Read Ot Danum KESAH RASUL-RASUL 4 Bible Online

KESAH RASUL-RASUL 4 - Ot Danum bible

KESAH RASUL-RASUL 4

¹Pondehan Petrus doro Yohanes magun bopander umba ulun-ulun rih, imam-imam kopala tutang komandan, ponokawan Lohpou Tuhan hawui ulun-ulun Saduki lombut nokuh Petrus doro Yohanes.

²Iro bosingi tului Petrus doro Yohanes ngonorangan ahkan ulun-ulun ijo Yesus rih jari bolum huli tahkan popahtoi. Tutang orih mombukti ijo ulun mahtoi ahkan tongombolum huli.

³Mahka iro nawan duo rasul rih turus posolong ang luwang sipir. Tutang tului jari ngolomi, mahka Petrus doro Yohanes tonahan ang anan nyiring ngohkosoh.

⁴Tahpi ulun-ulun ijo jari ngonih ajar rasul-rasul rih aro ijo porocaya. Mahka jumbalah iro botambah nyiring johcok monjadi kira-kira limo kujan behti.

⁵Ang ngokosoh okon-okon Majelis Agama, okon-okon Yahudi tutang guru-guru agama hopuhpung ang Yerusalem.

⁶Iro monyombang umba Imam Hajo Hanas tutang Kayapas, Yohanes Aleksander, tutang paring ijo barih jolahan imam hajo rih.

⁷Petrus tutang Yohanes omin noharep iro, turus iro ngisok, ‘‘Koloukuwoh cara'kam ngopios ulun bolomu rih? Umba koba'as tahkan amoh, ata'ai umba kowasa tahkan iai, ihkam nguan ang orih?’’

⁸Petrus, ijo tokowasa Roh Pohotala, mutah, ‘‘Tuan-tuan okon uhtus Israel tutang Tuan-tuan okon Majelis Agama!

⁹Ihkai, ponosara ondou tuh tului nguan aang hinut ahkan dohop ihcobehti ulun bolomu tutang tului tuan-tuan kani ngota'an koloukuwoh ulun tuh tongopios.

¹⁰Nah Tuan-tuan paringoh harus ngota'an tutang paring uhtus Israel ka, harus ngota'an ijo ulun tuh tombok huntuh honong behtiu ijo sehat ang toharep Tuan-tuan, tului koba'as tutang kowasa tahkan Yesus Kristus ulun Nasaret rih. Tuan-tuan jari nyopolahki Yesus rih, tahpi Pohotala jari ngombolum Io huli tahkan louk ulun mahtoi.

¹¹ Yesus ijo orih rih tonohou bain ayat Surat Borasih tuh, ‘Bahtu ijo eam hapan bain ihkam tuhkang mangun lahpou korinah orih, monjadi bahtu ijo mombahtang.’

¹²Tihkas nguha Yesus iou ulun duon solamat. Tului ang sohapus Kolunon, ang louk ulun eam aro ihcobehti bohkon ka ijo ngonduon kowasa tahkan Pohotala ahkan monyolamat ihto.’’

¹³Okon-okon puhpung bosara rih helan nohto kohanyin Petrus doro Yohanes, mahihino iro jari kota'an ijo duo behti rasul rih sama umba ulun-ulun aro ijo eam aro sokula, turus iro borondong ijo koduo rasul rih, anairih ulun-ulun ijo hihco umba Yesus.

¹⁴Tahpi iro eam tou nuhtui ino-inon, tului ulun ijo jari konopios rih anai tombok ang toharep'ndo homboh umba Petrus doro Yohanes.

¹⁵Mahka iro nyuhu koduo rasul rih soluka tahkan tohun majelis rih, pongohuli iro bohaum.

¹⁶Iro nuhtui, ‘‘Ihto harus nguan inon toharep iro duo tuh? Paring ulun ijo mohcon ang Yerusalem jari ngota'an, kahtahelan ijo luar biasa tuh, konuan bain doro rih. Ihto eam duon ngulimoh orih.

¹⁷Tahpi mangat hal rih ara tosiar saup samai hino ang louk ulun-ulun, olai ihto ngahtap iro duo, ijo iro samasino eam tou hino bopander umba ihcobehti ka honong hapan aran Yesus.’’

¹⁸Mahka iro na'ah koduo rasul rih nyolong huli, tutang nuhtui ijo iro samasino eam tou ngohawot ata'ai majar umba aran Yesus.

