Read Ot Danum RUMA 3 Bible Online

RUMA 3 - Ot Danum bible

RUMA 3

¹Amat kodorih inonrih utungoh monjadi ulun Yahudi? Tutang inonkah rimaioh numbun aturan sunat?

²Puna iou aro ka'a paedahoh! Pahtu-pahtukoh kotului ahkan ulun Yahudirih Pohotala momorocayaoh auh-auh Pohotala.

³Tahpi koloukuwoh amat ihco kobagi ulun Yahudi eam tehen? Kuwoh, tului orih Pohotala monjadi eam tehen?

⁴ Puna eam! Tului tarangrih Pohotala toturus morong, oluka nyinong ulun ngobalik. Luwang Surat Borasih, tonyurat, ‘‘Konohuang-Oh ihko bobukti morong a'ang inon ijo ihko ngohawotoh tutang ihko manang aang ohkot ihko ponosara.’’

⁵Tahpi amat komorong Pohotala jari mahi-mahi korinah, bain tului ihto nguan ijo eam morong, inonrih ijo kani ihto nuhtuioh? Ijo Pohotala eam adil amat Io mosara ihto? (Puna kisok orih wajar numbun kolunon.)

⁶Samasino eam! Tului amat Pohotala eam adil koloukuwoh Io duon mosara kolunon tuh?

⁷Tahpi amat tului konuan ulun ijo eam morong, inon ijo morong tohou Pohotala mahi-mahi lombut nyiring Io tonotara, ombai ulun ijo nguan koja'at rih magun tonosalan, kolou ulun bodusa?

⁸Tutang ombai ihto eam tou nuhtui, ‘‘Piosrih ihto, nguan koja'at mangat lombut kopios?’’ Puna anai ulun-ulun ijo mohina ahku honong tuhtuioh ijo ahku jari nuhtui kodorih. Ulun-ulun somahcam rih kopahtut-Oh tonahukum bain Pohotala.

⁹Nah, inon ponuot ihto kolou ulun Yahudi molowi kopioi tahkan ulun uhtus bohkon? Samasino eam! Jari ahku monarangoh, ijo, pios uhtus ulun Yahudi, oluka ijo uhtus bohkon paringoh ius konowasa bain dusa.

¹⁰ Kolou ijo tonyurat ang Surat Borasih, ‘‘Eam aro ihcobehti ka ijo morong,

¹¹earo ihcobehti ka ijo horahti tutang earo ihcobehti ka ijo nyembah Pohotala.

¹²Paring ulun ius ngonyajongoh arop tahkan Pohotala; paringoh jari lacat. Earo ihcobehti ka nguan ijo tu'u; ihcobehti ka eam!

¹³ Bolokung iro kolou luwang tanom ijo hobangah. Alik, bula, nyalut tahkan jolan'ndo, tutang biwih'ndo nopurus pitnah kolou wisa lohi.

¹⁴ Baun'ndo tuwi umba kutuk-kunuk hawui kohiri.

¹⁵ Ikang'ndo cahpat amat kani ngoporos tutang munu ulun.

¹⁶Kokahkas tutang kosusah tomorawuh'ndo ang umo-umoh.

¹⁷Iro bobulen nitoi jalan kosanang-komangat,

¹⁸ tutang eam mohoromat Pohotala.’’

¹⁹Huntuh ihto kota'an ijo paring ijo ius tonyurat luwang hukum agama Yahudi, anairih ahkan ulun-ulun ijo anai ang pinda hukum rih. Honong kodorih eam ihcobehti ka duon nonga alasan ino-inon hino, tutang paring kolunon duon tomokara bain Pohotala.

²⁰ Tului earo ihcobehti ka ahkantou hokopios umba Pohotala, bain tului ulun rih, nguan hal-hal ijo sombang aang hukum agama. Podahar hukum rih tihkas pokarah ahkan ulun, ijo ulun bodusa.

²¹Tahpi huntuh Pohotala ius nunjukoh jalan, koloukuwoh ulun tou hokopios umba Io: Tutang caraoh rih eam anai sakut pautoh umba hukum agama Yahudi. Buhku-buhku Museh tutang buhku-buhku nabi-nabi, justru ngorinah ang orih.

²² Ijo Pohotala nonga jalan ahkan ulun hokopios umba Io, tihkas amat ulun porocaya umba Yesus Kristus. Pohotala nguan hal orih ahkan paring ulun ijo porocaya umba Kristus; tului eam aro kobohkoioh.

²³Paring ulun jari bodusa tutang jajong tahkan Pohotala ijo kani monyolamatoh iro.

²⁴Tihkas tului pononganasi Pohotala ijo tonongaoh honong cuma-cuma, hokohihco ulun umba Pohotala monjadi pios hoduli, caraoh iorih; ulun tonoliwusoh bain Kristus Yesus.

²⁵Pohotala noparahpah Yesus Kristus, mangat honong popahtoi-Oh rih ulun tongorimahoh ius boliwus tahkan kosalaioh, amat iro porocaya umba Io. Pohotala nguan angkodorih ahkan ngorinah koadilan-Oh. Tului ang wayah ijo houn Pohotala ius nyolenankosabar ngindoi, toharep dusa-dusan ulun. Nyiring Io eam mohukum iro.

²⁶Tahpi huntuh Io botindak toharep dusa-dusan ahkan ngorinah komorong-Oh. Umba cara orih Io pokarahoh ijo arop-Oh morong, tutang nyinong ulun ijo porocaya ahkan Yesus, ponokarah-Oh kolou ulun ijo jari hokohinut hoduli umba Pohotala.

²⁷Bain kotului orih eam anai hino alasan, bagi ihto ahkan tama-tamam. Ombai kodorih? Inonrih, kotului ihto nguan ijo tomihtik a'ang hukum agama Yahudi? Eam. Tahpi tului ihto porocaya.

²⁸Kotului koputusaioh koloutuh: Ulun bokorinah jari hokohinut hoduli umba Pohotala, eam tului Io nguan inon ijo tomihtik a'ang hukum agama Yahudi, molekan tului Io porocaya umba Yesus Kristus.

²⁹Ata'aikah Pohotala rih Pohotalan ulun Yahudi bewe? Eamrih Io Pohotalan uhtus ulunbohkon ka'a? Yo. Puna Io Pohotalan uhtus bohkon ka'a!

³⁰ Tului Pohotala tihkas Ihco. Io ijo nonga jalan ahkan ulun-ulun Yahudi hokohinut hoduli umba Pohotala, tului iro porocaya. Tutang Iorih hino nongajalan ulun-ulun uhtus bohkon ka tou hokohinut hoduli umba Pohotala. Orih ka'a tului iro porocaya.

³¹Kuwohrih tuh rimai, ijo tului ihto porocaya umba Yesus Kristus, turus ihto dian hukum agama ulun Yahudi? Samasino eam kodorih! Malah justru koporocayan ihto orih, ihto moregaoh hukum rih.