Read Ot Danum KESAH RASUL-RASUL 5 Bible Online

KESAH RASUL-RASUL 5 - Ot Danum bible

KESAH RASUL-RASUL 5

¹Tahpi anai ihcobehti bahkas bogare Ananias. Io tutang oruhoh bogare Sapira, modagang ihcokolambar tana ain doro.

²Duit ponjualan tana rih, ihcokobagi iro nyuhukoh tutang ihcokobagi tonyorahoh ahkan rasul-rasul. Io nguan gawi rih ngota'an oruhoh.

³Mahka Petrus nuhtui umba io, ‘‘Ananias, ombai ihko mohanouoh sehtan ngowasaoh ahtoi'mu nyiring ihko ngobalik ahkan Roh Pohotala, honong tonih-tonih monahan ahkan arop'mu bongom ihcokobagi tahkan duit ponjualan tana rih?

⁴Tana rih ihko tehpui hounumba ihko modagangoh. Tutang uli tana rih ponodagang ka, duitoh magun ihko tehpui ka'a. Jadi ombai anai konohuang ahtoi'mu ahkan nguan aang kolouorih? Bohkon ulun, ijo ihko ngobalikoh tahpi Pohotala!’’

⁵Kodorih Ananias ngonih auhtuhtui orih, io bolukang, turus mahtoi. Paring ulun ijo ngonih tohou angnyolung rih uras mihkoh.

⁶Mahka ulun-ulun biou lombut mukus otun Ananias turus ngitotoh soluka ahkan ngolowongoh.

⁷Kira-kira tolu jamkowa pongohuli oruhoh lombut nyolong. Io eam ngota'an inon ijo punai nyolung.

⁸Petrus nuhtui umba io, ‘‘Cuba nuhtui ahkak'ku: Inon tana ijo ihko tutang bosai'mu modagang rih, karon tuh ih legaioh?’’ ‘‘Tu'u orih legaioh,’’ mutah oruh Ananias.

⁹Turus Petrus nuhtui umba io, ‘‘Ombai ihko hawui bosai'mu bohaum ahkan nikos Roh Pohotala? Ngonihrih tuh! Ulun-ulun ijo ngolowong bosai'mu jari buli. Iro ahkan ngitot ihko nokuh konaha ka'a.’’

¹⁰Kotihka rih ka'a oruh Ananias rih bolukang tutang, mahtoi ang baun Petrus. Tutang uhun orih ka'a ulun-ulun biou rih nyolong iro nyundou io ka'a jari mahtoi. Turus iro ngitot otui soluka lowu tutang ngolowong io, mambai lowong bosaioh.

¹¹Mahka paring ulun-ulun ijo porocaya rih tutang ulun-ulun bohkonoh ijo jari ngonih tohou ang'co nyolung rih uras mihkoh.

¹²Tului pohalu rasul-rasul, mahka aro kahtahelan tutang hal-hal ijo molobien nyolung ang louk ulunaro. Hawui hihcoahtoi paring ulun porocaya hopuhpung ang Saoh Solomo ang Lohpou Tuhan.

¹³Tutang ulun luar eam aro ijo bohanyi lombut hopuhpung umba ulun-ulun ijo porocaya rih. Tahpi ulun-ulun porocaya rih paham tonohoromat bain ulunaro.

¹⁴Tutang sasar tahi mahi botambah aro, ulun-ulun ijo porocaya ahkan Tuhan — pios bahkas oluka bawi.

¹⁵Sasar koada'ai monjadi kodorih kolou, nyiring ulun-ulun poros konina ang isun katir ata'ai kacang, turus ngitot nokuh jalan, ahkan iro paling isut tou kona kolingon Petrus, amat Petrus nyihing ang anai.

¹⁶Moru-morung ulun-ulun lombut tahkan lowu-lowu kodiling Yerusalem. Iro ngitot ulun-ulun poros tutang ijo sonalung roh ja'at. Tutang ulun-ulun rih konopios paringoh.

¹⁷Kojoriai imam hajo tutang paring injah-jolahaioh, yorih barih ulun-ulun Saduki, nopara botindak, tului iro hiri ahtoi.

¹⁸Rasul-rasul rih tonawan turus posolongoh koluwang sipir ulunaro.

¹⁹Tahpi ngolomi, ihcobehti molehkat Tuhan nguap bauntukang-bauntukang sipir turus ngomin rasul-rasul soluka. Molehkat orih nuhtui umba rasul-rasul rih,

²⁰‘‘Kuatrih, tombok ang Lohpou Tuhan tutang monyiar ahkan ulun-ulun tohou pombolum ijo bohua tuh.’’

²¹Mahka rasul-rasul rih ka numbun potoh molehkat rih. Homboh ngokos samasino iro tulak nokuh Lohpou Tuhan tutang nopara majar ang anai. Pondehan orih imam hajo tutang dolang ponokawanoh lombut, turus napa pupung bosara umba dolang okon Yahudi. Pongohino iro nyuhu ulun tulak ngomin rasul-rasul rih, tahkan sipir ahkan tongitot toharep iro.

²²Tahpi uhun ulun-ulun ijo sonuhu rih johcok ang sipir, iro eam nyombang rasul-rasul ang anan. Jadi iro buli mander hal orih ahkan majelis.

