Read Ot Danum KESAH RASUL-RASUL 7 Bible Online

KESAH RASUL-RASUL 7 - Ot Danum bible

KESAH RASUL-RASUL 7

¹Imam hajo ngisok Stepanus, ‘‘Inon paring aang tonuhtui ulun-ulun rih tu'u?’’

² Stepanus nuhtui, ‘‘Konduang-konduang tutang Amai-amai! Cuba ngonih ahku! Sounumba tahtu ajuh ihto Abraham hatun nokuh Haran ang ohkot io magun mohcon aang Mesopotamia, Pohotala ijo tonohoromat lombut nokuh io

³tutang nuhtui, ‘Nohtahohrih lowun'kam tutang aring-konduang'kam. Tulakrih nokuh lowu ijo ahkan Ahku nunjukoh ahkan'kam.’

⁴ Abraham nohtah lowu Kasdim, turus hatun nokuh Haran. Uli amai Abraham mahtoi. Pohotala nyuhu Abraham mindah nokuh lowu tuh, ijo Konduang-konduang hawui Amai-amai paring mohcon ohtoi huntuh tuh.

⁵ Aang ohkot orih eam aro 'cokabagi ka tahkan tana lowu tuh ijo Pohotala nonga ahkan Abraham tutang monjadi ain Abraham; ihco tahpapa'a mahieamaro tononga ahkaioh. Tahpi Pohotala hobowot ijo Pohotala nonga ahkan Abraham ahkan monjadi ain Abraham hawui lihit-lihitoh. Ohkot orih Abraham eam aro tepun anak.

⁶ Tahpi tuhrih ijo tonuhtui Pohotala ahkaioh, ‘Lihit'mu ijo ahkan mohcon ulun bohkonuhtus ang lowun ulun bohkon. Ulun-ulun lowu rih ahkan monjajah iro tutang monyangitnguan iro honong kejam nyiring ohpat lohtus toun kotahiu.

⁷ Tahpi Ahku ahkan mohukum uhtus ijo hojihpon iro, tutang iro ahkan soluka tahkan lowu orih tutang nyembah Ahku ang unuk tuh.’

⁸ Uli nuhtui kolouorih kahut bowot rih tono-sah bain Pohotala, umba upacara sunat. Mahka uli Isaak anak Abraham konanak, Abraham nyunat io ang ohkot io umur jolu ondou. Pongohino Isaak nyunat ka'a anakoh, iorih Yakub. Tutang Yakub ka'a nyunat duo balas anakoh, ijo monjadi amai-amai tahtu ajuh'kam uhtus Yahudi.

⁹ Amai-amai laluhur ihto rih ngobohu umba Yusep nyiring iro modagang io monjadi jihpon ang Misir. Tahpi Pohotala homboh io,

¹⁰ tutang moliwus io tahkan kokaron kosusahoh. Pohotala nonga ahkai hadat tutang kopios bosara aang ohkot io noharep Parou lahca Misir, nyiring Parou potuot io monjadi gubernur lowu Misir tutang ngowasa istana Parou.

¹¹ Pongohuli nyolung ihco wayah, lo'u ijo hajo lombut, hopus tana Misir tutang Kanaan, nyiring ulun ngarot samasino. Tahtu ajuh ihto eam tou duon ukun.

¹²Mahka kotihka Yakub ngonih anai gandum ang Misir io nyuhu bola-anakoh, tahtu ajuh ihto tulak nokuh anan bagi pahtuk tikat.

¹³ Ohkot iro tulak ang koduo tikatoh Yusep nyorihta aropoh ahkan Konduang-konduang orih rih ijo iorih Yusep. Punanoh ohkot rih lahca Misir ngota'an tohou injahjolahan Yusep.

¹⁴ Pongohino Yusep ngirim kabar ahkan amaioh, iorih Yakub, unuk nyawot io, tutang sohapus injah-jolahai, hantun nokuh Misir — paringoh anai pihtu pulu limo behti karon'ndo.

¹⁵ Mahka Yakub hahtun nokuh Misir tutang aang anan io tutang tahtu ajuh ihto mahtoi.

¹⁶ Otun iro pongohino rih omin huli nokuh Sikhem tutang tonolowongoh ang tanom ijo jari tomoli umba sojumbalah duit bain Abraham tahkan lihting uhtus Hemor ang Sikhem.

¹⁷ Kotihka jari doni ohkotoh Pohotala monyolung bowotoh umba Abraham, uhtus ihto ang Misir, jari sasar mondahang aro.

¹⁸Kojoriaioh ihcobehti lahca bohkon, ijo eam ngosono Yusep ijo moretah ang Misir.

¹⁹ Lahca rih ngoahcam umba uhtus ihto tutang kejam toharep tahtu ajuh ihto. Io maksa iro dian anaklonga iro ijo bohua konanak, mangat sorata turus mahtoi.

