Read Ot Danum KESAH RASUL-RASUL 6 Bible Online

KESAH RASUL-RASUL 6 - Ot Danum bible

KESAH RASUL-RASUL 6

¹Murid-murid Yesus sasar tahi sasar mondahang aro. Aang ohkot rih ulun-ulun Yahudi ijo hapa basa Yunani, monjadi eam sanang toharep ulun Yahudi asli. Ijo basa Yunani rih nuhtui, ‘‘Bawin-bawin ihkai ijo jari balu eam duonbagian pondohop ukus nyinong ondou ijo tomagi-magioh ahkan ulun-ulun.’’

²Bain tului orih koduobalas rasul rih muhpung paring murid tutang nuhtui umba iro, ‘‘Eam pios amat ihkai tondo mborihtaoh Kabar Hinut auh Pohotala, tului harus ngurus soal-soal ukun.

³Jadi pios Konduang-konduang ngopili tahkan louk ihkam pihtu behti ijo anai aran morong, konowasa Roh Pohotala tutang piosbosara, ijo duon ihkai nyuhuoh mongurus soal-soal tuh;

⁴tului ihkai kani bodo'a tutang mborihtaoh auh Pohotala iou.’’

⁵Paring ulun rih, sotuju umba tuhtui tahkan rasul rih. Turus iro mitih Stepanus, ihcobehti ijo porocaya sasino umba Yesus, tutang konowasa Roh Pohotala. Ka'a konopili: Pilipus, Prokhorus, Nikanor, Timon, Parmenas tutang Nikolaus tahkan Antiokhia; io eam ulun Yahudi, ijo nyolong agama Yahudi.

⁶Kopihtu ulun rih, tongusul umba rasul-rasul mondo'a iro, turus rasul-rasul rih bodo'a tutang nyawotoh borehkat Tuhan ahkan iro.

⁷Kolouorihrih Kabar Hinut tahkan Pohotala mahi-mahi tosiar nokuh tutang murid-murid Yesus ang Yerusalem ka mahi mondahang. Tutang aro hino imam-imam ijo porocaya ahkan Yesus.

⁸Stepanus paham toborehkatoh bain Pohotala, nyiring io nguan aro kahtahelan tutang hal-hal luar biasa, ang louk ulunaro.

⁹Tahpi anai ulun-ulun ijo ngolawan io; iro anairih anak-ukup ijo konohawot Lohpou Sombayang Ulun Bebas. Anak-ukup ulun ang lohpou sombayang rih, anai ulun-ulun Yahudi tahkan Kirene tutang Aleksandria. Iro homboh ulun-ulun Yahudi tahkan Kilikia tutang Asia hotokiantiruk umba Stepanus.

¹⁰Tahpi iro eam duon monjawab, inon ijo konohawot bain Stepanus, kotului Roh Pohotala nonga ahkai kopiosbosara ahkan nuhtui kodorih.

¹¹Bain tului orih iro nonga suruk ahkan pira-pira ulun ahkan nuhtui, ‘‘Ihkai ngonih ulun tuh ngonja'at Museh tutang Pohotala!’’

¹²Kodorihrih iro ngihit ulun aro tutang okon-okon Yahudi tutang guru-guru agama. Turus iro tulak nawan Stepanus, pongohino ngitot io noharep Majelis Agama.

¹³Tutang iro potohimo ka'a saksi-saksi ijo nonga kotorangan-kotorangan ijo eam tu'u tohou Stepanus. Saksi-saksi rih nuhtui, ‘‘Ulun tuh toturus ngonja'at Lohpou Tuhan ijo borasih tutang mohina poretah-poretah Pohotala ijo nuhtui bain Museh.

¹⁴Ihkai jari ngonih io nuhtui: ijo Yesus tahkan Nasaret rih ahkan morusak Lohpou Pohotala tuh, turus ngubah paring hadat ijo nonga Museh ahkan ihto!’’

¹⁵Paring ulun ijo anai tuot ang sidang Majelis Agama rih uras nuneng Stepanus. Tutang aang ohkot orih baun Stepanus, topahjahoh kolou baun molehkat Tuhan.