²³‘‘Aang kotihka ihkai johcok ang sipir,’’ hion iro umba majelis, ‘‘ihkai nyombang bauntukang sipir rih konuci pios-pios, tutang ponjaga-ponjaga tahtap monjaga aang bauntukang. Tahpi aang ohkot ihkai nguapoh bauntukang rih, ihkai eam nyombang ihcobehti ang luwangoh.’’

²⁴Kotihka komandan ponokawan Lohpou Tuhan tutang imam-imam kopala ngonih tuhtui rih iro torongong tohou rasul-rasul, tutang mihkoh ahkan inon ijo tou nyolung.

²⁵Pongohino lombut ihcobehti bahkas ngomin kabar tuh, ‘‘Ngonihoh ihkam! Ulun-ulun ijo Tuan-tuan posolong ang sipir rih, uhuntuh beteng majar ulun aro ang Lohpou Tuhan!’’

²⁶Mahka komandan ponokawan Lohpou Tuhan rih tutang karon-ponokawanoh tulak ngomin rasul-rasul rih huli. Tahpi iro eam hapa kokaras, tului iro mihkoh umba ulun aro; ara-ara ulun aro rih noin mukah iro umba bahtu.

²⁷Rasul-rasul rih konomin nyolong noharep bosara. Turus imam hajo moriksa iro.

²⁸ Io nuhtui, ‘‘Ihkai jari baca ihkam honong karas mangat ara majar tohou Ulun rih. Tahpi uhuntuh cuba nohto inon ijo ihkam nguai! Ihkam nyiar pongajaran'mu rih, ang sohapus Yerusalem, tutang ihkam malah kani ndawa ijo ihkailah ijo kotuluioh popahtoi Ulun rih.’’

²⁹Petrus tutang rasul-rasul ijo bohkon mutah, ‘‘Ihkai harus numbun konohuang Pohotala tutang eam numbun konohuang ulun kolunon.

³⁰Yesus ijo ihkam tomahpakoh rih bolum hoduli tahkan popahtoi, bain Pohotalan tahtu ajuh ihto.

³¹Tutang Pohotala jari nonga ahkai-Oh ponuot tutang kowasa ijo isung monjadi Okon tutang Ponyolamat; mangat uhtus Israel tononga kosapet ahkan hubah tahkan dusa-dusaoh, tutang ngonduon pongapunan.

³²Ihkai tuh saksi-saksioh tohou paring orih rih — ihkai tutang ka'a Roh Pohotala ijo tononga bain Pohotala ahkan ulun-ulun ijo numbun poretah-Oh.’’

³³Kotihka okon-okon Majelis Agama ngonih auh orih, iro sangit samasino tutang iro hopahkat ahkan munu rasul-rasul rih.

³⁴Tahpi ang louk okon-okon majelis rih anai 'cobehti parisi araioh Gamaliel. Io guru agama ijo paham tomohoromat bain paring ulun. Io tombok turus monyuhu ulun ngomin rasul-rasul rih soluka honjulu.

³⁵Pongohino io nuhtui umba okon-okon Majelis Agama rih, ‘‘Konduang-konduang, ulun-ulun Israel! Nirukrih moro-morong tohou inon ijo ahkan konduang-konduang nguaioh umba ulun-ulun tuh.

³⁶Tului houn jari pu'u lombut Teudas ijo ngohu aropoh ulun hajo, nyiring kira-kira ohpat ratus behti monjadi muridoh. Tahpi io tomunu, tutang paring muridoh bilang-bahas, hawui pihak iro ka nihou.

³⁷Ulimba rih, aang ohkot anai pongihtung ulun Israel, lombut Yudas ulun tahkan Galilea. Kotolui pongarohoh, aro ka'a ulun ijo mihak io. Tahpi io ka'a tomunu tutang paring murid-muridoh bilang-bahas.

³⁸Jari huntuh, umba ang'conyolung rih ahku ningak ihkam, iorih: Ara nguan ino-inon toharep ulun-ulun tuh nouhoh iou iro. Tului amat ajaran tutang pihak iro tuh anairih tahkan kolunon, mahka ajaran tutang pihak iro rih ahkan nihou.

³⁹Tahpi amat orih lombut tahkan Pohotala mahka Konduang-konduang eam ahkan dahpot ngalahoh iro. Malah tou ahkan gihtan ijo Konduang-konduang molawan Pohotala.’’ Tingak Gamaliel rih tonorima bain Majelis.

⁴⁰Mahka rasul-rasul rih tona'ah, turus ponahcat, pongohuli iro tobaca ngajar hino tohou Yesus, ulijari punan iro konoliwusoh.

⁴¹Rasul-rasul nohtah Majelis Agama rih tutang hawui kojorih tului Pohotala jari ngohu iro harus ahkan dahpot hinaan kotului Yesus.

⁴²Tutang nyinong ondou iro ang Lohpou Tuhan tutang ang lohpou-lohpou ulun, iro hototurus ngajar tutang mborihta Kabar Hinut tohou Yesus ijo Io Lahca Ponyolamat ijo tonombowot rih.