Read Ot Danum KESAH RASUL-RASUL 8 Bible Online

KESAH RASUL-RASUL 8 - Ot Danum bible

KESAH RASUL-RASUL 8

¹Tutang Saulus jorih ka'a ngosan popahtoi orih. Ondou orih ka'a ukup-ukup ang Yerusalem, nopara tohoduru-duru nyiring paring ulun porocaya kocoali, rasul-rasul rawu-riai nokuh hopus tana Yudea tutang Samaria.

²Ulun-ulun ijo mihkoh umba Pohotala nanom Stepanus tutang nangih io honong paham sedih.

³ Tahpi Saulus toturus iou ngurah jalan polonyuh ukup. Io tulak tahkan lohpou nokuh lohpou tutang nguhut soluka ulun-ulun porocaya turus posolong iro nokuh luwang sipir.

⁴Ulun-ulun porocaya ijo rawu-riai rih mborihta Kabar Hinut tahkan Pohotala rih nokuh umo-umoh ka'a.

⁵Pilipus tulak nokuh lowu Samaria tutang mborihtaoh, ahkan ulun-ulun tohou Lahca Ponyolamat, ijo tonobowot Pohotala.

⁶Kotihka ulun-ulun ngonih Pilipus hopander tutang iro nopahjah tandahelan-tandahelan helan ijo konuaioh, aro tahkan iro ijo nohtoani inon ijo tonuhtui bain Pilipus.

⁷Kotului roh-roh ja'at jari soluka tutang ngoriak-riak tahkan aro ulun ijo sonorupang sehtan. Ulun-ulun bolomu, ulun tihpang ka'a aro ijo konopiosoh.

⁸Mahka ulun-ulun ang Samaria rih jorih sasino.

⁹Aang lowu rih anai ihcobehti ulunbahkas bogare Simon ijo pira-pira ohkot kotahiuoh nguan ulun-ulun Samaria torongong ahkan ilmu seheroh. Io ngohawot ahkan iro, ijo io ulun ijo luar biasa.

¹⁰Mahka paring ulun ang lowu rih, tahkan paring lapisan ulun aro paham nohtoani io. ‘‘Ulun tuh anai koba'as Pohotala ijo bosewut, kolou ‘Koba'as Hajo’ rih,’’ hion iro.

¹¹Jari tahi tu'u io norongong ulun-ulun umba koba'as sihiroh nyiring iro paham nohtoani io.

¹²Tahpi Pilipus mborihta ahkan'ndo tohou Kabar Hinut, tohou koloukuwoh Pohotala ahkan moretah kolou lahca, tutang tohou Yesus Kristus Lahca Ponyolamat rih. Mahka iro porocaya ahkan kabar ijo tonyiar bain Pilipus, turus iro ponopondus pios ulunbahkas oluka ulunbawi.

¹³Simon bongoi ka'a porocaya. Tutang uli ponopondus io turus nutut Pilipus. Tandahelan-tandahelan ijo nyolung, nguan Simon tohelan-helan.

¹⁴Rasul-rasul ang Yerusalem ngonih ijo ulun-ulun Samaria jari norima auh Pohotala. Bain tului orih iro nyoruhan Petrus tutang Yohanes nokuh anan.

¹⁵Kotihka Petrus tutang Yohanes johcok, iro bodo'a ahkan ulun-ulun Samaria rih mangat, iro ngondahpot Roh Pohotala,

¹⁶tului Roh Pohotala jaha lombut ngowasa ihcobehti ka tahkan iro; iro punan ponopondus aang aran Tuhan Yesus iou.

¹⁷Turus Petrus doro Yohanes nginaoh longoi iro ngosan kuhung ulun-ulun Samaria rih; mahka iro norima Roh Pohotala.

¹⁸Amat Simon nohto ijo tului longon rasul-rasul nginaoh ngosan ulun-ulun Samaria rih, Roh Pohotala tononga ahkan iro. Tului orih Simon ngomin duit ahkan Petrus doro Yohanes,

¹⁹turus nuhtui, ‘‘Nonga ahkak'ku kowasa rih ka'a, mangat amat longok'ku konina ang iai iou, ulun rih ahkan norima Roh Pohotala.’’

²⁰Tahpi Petrus mutah, ‘‘Colahkarih ihko tutang duit'mu! Ihko ngohuoh ponongan Pohotala duon ponoli umba duit?

²¹Ihko earo hak ahkan umba ang nguan gawin ihkai, tului ahtoi'kam eam morong toharep Pohotala.

