Read Ot Danum RUMA 11 Bible Online

RUMA 11 - Ot Danum bible

RUMA 11

¹ Ahku ngisok. Inonrih Pohotala jari dian ukup Aiu bongoi? Puna eam! Ahku bongok ihcobehti ulun Israel lihit Abraham, tutang tahkan lihting Benyamin!

²Eam! Pohotala eam dian ukup Aiu ijo jari tongopili-Oh tahkan topahtuk. Konduang-konduang kota'an inon ijo tonyurat a'ang Surat Borasih tohou Elia, kotihka io ngadu soal Israel umba Pohotala. Elia nuhtui,

³ ‘‘Tuhan ulun-ulun jari munu nabi-nabi-Mu tutang moluhtek mesbeh-mesbeh porahpah ahkan-Mu. Mohcon ahku ihcobehti arop tutang mimas munu ahku.’’

⁴ Inonrih auhputah Pohotala ahkan Elia? Pohotala mutah, ‘‘Ahku jari ngina pihtu kujan behti ahkak-Ku bongok. Iro jaha pu'u nyembah Dewa Ba'al.’’

⁵Kodorih ka'a huntuh tuh: Anai puhta honjiot ulun-ulun ijo jari tonopili bain Pohotala tului Pononganasi-Oh.

⁶Io ngopili iro hogalang Pononganasi-Oh, tutang bohkon hogalangoh ang gawiuo. Tului amat kopili Pohotala rih hogalangoh gawin ulun, mahka pononganasi Pohotala rih eam hino pononganasi ijo sojahti.

⁷Jadi, koloukuwoh? Ukup Israel eam ngonduon, inon ijo konurah. Ijo ngonduoioh tihkasrih bagian koik ulun-ulun ijo jari ponitih bain Pohotala. Ijo bohkon paringoh mahang kuhungoh toharep pona'ah Pohotala.

⁸ Tului ang luwang Surat Borasih tonyurat koloutuh, ‘‘Pohotala napa ahtoi tutang tiruk iro monjadi hobolulang; tutang nyiring huntuh, mahtan iro eam duon nohto, tutang tolingan iro eam duon ngonih.’’

⁹ Dawid nuhtui ka'a, ‘‘Nauhoh pestan-pestan iro monjadi sokohtung bagi iro bongoi, tutang monjadi lowong unuk iro ngonyahtu tutang luhtek!

¹⁰Nauhoh topahjah iro monjadi pindong mangat iro eam duon nohto; tutang nauhoh iro monjadi hojokong turus-jahamoh.’’

¹¹Ahku ngisok hino. Kotihka ulun Yahudi nyahtu, kuwohrih rih nyolung mangat iro luhtek? Samasino eam! Tahpi tului iro bodusa, mahka uhtus bohkon malah tonyolamatoh, nyiring kotuluioh ulun Yahudi hiri ahtoioh toharep uhtus bohkon rih.

¹²Tului uhtus Yahudi bosala tutang eam numbun konohuang Pohotala, mahka uhtus-uhtus bohkon tomorehkat bain Pohotala. Inon hino amat kohihcon uhtus Yahudi umba Pohotala monjadi pios huli; puna labih hajo borehkat ijo ahkan tononga bain Pohotala!

¹³Tahpi huntuh piosrih ahku bopander umba Konduang-konduang ijo bohkon uhtus Yahudi! Kotahin tuh, kolou rasul ahkan uhtus-uhtus ijo bohkon Yahudi, ahku paham ngahtang isung tugas'ku.

¹⁴Ahku moharap ahku dahpot polombut hiri ahtoi aang uhtus aik bongok, mangat umba jalan orihrih ahku duon nyolamat ihcokobagi tahkan iro.

¹⁵Tului iro tonulak bain Pohotala mahka kohihcon kolunon umba Pohotala monjadi pios hoduli; inon hino amat iro tonorima bain Pohotala! Puna rih sama iou kolou ulun mahtoi bolum hoduli!

¹⁶Amat ihcokohiris luhte ijo pahtuk rih jari tononga ahkan Pohotala, orih rimaioh sohapus luhteoh tononga ahkan Pohotala ka'a. Tutang amat uhat pu'un kahju anai ain Pohotala, orih rimai da'ai-da'aioh anairih ain Pohotala ka'a.

¹⁷Ihcokobagi tahkan da'an-da'an zaitun — yorih ulun-ulun Yahudi — ius tonohtok. Tutang ang lohkun tohtok rih nutung umba da'an zaitun himba, yorih Konduang-konduang ijo bohkon uhtus Yahudi. Konduang tonutung ang anan, mangat Konduang nginyam karonaang ijo pios, tahkan pombolum rohani ulun-ulun Yahudi.

¹⁸Bain tului orih, ara ihkam ngohu eteng iro ijo jari tonohtok kolou da'an rih. Ihkam harus ingat ijo ihkam tihkas da'an ih. Tutang eamoh da'an ijo nonga ukun ahkan uhat, molekan uhat ijo nonga ukun ahkan da'an.

