28 Bible Online

KESAH RASUL-RASUL 28 - Ot Danum bible

KESAH RASUL-RASUL 28

¹Uli nohkatkowang honong solamat, punan ihkai ngota'an ijo pulou rih bogare Malta.

²Ponduduk pulou orih paham bojenta toharep ihkai. Iro noharang ihkai paringoh hawui pios, tutang nohun baho ahkan 'kai, tului jari nopara mosuluh uhjan, tutang bahiu paham sorongin.

³Paulus nipun kahju, tutang nyahkah kahju-kahju rih nokuh ang luwang baho rih. Uhun io nguan hal orih ihcokungan lohi bolua tului lasut baho rih turus nunduk longoioh.

⁴Kotihka ulun-ulun ijo mohcon ang pulou rih nohto lohi rih nguling longon Paulus, iro hopander sama arop'ndo, ‘‘Ulun tuh kopunaoh pomunu, tului oluka io luhput tahkan tasik, Dewi Koadilan eam mohonou io bolum.’’

⁵Tahpi Paulus hobirik lohi rih nokuh luwang baho, tutang eam aro komo poros honjiot ka.

⁶Iro niruk honjulu hino longon Paulus ahkan loting ata'ai solenga io ahkan bolukang mahtoi. Tahpi ulijadi ngindoi pira-pira kotahiuoh tutang eam anai aangihco luar biasa, turus iro nuhtui ijo Paulus anairih Dewa.

⁷Eam mahcu tahkan unuk rih, anai tana ain Publius, pongowasa pahtukoh ang pulou rih. Honong bojenta ahtoi io noharang ihkai kolou pongasapoh kotahin tolu ondou.

⁸Aang ohkot rih, amaioh rahat mondam tutang mani daha. Paulus tulak njonguk amaioh ijo mondam rih, turus bodo'a tutang nginaoh longoi nokuh ngosanoh, nyiring io pios.

⁹Tului kojodian orih, paring ulun ijo poros ang pulou rih lombut nokuh Paulus, tutang iro tongopiosoh.

¹⁰Iro nongaoh ahkan ihkai aro pononga, tutang kotihka ihkai kani bolayar, iro ngihtot nokuh kapal paring ijo ihkai poruluoh, ahkan ponyalan ihkai.

¹¹Uli tolu bulan ang anan, ihkai tulak tahkan pulou rih, jahkat ihco kapal ijo tahkan Aleksandria ijo kotahin musim sorongin botahan ang pulou rih. Kapal rih hapa lambang, ‘‘Dewa Kembar Kastor tutang Poluks.’’

¹²Ihkai tondo ang kohta Sirakusa tutang mohcon ang anan tolu ondou.

¹³Tahkan anan ihkai bolayar hino nyorurui saran pahtai Italia johcok ang kohta Regium. Hawunoh bohiu noparanahpi tahkan solahtan, nyiring a'ang duo ondou ihkai johcok ang lowu Putioli.

¹⁴Ang anan ihkai hosombang umba pira-pira ulun ijo jari porocaya umba Tuhan Yesus, tutang tului porawe iro, ihkai mohcon umba iro kotahin ihcominggu. Turus ihkai tulak nokuh Ruma.

¹⁵Konduang-konduang ang Ruma ijo porocaya ahkan Tuhan Yesus ngonih borihta tohou ihkai, nyiring iro lombut johcok nokuh pasar Apius tutang Pasanggrahan Tolu ahkan naharang ihkai. Kotihka Paulus hosombang umba iro, io ngohawot torimakasih ahkan Pohotala tutang ahtoioh jadi tabah.

¹⁶Ohkot johcok ang Ruma, Paulus tomorodehkaoh mohcon bongoi hawui tomojaga bain ihcobehti sorodadu.

¹⁷Uliius tolu ondou, Paulus na'ah okon-okon ulun Yahudi ijo bosewut ang anan. Tutang ulimba iro hopuhpung, Paulus hopander umba iro, ‘‘Konduang-konduang! Ahku puna eam bosala ino-inon toharep uhtus ihto, ata'ai molanggar adat kopahtuh ijo ihto norimaoh tahkan tahtu ajuh 'to. Oluka kodorih ahku tuh tonawan ang Yerusalem tutang tonyarah ahkan ulun Ruma.