²⁰ Aang wayah orihrih ka'a Museh konanak; io anaklonga ijo bohinoi kolouoh. Tolu potion kotahiu, io ponosuhuk ulun okooh ang lohpou'ndo, inai-amaioh,

²¹ tutang uli io dian'ndo, putri Parou ngomin io, turus mohaga io kolou anakoh bongoi.

²²Karon ilmu uhtus Misir uras duoi tahkan ulun Misir ijo tomara ahkaioh tutang io monjadi ulun ijo paling bokowasa a'ang tuhtui tutang konuai-konuaioh.

²³ Ohkot Museh umur ohpat pulu toun, lombut kojolikoh a'ang ahtoioh, kani tulak nohto koada'an uhtusoh ulun Israel.

²⁴Turus io nohto ihcobehti tahkan iro konoporos bain ihcobehti Misir; mahka io dohop ulun ijo konoporos rih tutang munu ulun Misir rih.

²⁵Museh ngohu uhtusoh ahkan solembang ijo Pohotala rahat hapa io ahkan morodehka iro. Tahpi korinah iro eam solembang.

²⁶Ngohkosoh io nohto hino duo behti ulun Israel hokolahi, turus Museh ngurah jalan mongobuah iro, io nuhtui, ‘Ihkam tuh hokonduang! Ombai ihkam sama arop hokolahi?’

²⁷Tahpi ulun ijo nahup injah orih nyuhung Museh nokuh saro turus nuhtui, ‘Iai ijo potuot ihko monjadi okon tutang okon ihkai?

²⁸Kuwoh ihko kani munu ahku ka'a kolou ihko munu ulun Misir orih malom?’

²⁹ Kotihka Museh ngonih inon ijo tonuhtui bain ulun rih, Museh hahtun tahkan Misir, turus mohcon ang lowun ulun Midian. Ang anan io dahpot duo behti anak.

³⁰ Ohpat pulu toun uliorih, ihcobehti molehkat Tuhan lombut nokuh Museh ang padang bolambah doni Puruk Sinai. Molehkat rih lombut ang luwang baho ang ruwut ijo rahat ngonjelak.

³¹Museh helan nopahjah hal orih, nyiring io tulak doni-doni, mangat ngota'an inon orih. Turus io ngonih auh Tuhan nuhtui,

³²‘Ahku Pohotalan tahtu ajuh'mu. Ahku Pohotalan Abraham, Isaak, tutang Yakub.’ Museh ngorukuh mihkoh nyiring eam bohanyi hino nopahjah nokuh ruwut rih.

³³Pongohuli Tuhan nuhtui hino, ‘Nguhkoioh sorupah'mu ijo hapan'mu rih, tului ang tana unuk ihko tombok rih, anai tana ijo borasih.

³⁴Ahku jari nohto tutang nohtoani, kopoitoh kokarot uhkup-Ku ang Misir. Ahku jari ngonih komunguh iro tutang Ahku nosuluh ahkan momorodehka iro. Uhuntuh, olai! Ahku ahkan nyuhu ihko buli nokuh Misir.’

³⁵ Museh tuh, Museh ijo eam tongahku bain uhtus Israel tutang ijo tonulak hapa auh tuh, ‘Iai ijo potuot ihko monjadi okon tutang hakim ihkai?’ Tahpi kodorih iorih ulun, ijo sonuhu Pohotala monjadi okon tutang ponyolamat, honong pondohop tahkan molehkat ijo lombut ahkai, ang ruwut ijo ngonjelak rih.

³⁶ Museh rih ijo okon uhtus Israel soluka tahkan tana Misir honong nguan tandahelan-tandahelan tutang hal-hal molobien ang Misir, aang Tasik Bohandang, tutang aang padang bolambah kotahin ohpat pulu toun.

³⁷ Io rih ka'a Museh ijo nuhtui umba uhtus Israel, ‘Pohotala ahkan nonga ahkan'mu ihcobehti nabi, ijo konopili tahkan aang louk ihkam bongom, sama kolou Io jari ngopili ahku.’

³⁸ Musehrih ijo ang tohun uhtus Israel ang padang bolambah monjadi poholat ahkan molehkat ijo pander umba io ang Puruk Sinai, umba tahtu ajuh ihto. Iorih ijo norima tahkan Pohotala kabar ijo bolum, ahkan tonosiar ahkan ihto.

³⁹Sinoka kodorih tahtu ajuh ihto eam kani te'et umbaoh. Iro nulak io tutang jolik buli nokuh Misir.

⁴⁰ Iro nuhtui umba Aron, ‘Nguanrih dewa-dewa ahkan 'kai, mangat dewa-dewa rih monjadiokon ihkai. Tului ihkai jari eam kota'an hino, inon ijo nyolung umba Museh rih ijo ngomin ihkai soluka tahkan Misir!’

