Read Ot Danum 1 KORINTUS 11 Bible Online

1 KORINTUS 11 - Ot Danum bible

1 KORINTUS 11

¹ Nutut sutu ang ahku, kolou ahku ka nutut sutu ang Kristus.

²Ahku nara ihkam, kobain ihkam toturus mingat ahku, tutang numbun auh ajar, ijo ahku nongaoh ahkan'kam.

³Tahpi ahku jolik ihkam ngota'an ihco hal hino, iorih, ijo, 'jo nyolung kopala ngosan ulun-ulun bahkas iorih Kristus; ijo nyolung ngosan oruh iorih bosaioh, ijo nyolung ngosan Kristus iorih Pohotala.

⁴Amat ihcobehti bahkas ang ohkot bodo'a, ata'ai aang ohkot nyapai borihta tahkan Pohotala ang toharep aro ulun, hapa tuhtup kuhung, mahka ulun rih mohina Kristus.

⁵Tutang amat ihcobehti bawi ang ohkot bodo'a ata'ai ang ohkot nyapai borihta tahkan Pohotala ang husuk aro ulun, eam hapa tuhtup kuhung, mahka ulunbawi rih ngomia bosaioh ijo monjadi kopala ngosan aropoh. Orih sama ka'a kolou jahka kuhung bawi rih jari tongalit.

⁶Kotului amat ihcobehti bawi eam kani hapa tuhtup kuhung, labih pios balouoh tonohtok. Tahpi amat ihcobehti bawi tonongalit kuhungoh ata'ai tonohtok balouoh, mahka orih ihco komia ahkaioh. Bain kotului rih labih pios io hapa tuhtup kuhung.

⁷ Ulun-ulun bahkas eam usah hapa tuhtup kuhung, tului io nyoramin aropoh, tutang kohajon Pohotala. Tahpi ulunbawi nyoramin kohajon ulunbahkas,

⁸ kotului ulunbahkas eam tonapa tahkan ulunbawi, tapi ulunbawi tonapa tahkan ulunbahkas.

⁹Ulunbahkas eam hino tonapa ahkan gunan ulunbawi, molekan ulunbawi tonapa kogunan ulunbahkas.

¹⁰Tului orih rih, ahkan ngojorih molehkat-molehkat, ihcobehti bawi harus hapan tuhtup kuhung, kolou tanda io ang pinda kuwasa bosaioh.

¹¹Oluka kodorih, aang pombolum ihto kolou ulun Kristen, ulunbawi eam bolum bongoi, lopas tahkan ulunbahkas, tutang ulunbahkas ka eam bolum bongoi, lopas tahkan ulunbawi.

¹²Kotului oluka ulunbawi ijo pahtukoh tonapa tahkan ulunbahkas, tahpi uliorih ulunbahkas konanak tahkan ulunbawi, tutang paringoh ang 'co orih lombut tahkan Pohotala.

¹³Cuba Konduang-konduang bongon nimbang hal-hal tuh: Kuwoh pios ihcobehti ulunbawi bodo'a ahkan Pohotala ang toharep ulun aro, eam hapa tuhtup kuhung?

¹⁴Tahkan ponyombang ulun aro, ihkam jari tongajar, ijo amat ulunbahkas hobalou ombu, orih ang'co ijo kurang pahtut.

¹⁵Tahpi bagi ulunbawi, balou tononga ahkaioh ahkan kolukup kuhungoh, tutang balou ombu anairih kobahinoioh.

¹⁶Orih! Amat anai ijo kani hojawab tohou masalah tuh, ihco-ihcooh ijo ahku dahpot nuhtuioh, iorih ijo pios ihto oluka ukup-ukup Pohotala bohkon, aang ulunaro tihkas tepun ihco kopatuh rih ang ukup; bohkon tahkanumba rih eam anai.

¹⁷Tohou ijo pongo tuh, ahku eam monara ihkam. Puhpung sombayang'kam, eamoh bobua ijo pios, molekan ijo eam pios.

