Read Ot Danum RUMA 7 Bible Online

RUMA 7 - Ot Danum bible

RUMA 7

¹Konduang-konduang'ku! Konduang paringoh jari ngosono hukum. Jadi, ihkam kota'an ijo kowasan hukum ijo ngosan ihcobehti, touhapan kotahin ulun rih magun bolum.

²Ihcobehti ulunbawi ijo ngomosai, porobasaoh, io konarut bain hukum umba bosaioh, tihkas kotahin bosaioh magun bolum. Amat bosaioh mahtoi, oruhoh rih tokuwat tahkan hukum ijo ngarut io umba bosaioh.

³Amat ulunbawi rih bolum umba ulunbahkas ijo bohkon aang uhun bosaioh magun bolum, mahka ulunbawi rih konohawot hobandung. Tahpi amat bosaioh jari mahtoi, mahka numbun hukum io bolohkak. Tutang amat io kani kawin hino umba ulunbahkas ijo bohkon mahka io eam konohawot hobandung.

⁴Kodorih ka'a hal-hal umba ihkam, Konduang-konduang'ku. Toharep hukum agama Yahudi ihkam jari mahtoi, tului ihkam ius ponohihco umba behtin Kristus, tutang monjadi barih Aiu, ijo ius tonombolum hoduli tahkan popahtoi. Io tonombolumoh tahkan popahtoi, ahkan ihto monjadi boguna bagi Pohotala aang pombolum ihto.

⁵Tului, lomoi ihto bolum numbun sipat-sipat kolunon. Aang ohkot orih kojolik-kojolik ijo bodusa, ijo lombut kotului anaioh hukum agama, nambit paranan a'ang arop ihto. Orih kotuluioh ihto nguanoh hal-hal ijo kojoriaioh nitu popahtoi.

⁶Tahpi huntuh ihto eam hino konarut ang hukum agama Yahudi. Ihto jari mahtoi toharep hukum ijo lomoioh ngowasa ihto. Ihto eam hino bosorah honong cara ijo usang, numbun hukum ijo sonurat. Huntuh ihto bosorah numbun cara ijo bohua ijo ngorinah bain Roh Pohotala ahkan ihto.

⁷ Amat kodorih, inon ijo tou ihto nuhtuioh? Ijo hukum agama Yahudi rih ja'at? Puna eam! Tahpi hukum rih ijo majar ahku tohou dusa. Ahku eam ahkan kota'an bokuhu rih inon, amat hukum agama rih eam nuhtui, ‘‘Ara bokuhu.’’

⁸Nguha hukum agama, dusa sapet ahkan mopolombut kokaron mahcam kojolik ijo bokuhu ang luwang ahtoi'ku; kotului amat hukum agama eam aro, mahka dusa ka mahtoi.

⁹Ahku lomoi bolum eamhapa hukum agama. Tahpi kotihka hukum agama lombut, dusa nopara bolum,

¹⁰tutang tului rih ahku mahtoi. Mahka hukum agama rih, ijo pahtukoh tongohuangoh ahkan nonga pombolum, malah orih polombut popahtoi ahkak'ku.

¹¹ Kotului nguha hukum agama rih, dusa sapet nyolong nihpu tutang munu ahku.

¹²Hukum agama asaroh lombut tahkan Pohotala, tutang nyinong poretah luwang hukum rih lombut-Oh tahkan Pohotala, jari adil tutang pios.

¹³Ho, Inonrih tuh rimai tului ijo pios rih mopolombut popahtoi ahkak'ku? Puna eam! Dusa iou ijo polombut popahtoi rih. Honong hapa ijo pios, dusa polombut popahtoi ahkak'ku, mangat sipat-sipat dusa gihtan honong tarang. Nguha poretah-poretah Pohotala rih bobuktirih, eaminon koja'atoh dusa.

¹⁴Ihto kota'an ijo hukum agama Yahudi, asar tahkan Roh Pohotala, tahpi ahku tuh ulun bolomu. Ahku jari ponodagang monjadi jihpon dusa.

¹⁵ Tului ahku bongok eam solembang anggawik'ku. Hal-hal ijo ahku jolik nguaioh, orih eam ahku nguai; tahpi hal-hal ijo ahku nyingi, orih malah ijo ahku nguaioh.

¹⁶Nah, amat ahku nguaioh hal-hal ijo hokolawan umba kojolikoh, orih rimai ahku ngahku ijo hukum agama Yahudi rih pios.

¹⁷Jadi, eam hino ahku kotu'uioh ijo nguanoh orih molekan dusa ijo mongowasa arop'ku rih.

¹⁸Ahku ta'an ijo eam aro aangihco ka ijo pios, ang luwang arop'ku, io rih luwang tobiat'ku, monjadi ulun. Tului anai kojolik aang ahku ahkan nguan kopios, tahpi ahku eam sanggup molalusoh.

¹⁹Ahku eam nguan ijo pios, ijo ahku jolik nguaioh, tombalikoh ahku nguan hal-hal ijo ja'at, ijo ahku eam kani nguaioh.

²⁰Amat ahku nguaioh hal-hal, ijo eam ahku jolik nguaioh, orih rimai bohkon ahku ijo nguaioh hal-hal rih, molekan dusa ijo ngowasa behtik'ku dih.

²¹Jadi ahku ngomin kobulatoh, ijo hukum tuhrih ijo nambit paranan; yorih ijo amat ahku jolik nguan ijo pios, mahka tihkas ijo ja'at bewe ijo lombut aang ahku.

²²Homboruak'ku jolik ahkan hukum ain Pohotala,

²³tahpi ahku sadar ijo luwang behtik'ku anai hino hukum bohkon ijo nambit paranan — io rih hukum, ijo hokolawan umba hukum ijo konolik'ku bain akal dasar aik'ku. Orih kotuluioh ahku tojorat aang hukum dusa ijo nambit paranan ang luwang arop'ku.

²⁴Nah, koloutuhrih koada'ak'ku; ahku moneet hukum Pohotala umba akal dasar'ku, tahpi honong tobiat kolunok'ku, ahku kalah aang dusa. Pahamrih kocolahkaioh ahku tuh! Iai ijo kani monyolamat ahku tahkan behtik'ku tuh, ijo ngomin ahku nokuh popahtoi? Botorimakasih ahku ahkan Pohotala! Io kani monyolamat ahku nguha Tuhan Yesus Kristus.