Read Ot Danum RUMA 13 Bible Online

RUMA 13 - Ot Danum bible

RUMA 13

¹Nyinong ulun harusrih tunduk umba pomoretah, tului eam aro pomoretah ijo eam dahpot kowasaoh tahkan Pohotala. Tutang pomoretah ijo tohko uhuntuh, molalusoh kowasaioh ngosan poretah tahkan Pohotala.

²Orih kotuluioh ulun ijo molawan pomoretah sama iou umba molawan inon ijo jari tonahtap bain Pohotala. Tutang ulun ijo nguan kodorih ahkan norima hukum.

³Tului ulun ijo nguan ang pios, eam usah mihkoh umba pomoretah. Baya ulun ijo nguan koja'at iou ijo pahtut mihkoh konohukum. Amat Konduang jolik, mangat Konduang eam komo kihkoh umba pomoretah, Konduang nguan kopios mahka Konduang ahkan tonara.

⁴Tului pomoretah anairih jihpon Pohotala ijo bogawi ahkan kopios'kam. Tahpi amat Konduang nguan koja'at, puna Konduang harus mihkoh ahkaioh, tului eamoh sia-sia iou io bokowasa ahkan mohukum ulun. Io anairih jihpon Pohotala, ijo muhtusoh hukum Pohotala ahkan ulun-ulun ijo nguan koja'at.

⁵Orih kotuluioh Konduang harus tunduk umba pomoretah — eam tihkas kotului konduang eam kani tonohukum, tahpi ka'a tului auh ahtoi-bua'kam.

⁶ Orih ka'a alasanoh ombai Konduang bayar pajak, tului pomoretah anai pogawai Pohotala ijo molalus gawiu ijo khusus tuh.

⁷Jadi bayarlah iou ahkan pomoretah inon ijo Konduang harus bayar ahkaioh. Bayar iou pajak, amat Konduang harus bayar pajak, bayar iou cuhkai amat Konduang harus bayar cuhkai. Morega iro ijo harus tomorega, tutang mohoromat iro ijo harus tomohoromat.

⁸Ara tohutang inon ka, umba iai ka'a, kocoali tohutang kasih umba sama arop'kam. Tului ulun ijo mongasi sama aropoh jari molalus hukum Museh.

⁹ Tului hukum agama Yahudi, yorih: Ara hobandung; ara munu; ara nahkou; ara jolik tepun inon ijo ulun bohkon tepui; paringoh rih sama-sama umba hukum-hukum ijo bohkon, jari bulat monjadi ihco hukum iou, yorih, ‘‘Ngasirih sama ulun kolou ihko mongasi arop'mu bongom.’’

¹⁰Ulun ijo mongasi ulun bohkon, eam ahkan nguan ang ja'at umba ulun rih. Jadi, ulun ijo mongasi sama aropoh, iorih ulun ijo jari molalus paring syarat hukum agama.

¹¹Bohkontahkan paringoh rih, ihkam ngota'an, ijo huntuh anai ohkot ahkan'kam, ahkan monyun tahkan tiruh. Tului ohkot ahkan ihto tonyolamat ius labih doni huntuh, tahkanumba ohkot ihto punan nopara porocaya.

¹²Kopindong ius doni nokalou; tutang eam pira hino ahkan boloang. Jadi, pios ihto tondo nguan gawin-gawin kopindong rih. Ihto harus monyuhkup arop ihto umba pokahkas koloang.

¹³Ihto harus nguan hal-hal tonohoromat kolou ijo kopu'uoh, konuan ulun aang koloang ondou. Ara pesta rami molowi bahtasoh, ata'ai nyiring bobusau. Ara ngihal, ata'ai tobiat eam morong. Ara rajin hokolahi, ata'ai hiri ahtoi.

¹⁴Nauhoh Tuhan Yesus Kristus iou ijo nahtap inon ijo ihkam pahtut nguaioh. Tutang ara numbun tobiat ulun ijo bodusa ahkan momeda kojolikbolai.