Read Ot Danum 1 KORINTUS 15 Bible Online

1 KORINTUS 15 - Ot Danum bible

1 KORINTUS 15

¹Tutang huntuh, Konduang-konduang ahku kani ihkam mingat huli ahkan Kabar Hinut tahkan Pohotala ijo ahku mborihta houn ahkan ihkam. Ihkam norimaoh tutang porocaya ahkan Kristus kotului Kabar Hinut rih.

²Amat ihkam nambit tehen, aang inon ijo ahku mborihtaoh rih, mahka Kabar Hinut rih monyolamat ihkam; kocoali amat Konduang porocaya earo horahtioh.

³ Inon ijo ahku mborihtaoh ahkan Konduang-konduang, anairih ijo jari ahku norima ka'a. Ijo boguna, kolou ijo tonyurat a'ang Surat Borasih, ahku nyiaroh ahkan'kam ijo Kristus mahtoi kotului dusa-dusan ihto,

⁴ ijo Io tonanom, tahpi pongohino tonombolum hoduli aang ondou ijo kotolu. Orih ka'a tonyurat a'ang Surat Borasih.

⁵ Ahku mborihta ahkan'kam, ijo Kristus jari tonombolum hoduli rih, ngorinah ka'a arop-Oh ahkan Petrus, tutang pongohino ahkan koduo balas rasul.

⁶Ulirih Io ngorinah arop hino, ahkan labih tahkan limo rahtus murid-Oh sinokotihka. Aroka tahkan ulun-ulun rih magun bolum nyiring huntuh, baya pira-pira behti ijo jari mahtoi.

⁷Uliorih Kristus ngorinah arop ka'a ahkan Yakobus tutang pongohino ahkan paring rasul.

⁸ Paling laiou samasino, Io ngorinah arop-Oh ahkak'ku ka'a — ahku ijo kolou longakelus, ijo eam suhkup ondouoh!

⁹ Ahku anairih rasul Tuhan ijo paling randah. Ahku eam pahtut konohawot rasul, tului ahku jari nyiksa ukup ain Pohotala.

¹⁰Tahpi tului asin Pohotala ahku monjadi kolou ahku ijo uhuntuh. Tutang eam porocuma Pohotala ngapun ahku. Justru ijo bogawi labih karas tahkan paring rasul ijo bohkonoh. Tahpi orih kotu'uioh, bohkon usaha aik'ku, orih usaha Pohotala ijo ngasi ahku, tutang ijo bogawi hombo-homboh ahku.

¹¹Jadi, tahkan iai ka ihkam norima Kabar Hinut rih — inon orih tahkan ahku ata'ai tahkan rasul-rasul ijo bohkon — ohrih eam monjadi soal. Ijo boguna iorih ihkai mborihta Kabar Hinut rih tutang Konduang porocaya.

¹²Amat ijo ihkai mborihtaoh rih, iorih Kristus jari tonombolum hoduli tahkan popahtoi, ombai anai tahkan louk'kam ijo nuhtui, ijo ulun mahtoi eam ahkan tonombolum hoduli?

¹³Amat morong ulun mahtoi eam ahkan tonombolum hoduli, orih rimai Kristus ka'a eam tonombolum hoduli tahkan popahtoi.

¹⁴Tutang amat jahkaoh, Kristus eam tonombolum hoduli tahkan popahtoi, mahka earo gunaioh ihkai mborihta ino-inon, tutang eam anai gunaioh hino ihkam porocaya, kotului koporocayan'kam rih eam ngina galang ino-inon.

¹⁵Labih tahkan orih, bokorinah ijo ihkai bobalik tohou Pohotala, tului ihkai mborihta ijo Pohotala ius mombolumoh hoduli Kristus tahkan popahtoi, podahal Pohotala eam mombolum Io hoduli — amat puna morong, ulun mahtoi eam tonombolum hoduli!

¹⁶Tului amat ulun mahtoi eam tonombolum hoduli, mahka Kristus ka, eam tonombolum hoduli tahkan popahtoi.

¹⁷Tutang amat Kristus eam tonombolum hoduli, mahka koporocayan'kam tihkas nuhpi bewe; orih rimai ihkam magun a'ang koada'an bodusa tutang eam ngina koharap samasino.

