Read Ot Danum KESAH RASUL-RASUL 3 Bible Online

KESAH RASUL-RASUL 3 - Ot Danum bible

KESAH RASUL-RASUL 3

¹Ang ihco ondou Petrus tutang Yohanes tulak nokuh Lohpou Tuhan aang jam tolu sohit iorih rahat ulun ohkot unuk bodo'a.

²Ang anan ang baun gerbang ijo konohawot ‘‘Bauntukang Bohinoi,’’ anai ihcobehti ulunbahkas ijo bolomu tahkanpahtukoh konanak. Nyinong ondou ulun orih omin nokuh anan mangat nyodahkah nokuh ulun-ulun ijo nyalan nokuh Lohpou Tuhan.

³Kotihka ulun rih nohto Petrus tutang Yohanes kani nyolong Lohpou Tuhan, io nyawot iro, nongaoh angihco ahkaioh.

⁴Mahka iro nuneng io, pongohuli Petrus nuhtui, ‘‘Nohtoani ihkai!’’

⁵Turus ulun orih nohtoani iro honong moharap ahkan ngodahpot angihco tahkan iro.

⁶Tahpi Petrus nuhtui umba io, ‘‘Ahku eam aro tepun duit samasino. Tahpi inon ijo anai aang ahku, orih ahkan ahku nongaoh ahkan'mu: Umba kuwasa Yesus Kristus ulun Nasaret rih, nyalanrih ihko!’’

⁷Turus Petrus nambit longo kotoun ulun ijo bolomu rih tutang dohop io kuat. Homboh orih pa'an ulun ijo bolomu rih tutang bola hukupoh monjadi ba'as.

⁸Turus io nomarang tombok, tutang nopara nyalan ahkan umo-umoh. Pongohuli io nyolong nokuh Lohpou Tuhan hombo-homboh Petrus doro Yohanes hawoi nyalan io nokoru-nokehcuk tutang monara Pohotala.

⁹Paring ulun nohto io nyalan tutang monara-nara Pohotala.

¹⁰Turus iro borondong ijo iorih tukang sodakah ijo tatai tuot ang, ‘‘Bauntukang Bohinoi’’ ang Lohpou Tuhan. Iro helan samasino tutang torongo-rongong nohto inon ijo jari nyolung ahkaioh.

¹¹Ulun rih turus iou ngohasu Petrus doro Yohanes. Tutang ohkot iro tolu johcok ang saoh ijo konohawot ‘‘Saoh Salomo’’, paring ulun lombut mongorumbung aang iro tului kagum.

¹²Uhun Petrus nopahjah ulun-ulun rih io nuhtui umba iro, ‘‘O ulun-ulun Israel, ombai Konduang-konduang helan umba hal orih? Ombai ihkam nohto turus aang ihkai? Inon ihkam ngohu ulun tuh duon nyalan tului anai kowasa aang ihkai ata'ai tului ihkai te'et umba Pohotala?

¹³ Pohotala ijo tonyembah bain Abraham, Isaak, Yakub, orih Pohotala tahtu ajuh ihto. Pohotala rih jari mohoromat Jihpoi-Oh iorih Yesus. Yesus orih ijo ihkam nyarah ahkan pihak pongowasa, tutang ihkam nuduh io ang toharep Pilatus, aang ohkot Pilatus kani moliwus Io.

¹⁴ Io borasih tutang hinut, tahpi ihkam ngolawan Io tutang hojojuan mangat Pilatus ahkan moliwus ihcobehti pomunu ahkan ihkam.

¹⁵Konduang-konduang munu Io, padahar kopunaoh Io rih luwang tohasak pombolum ahkan paring ulun. Tutang Pohotala jari ngombolum Io huli tahkan popahtoi. Ihkai jari monyaksi bongon 'kai hal rih.

¹⁶Konduang-konduang jari nohto tutang monyaksioh, inon ijo nyolung umba ulun bolomu tuh. Io jari nyolung ba'as tutang pios huli kotului io porocaya umba Yesus tutang kowasa-Oh. Tului porocaya ahkan Yesus mahka ulun tuh jari monjadi pios huli, aang toharep Konduang-konduang paring.

¹⁷Konduang-konduang! Huntuh ahku kota'an ijo inon ijo ihkam tutang okon-okon'kam nguaioh toharep Yesus, orih ihkam nguaioh, tului ihkam eam kota'an inon ijo ihkam rahat nguai.

¹⁸Tutang tului orihrih nyolung ka'a inon ijo jari nuhtui bain Pohotala soun lomoi hopatau nabi-nabi-Oh ijo Lahca Ponyolamat ijo tonobowot rih harus ngarot.

¹⁹Bain tului orih konduang-konduang hubahrih tahkan dusa-dusa'kam tutang buli nokuh Pohotala mangat Io potihou dusa-dusa'kam.

²⁰Tuhan ahkan lombut ahkan'kam tutang ihkam nginyam komonyun rohani. Tutang Tuhan ahkan nyuhu Yesus lombut ahkan'kam, tului Io jari tonuhkas bain Pohotala monjadi Lahca Ponyolamat ahkan'mu.

²¹Io harus mohcon ang soruga nyiring Pohotala monjorian paringoh bohua. Kolou ijo tonuhtuioh bain Pohotala hopatou nabi-nabioh ang jaman lomoi.

²² Museh pu'u nuhtui, ‘Pohotala Tuhan'kam ahkan nyoruhan ahkan'kam ihcobehti nabi tahkan uhtus'kam bongom, kolou Io nguhtus ahku. Ihkam harus ngonih paring ijo tonuhtuioh bain nabi rih ahkan'kam.

²³ Ulun ijo eam nohtoani inon ijo tonuhtui bain nabi rih, ulun rih ahkan tonyarooh tahkan ukup Pohotala tutang tomorusak.’

²⁴Nabi-nabi ijo pu'u nyiar mborihta tahkan Pohotala nopara tahkan Nabi Samuel tutang nabi-nabi bohkon ijo lombut pongohuli, paringoh mborihta tohou jaman tuh.

²⁵ Bowot-bowot tahkan Pohotala ijo tonyiar bain nabi-nabi, anairih ahkan Konduang-konduang. Aang bowot ijo Pohotala napa umba tahtu ajuh'kam, Pohotala nuhtui umba Abraham numbun tuh, ‘Tahkan lihit'mu Ahku ahkan mborehkat karon uhtus ang kolunon.’ Bowot orih anairih ahkan ihkam ka'a.

²⁶Orih kotuluioh Pohotala ngopili Jihpoi-Oh turus nyuhu Io lombut nokuh ihkam paling houn, mangat Io mborehkat ihkam. Caraoh Io mborehkat ihkam, iorih, hawui nguan Konduang-konduang paring hubah tahkan cara pombolum ijo ja'at.’’