Read Ot Danum KESAH RASUL-RASUL 9 Bible Online

KESAH RASUL-RASUL 9 - Ot Danum bible

KESAH RASUL-RASUL 9

¹Pondehan orih Saulus turus ih jolik ngoporos tutang munu murid-murid Tuhan Yesus. Io tulak nokuh imam hajo,

²tutang nyawot surat kowasa ahkan tulak nokuh okon-okon lohpou sombayang ulun Yahudi ang Damaskus, mangat amat io sombang ang anan ulun-ulun ijo porocaya umba Yesus, io tou nawan iro, turus ngomin iro nokuh Yerusalem.

³Pondekan nihtu nokuh Damaskus kotihka jari doni umba lowu rih, songela anai koloang tahkan langit ngorolondang ang kodiling Saulus.

⁴Io ngonyahtu kotana turus ngonih auh nuhtui umba io, ‘‘Saulus! Saulus! Inon kotuluioh ihko ngoporos Ahku?’’

⁵‘‘Iairih Ihko Tuan?’’ hion Saulus mutah. Auh rih mutah, ‘‘Ahkurih Yesus ijo ihko nyorataoh.

⁶Tahpi huntuh kuatrih, tombok tutang turus ih nokuh lowu. Aang anan ahkan tonyorihtarih ahkan'kam, inon ijo harus ihko nguaioh.’’

⁷Ulun-ulun ijo umba hombo-homboh Saulus tokohcit nyiring eam duon pander; tului iro ngonih auh orih, tahpi iro eam nohto 'cobehti ulun ka.

⁸Turus Saulus kuat tutang ngomilat mahtaioh, tahpi mahtaioh jari eam tou nohto ino-inon hino. Jadi iro nambit longoi tutang niting io nyolong nokuh Damaskus.

⁹Tolu ondou kotahiu io eam tou nohto, tutang kotahin orih io eam kuman ata'ai ngorih samasino.

¹⁰Ang Damaskus anai ihcobehti murid Tuhan Yesus arai Ananias. Ang sino ponohto Tuhan nuhtui umba io. Tuhan nuhtui, ‘‘Ananias!’’ ‘‘Ahku Tuhan!’’ Ananias mutah.

¹¹Tuhan nuhtui, ‘‘Has ihko hihkas huntuh. Tulak nokuh lohpou Yudas ang Jalan Bujur. Ngisok ang anan ulun ijo bogare Saulus ijo asaroh tahkan kota Tarsus. Ulun rih beteng bodo'a,

¹²tutang ang ponopahjahoh io nohto ihcobehti ulunbahkas bogare Ananias lombut nokuh io tutang ngina longoi ang ngosanoh mangat io duon nohto hoduli.’’

¹³Ananias mutah, ‘‘Tuhan ahku jari aro ngonih ulun pander tohou ulun tuh, pahtukoh tohou sorahta-sorahta ijo io nguai tohimo ukup-Mu ang Yerusalem.

¹⁴Tutang huntuh io jari lombut 'kan ohtoi, duon ijin tahkan imam-imam kopala, ahkan nawan paring ulun ijo porocaya umba Tuhan.’’

¹⁵Tahpi hion Tuhan umba Ananias, ‘‘Tulak ih! Tului Ahku jari ngopili io ahkan mborihta tohou Ahku ahkan uhtus-uhtus ulun bohkon, ijo eam nambit Agama Yahudi tutang ahkan lahca-lahca hawui ahkan ukup Israel ka'a.

¹⁶Tutang Ahku bongok ahkan ngorinah ahkaioh, paring sorata, ijo harus io nginyam kotului Ahku.’’

¹⁷Mahka Ananias tulak nokuh lohpou rih tutang ngina longoi ang ngosan Saulus, ‘‘Konduang Saulus,’’ hion Ananias, ‘‘Tuhan Yesus ijo Konduang nohto ang beteng jalan kotihka Konduang rahat ahkan ohtoi, Iorih ijo nyuhu ahku lombut, mangat ihko duon nohto hino tutang tongowasa bain Roh Pohotala.’’

¹⁸Uhun rih ka'a anaiangihco kolou singap ohcin botahak tahkan mahtan Saulus tutang io duon nohto hoduli. Mahka io ka kuat, turus ponopondus.

¹⁹Tutang ulirih kuman, io monjadi ba'as hino. Saulus mohcon ang Damaskus, umba murid-murid Yesus pira-pira ondou kotahiuoh.

²⁰Io turus tulak nokuh karon-lohpou sombayang tutang nopara mborihtaoh ijo Yesus orihrih Anak Pohotala.

²¹Paring ulun helan ngonih borihta Saulus. Iro nuhtui, ‘‘Eamkah io ijo ang Yerusalem jari munu paring ulun ijo porocaya umba Yesus? Io lombut nokuh ohtoi kopuna unuk nawan tutang ngomin iro ahkan imam-imam kopala!’’

