Read Ot Danum 1 KORINTUS 12 Bible Online

1 KORINTUS 12 - Ot Danum bible

1 KORINTUS 12

¹Huntuh tohou pononga-pononga ijo tononga Roh Pohotala. Tohou orih, ahku jolik Konduang-konduang ngota'an ijo kotu'ui.

²Ingatlah ijo ang ohkot ihkam jaha kosono Tuhan, ihkam topongaruh ahkan umba nyembah dewa ijo bisu.

³Ihkam harus kota'an, ijo ulun, ijo toniting Roh Pohotala eam tou nuhtui, ‘‘Tonulutrih Yesus!’’ Kodorih ka'a eam ihcobehti ka duon nuhtui, ‘‘Yesus rih Tuhan!’’ Amat ulun rih eam toniting Roh Pohotala.

⁴ Anai bomahca-mahcam pononga tahkan Roh Pohotala, tahpi paringoh tononga kobain Roh 'ijo ihco.

⁵Anai bomahca-mahcam gawiou ahkan mohalu Tuhan, tahpi Tuhan ijo tonohalu rih Ihco ka'a!

⁶Anai bomahca-mahcam cara nguan gawin Tuhan, tahpi ijo nonga koba'as, ahkan orih ahkan nyinong ulun anai rih Pohotala ijo ihco ka'a.

⁷Ahkan kopios ihto paringoh, Roh Pohotala bogawi ang nyinong ulun umba cara bongo-bongoi.

⁸Ahkan ijo ihcobehti, Roh rih nonga kosanggup ahkan bopander hawoi pongaroh. Ahkan ijo bohkon Roh ijo sama rih nonga kosanggup ahkan monarang tohou Pohotala.

⁹Roh ijo ihco rih ka'a, nonga ahkan ulun ijo ihco, koduon ijo luar biasa ahkan porocaya umba Kristus; rahatoh ahkan ijo bohkon Roh rih nonga kowasa ahkan ngopios ulun.

¹⁰Ahkan ihcobehti tononga kowasa ahkan napa kahtahelan, tutang ahkan ihco bohkon tononga pononga ahkan mborihta rancana-rancana Pohotala. Ahkan ijo bohkon hino, Roh rih nonga kosanggup ahkan mombeda-beda, amoh pononga ijo tahkan Roh Pohotala, tutang umoh ijo bohkon. Anai ijo tononga kosanggup ahkan bopander umba mahca-mahcam basa ijo ajaib, tutang anai hino tononga kosanggup ahkan monarang riman auh-auh rih.

¹¹Paringoh rih, konuan bain kowasan Roh ijo ihco rih ka'a; nyino-nyinong ulun tononga pononga ijo kobongoi, numbun konohuang Roh rih bongoi.

¹² Kristus anai rih kolou behtin ulun; behti rih ihco, tahpi anai tahkan aro ramui. Paring ramui rih, oluka aro, monjadi ihco behtiu.

¹³Kodorih ka'a ihto paringoh, pios ulun Yahudi, oluka ulun bohkon Yahudi, jihpon-jihpon oluka ulun morodehka; ihto paringoh jari tomopondus bain Roh ijo sama orih, mangat ihto monjadi ihco ang behtin Kristus rih. Ihto paring ka'a komo Roh ijo ihco rih kotuwioh.

¹⁴Tului behti rih bongoi eam tonapa tahkan ihco ramui iou tahpi aro ramuioh.

¹⁵Amat pa'a nuhtui, ‘‘Ahku bohkon longo, tului orih ahku bohkon barih tahkan behti rih,’’ orih eam rimai ijo pa'a rih bohkon barih tahkan behti.

¹⁶Tutang amat tolinga nuhtui, ‘‘Tului ahku eam mahta, mahka ahku eam barih tahkan behti,’’ orih ka'a eam rimai ijo tolinga rih, eam barih tahkan behti.

¹⁷Jahkaoh paring behti rih monjadi mahta iou, koloukuwoh behti rih tou ngonih? Ata'ai amat sohopus behti rih tolingo iou, koloukuwoh behti rih dahpot nyingut?

¹⁸Ihto nohto ijo Pohotala, ijo ngina karon-ramui rih ang behti. Nyino-nyinong to-nginaoh ang unukoh bain Pohotala numbun konohuang-Oh.

¹⁹Amat paringoh tihkas ihco ramui iou umoh ijo konohawot behti?

²⁰Jadi puna anai aro ramui, tahpi behti tihkas ihco.

²¹Bain tului orih, mahta eam tou nuhtui umba longo, ‘‘Ahku eam porulu ihko!’’ ata'ai kuhung nuhtui umba pa'a, ‘‘Ahku eam porulu ihko!’’

²²Tobalikoh ramu-ramui behti, ijo tongohu ihto bolomu rih, tahpi orih ijo ihto poruluoh samasino.

²³Tutang ramu-ramui ijo ihto ngohuoh eam kodorih borega, malah anairih ramu-ramui ijo ihto nonga labih aro ponorega. Ramun-ramun behti ijo eam gihtan bohinoi, malah labih ihto nohtoanioh.

²⁴Ramun-ramun behti, ijo eam gihtan pios, eam porulu tonohtoani ihto. Pohotala jari nyusun behtin ihto kodorih kolouoh, nyiring ramu-ramui ijo kurang borega tononga labih aro ponorega.

²⁵Honong kolourih, behti rih eam topisah-pisah; nyino-nyinong ramui nohtoani ihco umba ijo bohkon.

²⁶Amat ihco ramu ngarot paring ramu ijo bohkonoh, ngarot ka'a, amat ihco ramu tonara, paring ramui ijo bohkonoh pahir ka'a jorih.

²⁷Konduang paringoh sama-sama anairih behtin Kristus tutang ihkam nyinong-behti hino anai rih ramui tahkan behti rih.

²⁸ Kodorih ka'a ang luwang ukup, Pohotala jari nahtap unuk ahkan mahca-mahcam ulun; Ijo pahtuk rasul-rasul, koduo nabi-nabi kotolu guru-guru, turus iro ijo nguan kahtahelan-kahtahelan, pongohuli iro ijo tononga pononga ahkan ngopios ulun, ata'ai ahkan ndohop ulun bohkon, ata'ai monjadi okonulun, ata'ai ka ahkan bopander umba mahca-mahcam basa ijo helan.

²⁹Iro eam paringoh rasul ata'ai nabi, ata'ai ka guru. Eam paringoh anai kowasa ahkan nguan kahtahelan,

³⁰ata'ai ahkan ngopios ulun, ata'ai ahkan bopander umba bomahca-mahcam basa ijo helan, ata'ai monyalin basa-basa rih.

³¹Tului orih konohuangoh ihkam ngurah jalan tu'u-tu'u ahkan dahpot pononga-pononga ijo paling pahtukoh. Tahpi pongotuh, ahku pokarah ahkan'mu jalan ijo pokopiosoh.