¹⁹Tahpi Petrus doro Yohanes mutah, ‘‘Nirukrih bongon inon ijo morong ang toharep Pohotala: Numbun poretah Tuan-tuan ata'ai numbun poretah Pohotala.

²⁰Tului ihkai eam tou tondo mborihta tohou inon ijo jari ihkai nohto tutang konahan 'kai.’’

²¹Okon-okon bosara rih eam duon sombang ihco alasan ka'a mangat mohukum Petrus tutang Yohanes. Jadi iro ngahtap koduo rasul rih turus moliwus doro rih, tului paring ulun mohormat monara Pohotala tului aangjadi rih.

²²Ulun ijo nginyam kopios ijo helan rih, jari labih tahkan ohpat pulu toun umuroh.

²³Uli Petrus tutang Yohanes konoliwus iro huli nokuh injah-jolahan'ndo tutang nyorihta paring ijo tonuhtui bain imam-imam kopala tutang okon-okon Yahudi rih ahkan'ndo.

²⁴ Limbah injah-jolahan'ndo ngonih rih iro hombo-homboh bodo'a hihco ahtoi ahkan Pohotala. Hion iro: ‘‘Tuhan, Ihkorih ijo ngonjorianoh langit tutang tana tutang tasik hawui paring suangoh.

²⁵ Umba Roh-Mu, Ihko pu'u nuhtui umba tahtu ajuh Ihkai, Dawid, jihpon-Mu; Ihko nuhtui, ‘Ombai ulun-ulun, ijo eam kosono Tuhan, sangit; ombai uhtus-uhtus ulun hotohou ijo earo gunaioh?

²⁶Lahca-lahcan kolunon samai nahtap aropoh ahkan hokolahi, tutang dolang okon hihco ngolawan Tuhan tutang Lahca Ponyolamat.’

²⁷ Tului puna Horodes tutang Pontius Pilatus jari hotohou umba ulun-ulun ijo eam kosono Tuhan tutang umba ulun-ulun Israel ang lowu tuh. Iro bohaum ahkan ngolawan Yesus Jihpon-Mu ijo borasih rih; ijo jari ihko potuotoh monjadi Lahca Ponyolamat.

²⁸Iro hihco ahkan nguan kokaro aang'co, ijo Ihko jari nyodiaoh labih houn, jarih ahkan nyolung. Tutang Ihko nahtap orih isun kowasa tutang kokani-Mu bongom.

²⁹Huntuh, Tuhan, nohtorih koloukuwoh iro ngahtap ihkai. Tutang ngijinohrih ihkai jihpon-jihpon-Mu tuh mborihta Kabar Hinut-Mu hawui eam mihkoh.

³⁰Nongaohrih pondohop-Mu mangat ulun poros tonopios, tutang tandahelan-tandahelan hawui hal-hal ijo luar biasa nyolung, nguha kowasa tutang koba'as tahkan aran Yesus, Jihpon-Mu ijo Borasih rih.’’

³¹Ulijadi iro tondo bodo'a, unuk iro mohcon rih tonyuhkuh iro paringoh konowasa bain Roh Pohotala tutang nopara nuhtui homboh bohanyi tu'u mborihta tohou Kabar Hinut tahkan Pohotala.

³² Paring ulun ijo porocaya rih bolum hihcoahtoi hihcohomboruanoh. Eam aro ihcobehti ka tahkan iro ngohu ijo inon, ijo io tepuioh, anai aiuoh bongoi. Paring aang'co ijo anai aang iro, paring iro hapaoh sama-sama.

³³Honong kowasa ijo, hajo rasul-rasul rih nonga kosaksian ijo Yesus jari bolum hoduli. Mahka Pohotala mborehkat iro.

³⁴Tutang eam aro ihcobehti ka tahkan louk iro anai kotahpas ino-inon. Mahka iro ijo tepun tana ata'ai lohpou, iro modagang tana ata'ai lohpou rih; turus duitoh tahkan podagang rih iro ngitot,

³⁵tutang iro nyorahoh ahkan rasul-rasul. Pongohino duit rih magioh ahkan nyinong ulun ijo poruluoh.

³⁶Kodorih ka'a umba Yusep. Io ka modagang tana aiuoh, turus duit ponjualan rih io ngitot tutang nyorahoh ahkan rasul-rasul. Yusep rih anai ihcobehti lihit Lewi tahkan Siprus; rasul-rasul ngohawot io Barnabas (rimai Ngonjorih).