¹⁸Aang pahtukoh ahku ngonih, ijo ang luwang puhpung-puhpung'kam anai hobarih-hobarih ijo saling hokolawan. Tutang ahku ngohu isut aro Kabar rih morong.

¹⁹Puna jari kopahtutoh lombut kopisah ang louk ihkam, mangat gihtan noin ia-iai ulun Kristen ijo sojahti.

²⁰Tahpi ang ohkot ihkam hopuhpung, ijo ihkam nguai rih, eam Ukunpesta Ain Tuhan.

²¹Tului ang ohkot kuman, ihkam nyino-nyinong hosolanja ngomin ukunoh bongoi, nyiring anai ijo eam sahpet dahpot ino-inon, tutang ijo bohkonoh monjadi bobusou.

²²Ombai kodorih? Eamkah Konduang anai tepun lohpou? Konduang duon kuman ngorih ang anan! Ata'aikah Konduang kani mopomia ukup Pohotala tutang ngomia ulun-ulun porosbolum? Inon ijo harus ahku nuhtui ahkan ihkam? Haruskah ahku monara ihkam? Eam! Samasino ahku eam ahkan monara ihkam.

²³Tului ijo ahku majaroh ahkan'kam, iorih ahku torimaoh tahkan Tuhan bongoi; ijo ang ngolomi orih, kotihka Yesus Tuhan ihto tomotanah, Io ngomin ruhte,

²⁴tutang ulimba Io ngohawot torimakasih ahkan Pohotala ngosan ruhte rih, Io molah-molah ruhte rih umba longoi-Oh, turus nuhtui, ‘‘Jituh behtik-Ku ijo tonosarah ahkan'kam. Nguan ka'a tuh ahkan ngenang Ahku.’’

²⁵ Kodorih hino ulimba opah kuman, Io ngomin sakir anggur hawui nuhtui, ‘‘Anggur tuh anairih, bowot Pohotala ijo bohua, tonosah umba dahak-Ku. Nyinong tikat ihkam ngorih tuh, nguanohrih tuh ahkan ngenang Ahku.’’

²⁶Puna nyinong tikat ihkam kuman ruhte tuh, tutang ngorih anggur tuh, ihkam mborihta popahtoi Tuhan, nyiring Io lombut.

²⁷Kobain tului orih, ulun ijo kuman ruhte Tuhan tutang ngorih anggur Tuhan, umba cara ijo eam pahtut, ulun rih bodusa toharep Tuhan, ijo jari monyarah behtiu tutang nusuh dahai-Oh.

²⁸Jadi, nyinong ulun harus moriksa aropoh houn, punai io tou kuman ruhte tutang ngorih anggur orih.

²⁹Kotului amat ulun kuman ruhte, tutang ngorih anggur, eam komo ijo Ukunpesta Tuhan rih, jorih behtin Tuhan, ulun rih kuman tutang ngorih ahkan norima hukum Pohotala ngosan aropoh bongoi.

³⁰Orih kotuluioh aro tahkan louk ihkam ijo poros tutang bolomu, tutang anai ka'a ijo mahtoi.

³¹Tahpi amat ihto moriksa arop ihto labih houn, ihto eam ahkan tonohukum bain Pohotala.

³²Tahpi amat ihto tonohukum Pohotala Io ahkan mahcat ihto, mangat ihto ara buah hukum homboh kolunon tuh.

³³Kobain tului orih rih, Konduang-konduang'ku, amat ihkam puhpung ahkan kuman Ukunpesta Tuhan, ihkam harus hokindoi giliroh.

³⁴Amat anai ijo bolo'u io harus kuman houn ang lohpouoh. Amat ihkam nohtoani hal tuh, puhpung-puhpung sombayang'kam eam ahkan polombut hukum tahkan Pohotala ngasan arop'kam bongom. Tohou masalah-masalah ijo bohkon, ahkan ahku monoranganoh amat ahku lombut noin.