⁴¹ Turus aang ohkot orih iro nguan sopundu anak sahpi, pongohuli iro nyorah porahpah ahkan sopundu rih. Tutang nguan pesta, ahkan mohoromat ramu tapan longon iro bongoi.

⁴² Mahka Pohotala nohtah iro tutang mohonau iro nyembah potion-potion ang langit. Orih sorurui umba inon ijo tonyurat ang buhku nabi-nabi. Koloutuh, ‘O, ulun-ulun Israel! Eam ahkak-Ku, ihkam nyombolih tutang porahpah ohcinkombolum kotahin ohpat pulu toun ang padang bolambah.

⁴³Kemah dewa Molokhrih ijo ihkam ngomiou-ngomiouoh hombo-homboh umba hopahtung, pation dewa'mu, iorih Refan; orih rih hopahtung ijo ihkam napa ahkan tonyembahoh. Bain kotului orih rih Ahku ahkan dian ihkam nyiring mahcu nokuh pohoi ang lowu Babel.’

⁴⁴ Kemah unuk Pohotala lombut ahkan ulun tosombang ang tahtu ajuh ihto ang padang bolambah. Kemah rih tonapa numbun poretah Pohotala ahkan Museh tutang numbun sutuoh, ijo pokarah Pohotala ahkan Museh.

⁴⁵ Pongohino kemah rih konomin toturusoh bain tahtu ajuh 'to, aang ohkot iro umba Yosua tulak ngorabut lowun ihto tuh, tahkan kowasaan uhtus-uhtus ijo tomuko Pohotala ang toharep iro. Kemah rih anai ang anan johcok jaman Dawid.

⁴⁶ Dawid ijo monyanang ahtoi Pohotala tutang nyawot umba-Oh, mangat io tongijinoh napa ihco lohpou ahkan Pohotala ijo tonyembah Yakub rih.

⁴⁷ Tahpi Solomorih ijo nombok lohpou ahkan Pohotala.

⁴⁸Olukodorih Pohotala Ijo Mahaisung eam mohcon ang luwang lohpou ihco tonapa ulun; tului ang luwang buhku nabi tonyurat koloutuh,

⁴⁹ ‘Langit anairih pododusan-Ku, tutang tana lahpik tapa-Ku. Lohpou inonrih ijo kani ihkam nombokoh unuk-Ku? Aang umoh unuk Ahku nondobo'o-Ku?

⁵⁰Eamkah Ahku bongok ijo jari ngonjorianoh karon aang'co?’ Kodorihrih hion Pohotala.

⁵¹ Eam inon komahang kuhung ihkam Konduang-konduang tutang kodorih kopura-pura ihkam te'et umba Pohotala! Tolingan'kam borengen samasino toharep auh Pohotala! Ihkam sama umba tahtu ajuh'kam toturus molawan Roh Pohotala!

⁵²Kuwoh anai ihcobehti nabi ijo eam konoporos bain tahtu ajuh'kam? Iro munu soruhan-soruhan tahkan Pohotala ijo jaman houn lomoi jari monyiar ijo Jihpon Pohotala ijo morong rih ahkan lombut. Tutang huntuh ihkam ngarana tutang munu Jihpon Pohotala rih.

⁵³Molehkat-molehkat jari monyiar poretah-poretah Pohotala ahkan'kam, tahpi ihkam eamkani numbuioh!’’

⁵⁴Kodorih okon-okon Majelis Agama rih ngonih paringoh ijo tonuhtui bain Stepanus, iro poros ahtoi tutang sangit samasino umbaoh.

⁵⁵Tahpi Stepanus ijo jari konowasa bain Roh Pohotala nopahjah nokuh langit. Io nohto kohajon Pohotala tutang Yesus tombok ang unuk kowasa ang hila kotoun Pohotala.

⁵⁶‘‘Nohto,’’ hion Stepanus, ‘‘ahku nohto soruga bokuap tutang Anak Ulun tombok ang hila kotoun Pohotala!’’

⁵⁷Okon-okon majelis rih nuhtup tolingan'ndo hawui ngoriak, turus hombo-homboh nyarang Stepanus.

⁵⁸Iro ngomin io bolua lowu turus mukah io umba bahtu. Ulun-ulun ijo monyaksi angijonyolung rih nyorah hahtiu aang'cobehti biou ijo bogare Saulus.

⁵⁹Pondehan iro mukah Stepanus umba bahtu, Stepanus na'ah, ‘‘Tuhan Yesus norimaoh roh'ku!’’

⁶⁰Turus io suhkuntu'ut homboh na'ah hajo tu'u, ‘‘Tuhan ararih dusa tuh tonyombaharih nokuh isun iro!’’ Opah nuhtui kodorih io bolukang palus.