¹⁸Uliius porokara'ku tomoriksa, iro kani moliwus ahku, tului tonyombang ahku eam nguanoh ihco kosalan ka ijo pahtut tomohukum umba hukum mahtoi.

¹⁹ Tahpi tului ulun-ulun Yahudi molawan, ahku paksa monutut porokara aik'ku, ponosara ang balaibosara ain Kaisar Ruma. Ahku nguanoh rih eam kotului ahku anaingina dolang aangihco pongaduan toharep uhtus aik'ku bongoi.

²⁰Tutang orih kotuluioh ahku nyawot hosombang umba ihkam, mangat pande-pander umba ihkam; tului ahku tomasung kotului Ponyolamat ijo tonoharap-harap bain uhtus Israel.’’

²¹Turus iro nuhtui umba io, ‘‘Ihkai ka'a jaha norima ihco surat ka tahkan Yudea tohou Konduang. Tutang eam aro ihcobehti Konduang ka tahkan anan ijo lombut ngomin kabar tohou Konduang ata'ai mander ijo ja'at tohou Konduang.

²²Tahpi ihkai jolik ka'a ngonih tohou koporocaya Konduang, tului ihkai paring jari ngonih, ulun moncela ajaran ijo Konduang nambit rih.’’

²³Mahka iro tutang Paulus monahtap ihco ondou ahkan hosombang. Aang ondou orih aro ulun lombut nokuh unuk Paulus. Tahkan ngohkos johcok sohit Paulus monyorihta tutang mborihtaoh ahkan'ndo tohou Kabar Hinut koloukuwoh Pohotala momorentah kolou Lahca. Hapan ayat-ayat tahkan Buhku Museh tutang Buhku Nabi-nabi, Paulus ngurah jalan nguan iro porocaya tohou Yesus.

²⁴Anai ijo porocaya ahkan inon ijo tomborihta Paulus, tahpi anai ka'a ijo eam porocaya.

²⁵Honong tiruk ijo hokolawan, iro nohtah unuk rih, uliius Paulus nuhtui ijo pongo tuh, umba iro, ‘‘Puna kona samasino, inon ijo tonuhtui bain Roh Pohotala nguha Nabi Yesaya ahkan tahtu ajuh ihkam!

²⁶ Pohotala nuhtui, ‘Tulakrih, nuhtuioh ahkan uhtus tuh: Ihkam ahkan toturus ngonih, tahpi eam solembang; ihkam ahkan toturus notunengoh tahpi eam kota'an inon ijo nyolung.

²⁷Tului tiruk uhtus tuh jari monjadi tapak, tolingan'ndo jari monjadi borengen tutang mahtan iro jari tongombuhtop. Tuh nyolung mangat mahtan'ndo ara nohto, tolinga iro ara ngonih, tiruk iro ara solembang, tutang ara hoduli Ahkak-Ku, turus Ahku ahkan ngopios iro.’ ’’

²⁸Kojoriaioh Paulus nuhtui, ‘‘Konduang-konduang pahtut kota'an ijo kabar tohou solamat ijo tahkan Pohotala, huntuh jari mborihta ahkan uhtus-uhtus bohkon ijo bohkon Yahudi. Iro ahkan numbunoh!’’ [

²⁹Uliius Paulus nuhtui kodorih, ulun-ulun Yahudi rih, nohtah unuk rih, sambir hokolawan ihco umba ijo bohkon.]

³⁰Duo toun kotahiuoh Paulus mohcon ang Ruma, ang lohpou ijo tonosewaoh bongoi. Io jorih norima paring ulun ijo lombut masap io, ang unukoh.

³¹Tutang honong bohanyi io mborihta ahkan iro, tohou koloukuwoh Pohotala moretah kolou Lahca, tutang tohou Tuhan Yesus Kristus. Paulus nguanoh orih honong bebas eam aro ulun bacaoh hino.