Read Ot Danum RUMA 16 Bible Online

RUMA 16 - Ot Danum bible

RUMA 16

¹Ahku jorik pokosono konduang ihto ijo bawi, Pebe. Io ndohop ukup Pohotala ang Kengkrea.

²Tonorimarih io kolou ihcobehti, tahkan ukup Tuhan ka'a. Puna kolourih ulun-ulun ijo porocaya umba Pohotala harus norima ihco umba ijobohkon. Dohop io amat io porulu pondohop tahkan ihkam, tului io bongoi jari dohop aro ulun — tame ahku.

³ Nyampaioh tabe'ku ahkan Priskila tutang Akwila jolahak'ku ijo hombo-homboh bogawi ahkan Kristus Yesus.

⁴Iro bilak mahtoi, tului kani monyolamat ahku. Ahku botorimakasih ahkan iro — tutang eam ahku bongok iou, tahpi paring ukup uhtus bohkon ijo eam Yahudi ka'a botorimakasih umba iro.

⁵Nyampaiohrih ka'a tabe'ku ahkan ukup ijo puhpung ang lohpou'ndo. Tabe ahkan Epenetus ijo ahku ngasihoh. Iorih ulun ijo pahtukoh porocaya umba Kristus ang tana Asia.

⁶Tabe'ku ka'a ahkan Maria. Io bogawi kodorih karas ahkan'kam.

⁷Nyampaioh ka'a tabe'ku ka'a ahkan Andronikus tutang Yunias. Iro ihcolihting uhtus umba ahku tutang pu'u nyolong sipir hombo-homboh ahku. Houn umba ahku porocaya umba Kristus, iro soun porocaya. Iro bosewut louk dolang rasul.

⁸Tabe'ku ahkan Ampliatus ijo ahku ngasihoh, tului io sama-sama umba ahku jari hihco umba Tuhan.

⁹Nyampaioh iou horomat'ku umba Urbanus, jolahan ihto ijo bogawi hombo-homboh umba ihto, ahkan Kristus. Ka'a horomat'ku ahkan Stakhis ijo ahku ngasioh.

¹⁰Tabe ahkan Apeles. Kokehtepoh umba Kristus jari gihtan. Tabe'ku ka'a ahkan bobuhan Aristobulus,

¹¹tutang ahkan Herodion. Io ihcolihting uhtus umba ahku. Ka'a tabe'ku ahkan konduang-konduang sokoporocaya aang bobuhan Narkisus.

¹²Tabe ahkan Tripena tutang Tripesa, ijo bogawi paham mohalu Tuhan, tutang ahkan Persis ijo ahku ngasioh. Io ka'a ius bogawi ahkan Tuhan.

¹³ Tabe ahkan Rufus tutang inaioh, ijo kolou inai'ku bongok. Rufus rih anairih ulun ponitih Tuhan, ijo tonara.

¹⁴Nyampaiohrih tabe'ku ahkan Asinkritus, Plegon, Hermes, Patrobas, Hermas tutang paring konduang sokoporocaya ijo hombo-homboh umba iro.

¹⁵Tabe ahkan Filologus tutang Yulia; ahkan Nereus tutang konduang bawioh; ahkan Ulimpas tutang ahkan paring ulun porocaya ijo hombo-homboh umba iro.

¹⁶Hotabe-taberih cara jorih ijo mesra, kolou konduang Kristen. Paring ukup Kristus monyampaioh taben'ndo ahkan Konduang-konduang.

¹⁷Konduang-konduang! Ahku nyawot umba'kam: Ati-atirih toharep ulun-ulun ijo polombut kopisah tutang monderoh koporocaya ulun ahkan Tuhan. Hal rih hokolawan umba inon ijo jari tongajar ahkan ihkam. Ngomahcurih iou, ulun-ulun kolou orih.

¹⁸Tului ulun-ulun ijo nguan kodorih bohkonoh bogawi ahkan Kristus Tuhan ihto, molekan ahkan momeda kojolikahtoi'ndo bongoi. Honong bujukan tutang tuhtui ijo manih-monyak iro nihpu ulun-ulun ijo eam ngota'an ino-inon.

¹⁹Paring ulun jari ngota'an ijo ihkam bokehtep ahkan ajaran tohou Kabar Hinut ijo tahkan Pohotala. Tutang ahku sanang ngosan hal orih tohou ihkam. Ahku jolik mangat ihkam solembang tohou hal-hal ijo pios; tutang uong tohou hal-hal ijo ja'at.

²⁰Pohotala ijo nonga kosanangkomangat ahkan ulun, ahkan jeleng ngina Sehtan pinda kowasai'mu tutang moluhtekoh. Keleh Konduang-konduang toturus tomorehkat bain Yesus Kristus Tuhan ihto!

²¹ Timoteus, jolahak'ku monyapai tabeoh ahkan ihkam. Kodorih ka'a Lukius, Yason tutang Sosipater, Ihcolihting uhtus umba ahku.

²²Ijo nyurat surat tuh ahku bongok, Tertius, Ahku ngohawot tabe hokoduang ahkan ihkam.

²³ Gayus ngirim tabe ahkan'kam. Ahku mohcon ang lohpouoh, tutang unuk ukup sombayang ang anan. Erastus kopala nambitduit ponahtou lowu, ngirim tabeoh ahkan'kam. Kodorih ka'a konduang ihto Kwartus. [

²⁴Keleh Tuhan ihto Yesus Kristus momborehkat Konduang paringoh. Amen.]

²⁵Tonotararih ahkan Pohotala! Io bokowasa ngomba'as koporocaya Konduang sorurui umba Kabar Hinut tahkan Pohotala, ijo ahku mborihtaoh tohou Yesus Kristus. Ahku mborihtaoh Kabar orih sorurui umba inon ijo tongorinah bain Pohotala; iorih tohou rancana Pohotala ijo jari boabad-abad kotahiuoh eam tongota'an ulun.

²⁶Tahpi huntuh, ang poretah Pohotala ijo abadi, rancana rih jari tongorinah tutang tomborihta ahkan paring uhtus ulun nguha kokaron surat bola nabi, mangat iro paringoh porocaya tutang bokehtep umba Pohotala.

²⁷Io ihco-ihcooh Pohotala. Io Mahahorahti. Keleh Io konahtang isung turus-jaham nguha Yesus Kristus. Amen. Horomat ihkai, Paulus, jihpon Kristus Yesus