¹⁸Orih rimai hino ijo ulun-ulun Kristen ijo ius mahtoi, ka'a eam anaingina koharap.

¹⁹Amat koharap ihto umba Kristus, tihkas a'ang pombolum ihto ang luwang kolunon tuh iou, mahka tahkan sohopus umat kolunon ang ngosan tana tuh, ihto iou ijo paling bosial.

²⁰Tahpi korinahoh Kristus ius tonombolum hoduli tahkan popahtoi. Jituh monjamin ijo ulun-ulun ijo jari mahtoi ahkan tonombolum hoduli.

²¹Kobain popahtoi nyolong nokuh luwang kolunon, honong tonoholat ihcobehti, kodorih ka'a pombolum lombut hoduli tahkan popahtoi tononga ahkan ulun, honong tonoholat ihcobehti hino.

²²Koloukuwoh sohopus kolunon uras mahtoi, kotului hobarih hihco umba Adam, kodorih ka'a paring ahkan tonombolum tului hobarih hihco umba Kristus.

²³Tahpi nyino-nyinong ahkan tonombolum numbun giliraiu; ijo pahtukoh Kristus, pongohuli noin ang ohkot Io lombut hino, nutut gilir ulun-ulun ijo barih ain Kristus.

²⁴Uliorih nyolung kiamat. Aang ohkot rih Kristus ahkan ngominda karon pomoretah, karon kowasa, tutang karon koba'as; turus Io ahkan nyorah kowasa-Oh kolou Lahca, ahkan Pohotala, Amai ihto.

²⁵ Kristus harus turus momoretah, nyiring Pohotala nguan paring musuh Kristus, ngominda umba Kristus.

²⁶Musuh ijo pokolaiu ijo ahkan tongominda iorih popahtoi.

²⁷ Aang Surat Borasih tonyurat koloutuh, ‘‘Pohotala jari nguan kokaron, angihco ngominda ahkai-Oh.’’ Botarang ijo, 'jo konohuang umba, ‘‘kokaron aang'co,’’ rih eam taput Pohotala bongoi, ijo nguan paring angihco rih, ngominda ahkan Kristus.

²⁸Tahpi ulijari paringoh tongominda nokuh pinda pomoretah Kristus, mahka Io bongoi, iorih Anak Pohotala, ahkan mongominda arop-Oh ahkan Pohotala, ijo ius nguan karo-karonoh ngominda ahkai-Oh. Mahka Pohotala bongoi ka ahkan moretah paringoh.

²⁹Amat ulun mahtoi eam tonombolum hoduli, ombai anai ulun tonopondus ahkan ulun mahtoi? Ahkan inon iro nguan hal rih? Amat puna ulun mahtoi samasino eam ahkan tonombolum hino, ahkan inon iro nguan hal orih?

³⁰Tutang ahkan inon ka'a ihkai kani noharep dolang koporos nyinong wayah?

³¹Konduang-konduang! Nyinong ondou ahku tahan ngarot-koporos, kotului ahku namam ngosan pombolum'kam, tului ihkam jari porocaya umba Kristus Yesus, Tuhan ihto.

³² Amat orih baya tahkan hila kolunon iou, inon utungoh ahkak'ku umba kolahi, koloujahka molawan karon-ohcin bosiak ang lowu tuh, ang Epesus? Amat puna ulun mahtoi eam tonombolum hoduli. Nah, labih pios ihto numbun porobasa tuh: ‘‘Olai ihto kuman ngorih tutang jori-jirah, kobain hawon ihto tuh ahkan mahtoi.’’

³³Ara konaalik! Kopahkat ijo ja'at, morusak hadat ijo pios.

³⁴Borondongrih uhuntuh, tutang a'ai hino nguan dusa. Kopantasoh ihkam harus mia, ijo ang louk ihkam anai ijo jaha kosono Pohotala.

³⁵Mihkoh anai ijo ngisok, ‘‘Koloukuwoh ulun mahtoi tonombolum hoduli? Behti ijo koloukuwohrih ijo tononga ahkan iro, ulimba iro tonombolum hoduli?’’

³⁶Uong samasino! Amat Konduang ngombulan bonyi ang luwang tana, bonyi rih eam ahkan tumbu, amat bonyi rih jaha mahtoi houn.

