Read Ot Danum RUMA 12 Bible Online

RUMA 12 - Ot Danum bible

RUMA 12

¹Konduang-konduang! Pohotala ngarinah asioh umba ihto. Orih kotuluioh ahku nyawot honong paham mangat ihkam monyorah arop'kam, kolou ihco porahpah ijo bolum, ijo khusus ahkan Pohotala tutang ijo ngojorih ahtoi-Oh. Sombayang'kam ahkan Pohotala koharusoh kolouorih.

²Ara umba sipat-sipat kolunon tuh. Nauhoh Pohotala nguan sipatarop'kam monjadi bohua, mangat ihkam hubah. Honong kodorih ihkam sanggup ngota'an konohuang Pohotala — yorih, inon ijo pios tutang ijo ngojorih ahtoi Pohotala tutang ijo soporuna.

³Pohotala jari nonga pononganasi ahkak'ku. Orih kotuluioh ahku moningakoh Konduang-konduang paringoh: Ara komo arop labih isun tahkan ijo kotu'uioh. Hondakoh Konduang-konduang monilai koada'an arop'kam honong randah ahtoi; nyino-nyinong behti monilai aropoh numbun koduon ijo tonongaoh Pohotala ahkaioh bain kotului io porocaya ahkan Yesus.

⁴ Behtin ihto tepun aro ramui. Nyinong ramui anai gawin aiu bongoi.

⁵Kodorih ka'a umba ihto. Oluka ihto paringoh aro, tahpi ihto kolou ihco kobehti tului ihto hihco a'ang Kristus. Tutang ihto nyino-nyinong hosambung ihco umba ijo bohkon kolou ramun-ramun tahkan ihco behti.

⁶ Ihto nyino-nyinong anaitepun pononga-pononga pohalu ijo hokobohkon. pononga-pononga rih tononga bain Pohotala ahkan ihto numbun pongasihan-Oh. Tului orih ihto harus hapa pononga-pononga rih. Ulun ijo tepun pononga ahkan mborihta Kabar Hinut tahkan Pohotala, harus mongabar bolihta tahkan Pohotala rih, numbun koba'as ijo anai aang io.

⁷Ulun ijo tepun pononga mangat dohop ulun bohkon, harus tu'u-tu'u dohop ulun bohkon. Ulun ijo anai tepun pononga ahkan pongajar harus tu'u-tu'u majar.

⁸Ulun ijo tepun pononga nonga somangat ahkan ulun bohkon, harus io tu'u-tu'u nonga somangat, ahkan ulun bohkon. Ulun ijo tepun pononga ahkan moronga umba ulun bohkon, inon ijo anai iotepuioh, harus nguaioh orih honong kolomun ahtoi numbun koharusoh. Ulun ijo tepun pononga ahkan monjadiokon, harus tu'u-tu'u monjadiokon ulun. Ulun ijo tepun pononga ahkan ngorinahoh pongasioh ahkan ulun bohkon pahtut molalusoh honong sanang ahtoi.

⁹Ngasi honong ihlas. Bosingi umba ijo ja'at, tutang nambitoh ahkan inon ijo pios.

¹⁰Konohuangoh Konduang-konduang saling mongasih ihco umba 'jobohkon honong mesra kolou ulun-ulun ijo hokonduang a'ang ihco kojolahan. Tutang konohuangoh ihkam saling hotosolu nonga horomat.

¹¹Bogawirih honong rajin. Ara kadian. Bogawirih ahkan Tuhan honong somangat tahkan Roh Pohotala.

¹²Konohuangoh Konduang porocaya umba Tuhan hawui kojorih, sabar ang luwang kosusah, tutang bokehtep bodo'a.

¹³Hodohoprih nyukupoh kotahpas ulun-ulun Kristen bohkon tutang nyambangrih Konduang-konduang 'cokoharap ijo eam Konduang ngosonooh, honong sanang ahtoi ang luwang lohpou'kam.

¹⁴ Nyawotrih ahkan Pohotala mangat Io nonga momborehkat ahkan ulun-ulun ijo kejam toharep ihkam. Yo, nyawot umba Pohotala mborehkat iro, ara monulut.

¹⁵Umbarih jorih, honong ulun-ulun ijo jorih, tutang nangihrih honong ulun ijo nangih.

¹⁶ Bolum rukun ihco umba 'jobohkon. Ara pokarah isung ahtoi, tahpi nyama arop'kam umba ulun ijo pinda ponuotoh. Ara madu arop labih pitar tahkanumba ijo komorongoh.

¹⁷Amat ulun nguan koja'at umba ihko, ara malosoh umba koja'at. Nguanrih inon ijo tongohuoh pios, bain paring ulun.

¹⁸Tahkan sila ihko, ngurah jalan sodahpot-dahpotoh ahkan bolum hokobuah umba paring ulun.

¹⁹ Konduang-konduang! Ara samasino malos kohiri umba kohiri, nauh Pohotala ijo mohukum. Tului ang luwang Surat Borasih tonyurat, ‘‘Ahku iou ijo malosoh, Ahku iou ijo mohukumoh, hion Tuhan.’’

²⁰ Tobalikoh, amat musuh'mu bolo'u, nonga io ukun, tutang amat io tohjah-bolaioh, nonga io korih. Tului umba nguan aang kodorih; Konduang nguan io monjadi mia.

²¹Ara mohonou arop'kam kalah bain ijo ja'at, tahpi kohinutoh Konduang ngalah koja'at umba komorong.