Read Ot Danum RUMA 6 Bible Online

RUMA 6 - Ot Danum bible

RUMA 6

¹Amat kodorih inon ijo duon ihto nuhtuioh? Haruskah ihto toturus napa dusa mangat Pohotala mahi-mahi ngasi ihto?

²Puna eam! Dusa eam hino bokowasa umba ihto, jadi, kuwoh tou ihto hototurus bolum hawui napa dusa hino?

³Ngota'ankah Konduang-konduang ijo aang ohkot ihto ponopondus, ihto ponohihco umba Yesus Kristus? Tuh rimai ihto ponohihco umba popahtoi-Oh.

⁴ Umba pompondus orih, ihto tonanom umba Kristus tutang umba mahtoi homboh Io, mangat koloukuwohoh Kristus tonombolum tahkan popahtoi bain kowasan Amai ijo tonohoromat, kodorih ka ihto duon molalus ihco pombolum ijo bohua.

⁵Amat ihto jari monjadi ihco umba Kristus, tului ihto umba mahtoi homboh Io, ihto ahkan monjadi ihco umba Io ka'a kotului ihto umba tonombolum hoduli kolou Io.

⁶Ihto kota'an, ijo tobiat ihto ijo holu, kolou ulun jari mahtoi homboh Kristus ang kahju sopolahki, mangat kowasan tobiat ihto ijo bodusa rih tonoluhtek; hawui kodorih ihto eam hino tonojihpon bain dusa.

⁷Kotului amat ihcobehti mahtoi, ulun rih tonoliwusoh tahkan kuwasa dusa.

⁸Amat ihto jari mahtoi homboh Kristus, ihto porocaya ijo ihto ka, ahkan bolum homboh Io.

⁹Kotului ihto ngota'an ijo Kristus jari tonombolumoh tahkan popahtoi, tutang Io eam ahkan mahtoi hino; popahtoi jari eam hino bokowasa ngosan arop-Oh.

¹⁰Popahtoi ijo tonyuru Kristus, anairih popahtoi toharep dusa. Orih nyolung sino tikat iou ahkan turus-jahamoh. Tutang komonyun ijo tonitoi-Oh huntuh tuh anairih kobolum ahkan Pohotala.

¹¹Ihkam harus ka'a ngohu arop'kam mahtoi tahmo dusa, tahpi bolum a'ang kohico ijo tehen umba Pohotala, nguha Kristus Yesus.

¹²A'ai hino mohonourih dusa mongowasa pombolum'kam ijo usang, Konduang ara numbun konohuang ihkam ijo ja'at.

¹³A'airih ka'a Konduang nyorahoh ramun behtin'kam ahkan kowasa dusa, ahkan tohapaoh bagi konohuang-konohuang ijo ja'at. Tahpi nyorahoh rih arop'kam ahkan Pohotala monjadi ulun ijo jari hahtun tahkan popahtoi, nokuh pombolum. Nyorahoh arop'kam pari-paring ahkan Pohotala, mangat hapaioh ahkan nguanoh kohondak Pohotala.

¹⁴Dusa eam duon ngowasa ihkam, tului ihkam eam hino ang pinda hukum agama Yahudi. Tahpi ihkam pinda hukum pononganasi ain Pohotala.

¹⁵Huntuh, kuwoh koloputai-Oh? Toukah ihto bodusa, tului ihto eam hino ang pinda kowasa hukum agama Yahudi, molekan ang pinda kowasa pononganasi Pohotala? Samasino eam!

¹⁶Kota'ankah ihkam ijo amat ihkam monyorah arop ahkan ihcobehti ulun, mangat nguanoh konohuangoh, mahka ihkam anairih jihpon ulun, ijo ihkam heretoh rih — inonrih jihpon dusa ijo ngomin ihkam ahkan popahtoi ata'ai jihpon ijo heret umba Pohotala. Tutang honong kodorih, hokopios huli umba Pohotala.

¹⁷Tahpi torimakasih ahkan Pohotala! Tului lomoi ihkam jihpon dusa, tahpi huntuh ihkam honong kotuwi ahtoi heret umba ajar komorong ijo jari tunongaoh ahkan'kam.

¹⁸Ihkam ius tonoliwusoh tahkan dusa, tutang huntuh monjadi jihpon ahkan kohondak Pohotala.

¹⁹Tului koba'as norima'mu kolourih bolomu, ahku hapa sutu-sutu kojihpon, mangat ihkam labih jeleng nyolembangoh. Lomoi ihkam nyorah arop'kam koparingoh, monjadi jihpon ahkan hal-hal kojilok tutang ijo ja'at, ahkan konohuang-konohuang ijo ja'at. Kodorih ka'a huntuh, hondakrih ihkam monyarahoh arop koparingoh, monjadi jihpon bagi kohondak ain Pohotala, nguan konohuang-konohuang Pohotala ijo khusus.

²⁰Ohkot ihkam tohonjihpon bain dusa, ihkam eam konowasa bain kohondak Pohotala.

²¹Aang ohkot rih, koutungan inon ijo jari ihkam norimaoh tahkan hal-hal, ijo huntuh ihkam mia nguaioh? Gawi-gawi orih tihkas ngomin ihto nihtu popahtoi!

²²Tahpi huntuh ihkam jari konuwatoh tahkan dusa tutang monjadi jihpon Pohotala. Koutungan'mu iorih ijo Konduang bolum khusus ahkan Pohotala tutang hal orih, momuaoh pombolum sojahti tutang kototahiu.

²³Tului popahtoi orih rih uhpah tahkan dusa, tahpi pombolum sojahti tutang kototahiu hihco umba Kristus Yesus Tuhan ihto, anairih pononga ijo tonongaoh bain Pohotala honong cuma-cuma.