²²Tului orih nohtahohrih kohondak ahtoi'mu kolouorih ijo ja'at rih tutang nyawotrih umba Tuhan mangat Io ngapun tirukahtoi'mu ijo ja'at orih!

²³Tului ahku kota'an ihko tuwi umba kohiri ahtoi, tutang tonojihpon bain koja'at.’’

²⁴Turus Simon nuhtui umba Petrus tutang Yohanes, ‘‘Dohop nyawot umba Tuhan mangat eam ihco ka tahkan ijo Konduang-konduang nuhtui orih nyolung ang ahku.’’

²⁵Uli Petrus tutang Yohanes nonga kosaksian tutang mborihta auh Tuhan, Petrus doro Yohanes buli nokuh Yerusalem. Tutang aang ponjolanan iro mborihta Kabar Hinut rih ang aro lowu-lowu Samaria.

²⁶Ihcobehti molehkat Tuhan nuhtui umba Pilipus, ‘‘Has, hihkas! Tulak nokuh hila solahtan, nokuh jalan ijo nyambung Yerusalem umba Gasa.’’ Jalan rih tonih.

²⁷Mahka Pilipus rih hihkas. Aang ohkot rih anai ihcobehti pogawai istana Etiopia ijo rahat a'ang ponyalai buli nokuh lowuioh. Ulun rih 'cobehti pogawai isung ijo mongowasa botanggung-jawab ngosan paring ponahtou Kandake, rahtu lowu Etiopia. Ulun rih jari tulak nokuh Yerusalem mangat sombayang ahkan Pohotala, tutang huntuh, rahat io buli hapa kolehtakuda. Pondehan tuot ang kolehtaoh rih, io mbasa surat Nabi Yesaya.

²⁹Roh Pohotala nuhtui umba Pilipus, ‘‘Tulak ngondoni kolehta orih rih.’’

³⁰Mahka Pilipus tulak ngondoni kolehta kuda rih, turus io ngonih ulun rih mbasa Buhku Nabi Yesaya. Pilipus ngisok umba io, ‘‘Kuwoh Tuan solembang umba ijo Tuan mbasaoh rih?’’

³¹Ulun rih mutah, ‘‘Koloukuwoh ahku solembang, amat eam aro ulun ijo monarangoh ahkak'ku?’’ Turus io ngonin Pilipus jahkat kolehtaoh tutang tuot doni io.

³² Tuh io ayat ijo konomasaoh rih, ‘‘Io kolou tobiri ijo onin ahkan tonyombalih, kolou anak tobiri ijo eam ngoriak amat buluioh tonguting, kodorih ka'a io eam nuhtui ihco kotihkap auh ka.

³³Io tongorana tutang konuan hawui eam adil. Hasong-Oh tonguhut tahkan isun tana nyiring ihcobehti ka, eam anai ijo duon mander tohou uhtus lihit-Oh.’’

³⁴Pogawai isung tahkan Etiopia rih nuhtui umba Pilipus, ‘‘Cuba nyorihtaoh ahkak'ku, iai ijo hion nabi tuh? Aropoh bongoi ata'ai ulun bohkon?’’

³⁵Mahka Pilipus ka nopara pander; io hapa ayat-ayat rih kolou pahtuk ahkan mborihta Kabar Hinut tohou Yesus ahkan pogawai isung rih.

³⁶Ang beteng jalan iro johcok ihco unuk ijo tohko danumoh. Pogawai isung rih nuhtui, ‘‘Topahjah orih anai danumoh! Inon hino ijo magun kurang ahkan mopondus ahku?’’ [

³⁷Pilipus nuhtui, ‘‘Amat Tuan porocaya umba kotuwi ahtoi, Tuan tou ponopondus.’’ ‘‘Ahku porocaya Yesus Kristus orih Anak Pohotala’’ hion pogawai isung tahkan Etiopia rih.]

³⁸Turus pogawai isung rih nyuhu potondo kolehtaoh, pongohuli iro duo Pilipus tutang pogawai rih, nyohowu nyolong 'kan luwang danum tutang Pilipus mopondus io.

³⁹Kotihka iro bolua tahkan aang danum, Roh Pohotala ngomin Pilipus tahkan anan. Pogawai isung tahkan Etiopia rih eam nohto Pilipus hino. Homboh kojorihoh pogawai isung rih noturus ponyalaioh.

⁴⁰Songolata'an Pilipus jari anai ang Asdod. Tutang kotihka io noturus ponomuoioh io mborihta Kabar Hinut tohou Yesus ang paring lowu nyiring johcok ang Kaisarea.