¹⁹Tahpi Konduang ahkan nuhtui, ‘‘Yo, tahpi da'an-da'an orih tonohtok mangat ahku duon tonyombungoh ang bahtang oh!’’

²⁰Orih puna morong. Tahpi iro todian tului iro eam porocaya, rahatoh Konduang tonorima tului Konduang porocaya. Jadi ara Konduang monjadi bojuhu kotuluioh, sopunaoh Konduang pahtut komo kihkoh.

²¹Tului amat Pohotala eam komo sayang ahkan ndian ulun Yahudi, ijo kolou da'an-da'an asli rih, ara ngohu Io ahkan komo sayang ahkan ndian Konduang!

²²Jadi ang ohtoi ihto nohto eaminon kopiosoh Pohotala, tutang eaminon mahangoh ka'a Io. Io botindak mahang toharep iro ijo bodusa, tahpi Io hinut ahtoi tohimo Konduang — asar Konduang tehtep bolum tahkan kohinut-Oh. Amat eam, mahka Konduang ka'a ahkan konondian.

²³Tutang tohou ulun-ulun Yahudi rih, amat iro tondo morisang eam porocaya, mahka iro ahkan tonorima hoduli; tului Pohotala bokowasa ahkan norima iro hoduli.

²⁴Konduang ijo bohkon asal tahkan uhtus Yahudi, sama kolou da'an tahkan bahtang zaitun himba. Nah, amat Konduang, molawan umba sipat Konduang, duon tonyombung ang bahtang zaitun asli, mahi hino ulun-ulun Yahudi ijo tonindung umba da'an-da'an zaitun asli rih. Puna labih murah hino ahkan Pohotala duon mombuli iro aang pu'un zaitun iro bongoi.

²⁵Konduang-konduang! Ahku harap ihkam, ara komo jari kosono kokaro-karoioh. Tului anai ihco hal ijo konohuang bain Pohotala, tahpi ijo jaha ngota'an ulun. Tutang ahku kani ihkam ngota'an yorih tuh: Ihco kobagi tahkan ulun Yahudi mahang ahtoioh, tahpi sikap iro rih, ahkan toturus tihkas johcok jombalah ulun-ulun bohkon Yahudi ijo lombut ahkan Pohotala jari sukup.

²⁶ Kodorihrih paring ulun Yahudi ahkan solamat. Tului ang luwang Surat Borasih tonyurat koloutuh, ‘‘Lahca Ponyolamat ahkan lombut tahkan Sion; Io ahkan ngudap kokaro koja'at tahkan lihit Yakub.

²⁷ Ahku ahkan ngarut bowot tuh umba iro aang ohkot Ahku ngapun dosa-dosa iro.’’

²⁸Kotului ulun Yahudi eam kani norima Kabar Hinut tahkan Pohotala mahka iro monjadi musuh Pohotala; tutang orih puna monjadi koutungan bagi Konduang ijo bohkon Yahudi. Tahpi tului ngopili Pohotala, mahka ulun-ulun Yahudi rih tahtap ponongasi Pohotala tului tahtu ajuh iro.

²⁹Tului amat Pohotala mitih ulun tutang mborehkat ulun rih, Pohotala eam pu'u nguhut huli inon ijo ius konuai-Oh.

³⁰Lomoi ihkam eam tunduk umba Pohotala. Tahpi huntuh Pohotala jari ngorinah ijo ihkam liwus tahkan kosalan, tului ulun-ulun Yahudi eam tunduk.

³¹Kodorih ka'a umba ulun-ulun Yahudi rih. Uhuntuh iro eam te'et umba Pohotala, mangat ihkam tongorinah liwus tahkan kosalan. Tahpi noin iro ka'a ahkan tongorinah liwus tahkan kosalan iro.

³²Tului Pohotala jari mohonau paring ukup ulun tongowasa bain koeamkote'etoh, mangat Io duon ngorinah pongasihan-Oh ahkan iro paringoh.

³³ Tu'u-tu'u hebat kotahtou Pohotala! Tu'u-tu'u hajo kowasan kohorahti tutang pongotaan Aiu! Iaikah ijo dahpot nyolidik koputusan-koputusan-Oh? Iaikah ijo dahpot nyolembang cara-cara Io bogawi?

³⁴ A'ang Surat Borasih tonyurat koloutuh, ‘‘Iaikah ijo ngota'an tiruk Tuhan? Iaikah ijo duon nonga tingak Ahkai-Oh?

³⁵ Iaikah ijo pu'u nonga aang'co ahkan Tuhan nyiring duon nutut balos-Oh?’’

³⁶ Pohotala ijo naoi kokaron aangihco. Paringoh uras asar tahkan Pohotala tutang anairih bagi Pohotala. Ahkaioh horomat nyiring turus-jaham! Amen.