²²Tahpi Saulus sasar ba'as pongarohoh. Tanda-tanda ijo io nyorihtaoh tohou Yesus kodorih moyakinoh ijo Yesus rih Lahca Ponyolamat, nyiring ulun-ulun Yahudi ijo mohcon ang Damaskus eam duon samasino molawan.

²³ Uli nokolou pira-pira ohkot kotahiuoh ulun Yahudi bohaum kani munu Saulus.

²⁴Tahpi rancana'ndo ta'an bain Saulus. Hondou homalom iro ngindoi ang bauntukang kotalowu Damaskus ahkan munu io.

²⁵Aang sino ngolomi murid-murid Saulus ngomin io, posuluhoh umba tali ang koranjang, nguha diang kotalowu rih.

²⁶Saulus tulak nokuh Yerusalem tutang aang anai io ngurah jalan pohihco aropoh umba murid Yesus. Tahpi iro mihkoh umba io, tului iro jaha porocaya ijo io moro-morong ius monjadi murid Yesus.

²⁷Pongohino Barnabas lombut nyombang Saulus, turus ngomin io nokuh rasul-rasul. Barnabas pander ahkan iro koloukuwoh Saulus nohto Tuhan ang beteng jalan, tutang koloukuwoh Tuhan nuhtui umba io. Barnabas mander ka'a, tohou koloukuwoh bohanyioh Saulus majar tutang bopander ang Damaskus hapan aran Tuhan Yesus.

²⁸Mahka orih Saulus mohcon umba iro, tutang bosaksi honong komotongoh ang hopus lowu Yerusalem hapan aran Tuhan Yesus.

²⁹Saulus hopander tutang hojawab ka'a umba ulun-ulun Yahudi ijo hapa basa Yunani, tahpi iro ngurah jalan munu io.

³⁰Kotihka ulun-ulun porocaya ijo bohkon ngota'an tohou hal orih, iro ngomin Saulus nokuh Kaisarea, pongohuli ngirim io nokuh Tarsus.

³¹Mahka ukup-ukup ang hopus Yudea, Galilea tutang Samaria nyolung boranai. Aang pondohop Roh Pohotala, homboh mihkoh umba Tuhan ukup-ukup rih botambah ba'as tutang mondahang aro.

³²Petrus tulak nokuh umo-umoh masap ukup-ukup. Aang ihco ondou io masap ukup Tuhan ijo mohcon ang Lida.

³³Ang anan io hosombang umba ihcobehti bahkas bogare Eneas, ijo mahtoibehtiu tutang eam duon io kuat-kuat tahkan unuk kalingoh kotahin jalu toun.

³⁴Petrus nuhtui umba Eneas, ‘‘Eneas, Yesus Kristus kani ngopios ihko. Kuat tutang ngohtun unuk kaling'mu rih.’’ Ohkot rih ka'a Eneas kuat.

³⁵Paring ponduduk lowu Lida tutang Saron nohto Eneas, turus iro paringoh porocaya umba Tuhan.

³⁶Ang Yope anai ihcobehti ulunbawi bogare Tabita. Io ihcobehti ulun ijo porocaya umba Tuhan Yesus. (Araioh aang bahasa Yunani, iorih Dorkas, ijo rimaioh uhcang.) Io toturus ih nguan hal-hal ijo pios, tutang ndohop ulun porosbolum.

³⁷Aang ohkot rih io mondam turus mahtoi. Uli otuioh tongopondus numbun hadat, otuioh ponokaling ang tahkun ijo ang diang.

³⁸Yope eam pira kokahcui tahkan lowu Lida. Jari ang ohkot murid-murid Yesus ang Yope ngonih Petrus anai ang Lida, iro nyuhu duo behti tulak nokuh Petrus homboh pohtoh tuh, ‘‘Jele-jeleng lombut nokuh ohtoi.’’

³⁹Petrus turus tulak hawui homboh iro. Kojohcokoh ang anan, io konomin iro nokuh tahkun ijo ang diang. Paring balu ang anan ngorumbung Petrus tutang nangih, tutang pokarah ahkaioh hahtiu-hahtiu, tulang jubah-jubah ijo tonusuk Dorkas ahkan iro ohkot io magun bolum.

⁴⁰Petrus nyuhu iro paringoh soluka, turus Petrus nehku tu'utoh tutang bodo'a. Pongohuli io nohimo otun Dorkas tutang nuhtui, ‘‘Tabita, monyun!’’ Mahka Dorkas nguap mahtaioh, tutang kotihka io nohto Petrus, io turus tuot.

⁴¹Turus Petrus nambit longoioh, tutang dohop io tombok. Pongohino rih Petrus na'ah ulun-ulun ijo porocaya ang anan homboh umba balu-balu rih, turus nyarah Dorkas ijo jari bolum huli rih ahkan'ndo.

⁴²Kabar tohou angjadi rih tosiar nokuh hopus Yope, nyiring aro ulun porocaya umba Yesus kolou Lahca Ponyolamat ahkan'ndo.

⁴³Petrus mohcon ang anan pira-pira ondou hino ang lohpou ihcobehti ponyamak uhpak ohcin ijo bogare Simon.