³⁷Tutang bonyi ijo Konduang tanom ang luwang tana rih — mihkohoh bonyi gandum ata'ai bonyi bohkonoh — anairih luang bonyi rih iou, eam paring kombulanoh ijo ahkan tumbu noin.

³⁸Pohotala bongoi ijo ahkan nonga, ahkan bonyi rih napai, ijo numbun topahjah-Oh pios ahkan komulan rih. Ahkan nyinong mahcam bonyi, Pohotala nonga tapai komulan-Oh rih bongoi-bongoi.

³⁹Behtin angbolum-angbolum ijo botohasong eam paringoh sama. Kolunon tepun tapan behtiu, ohcin-ohcin tana tepun tapan behtiu ijo bohkon, bulung-bulung bohkon hino tapan behtiuoh, tutang ohcin-danum bohkon hino tapan behtiuoh.

⁴⁰Kodorih ka'a umba ramu-ramu ijo ang langit tutang ramu-ramu ijo ang tana. Ramu-ramu ijo ang langit nyino-nyinongoh anaitepun kopiosoh bongoi, tutang ramu-ramu ijo ang tana ka kodorih ka'a.

⁴¹Kopios mahtanondou, bohkon tahkan kopios bulan. Potion-potion ka anaitepun kopiosoh bongoi. Malah potion-potion rih nyino-nyinongoh hokobohkon ka'a kopiosoh.

⁴²Kolouorih haloh noin umba ulun-ulun mahtoi ijo tonombolum hoduli. Behti ijo tonanom rih, anai behti ijo tou maram, tahpi behti ijo tonombolum huli, anai behti ijo eam tou rusak.

⁴³Ang ohkot behti rih tonanom, behti rih maram tutang bolomu; tahpi ang ohkot io tonombolum hoduli, io anairih behti ijo pios tutang ba'as.

⁴⁴Ang ohkot tonanom, behti rih behti tahkan tana; tahpi uli bolum hoduli, mahka behti rih, behti ijo tononga bain Roh Pohotala. Anai behti ijo tahkan kolunon, anai ka'a behti ijo tahkan Pohotala.

⁴⁵ Aang Surat Borasih tonyurat koloutuh, ‘‘Ulun ijo pahtukoh iorih Adam, monjadi angbolum ijo bolum,’’ tahpi Adam ijo pokolaiu-Oh anai rih Roh ijo mononga pombolum.

⁴⁶Ijo lombut labih houn anairih jasmani, bohkon ijo rohani. Ijo rohani lombut pongohino.

⁴⁷Adam ijo pahtukoh tonapa tahkan tana, tahpi Adam ijo koduo asaroh tahkan soruga.

⁴⁸Ulun-ulun kolunon tuh uras kolou Adam ijo pahtukoh; ijo tonapa tahkan tana, tahpi ulun-ulun soruga uras kolou Io ijo lombut tahkan soruga.

⁴⁹Koloukuwoh ihto uhuntuh, anai kolou Adam ijo tonapa tahkan tana, mahka noin ihto ahkan monjadi kolou Io ijo tahkan soruga rih.

⁵⁰Konohuang'ku, Konduang-konduang, iorih; behti ijo tonapa tahkan daha tutang usi, eam dahpot nyolong Kolunon Bohua Ain Pohotala; tutang behti ijo dahpot mahtoi, eam dahpot monjadi abadi.

⁵¹ Nohtoanilah rahasia tuh: Eam paringoh ihto ahkan mahtoi, tahpi ihto paringoh ahkan boubah.

⁵²Hal rih ahkan nyolung solonga a'ang ihcokopicep mahto ang ohkot toropet tomohpos ahkan lain tikatoh. Tului ang ohkot rih konahan auh toropet rih, ulun-ulun mahtoi ahkan tonomonyun hoduli umba behtiu ijo abadi, tutang ihto paringoh ahkan tohubah.

⁵³Behtin ihto ijo dahpot mahtoi tuh, harus tonokiri umba behti ijo eam dahpot mahtoi, tutang behti ijo tahkan kolunon, harus tonokiri umba behti ijo tahkan Soruga.

⁵⁴ Amat behti ijo dahpot mahtoi tuh jari tonokiri umba behti ijo eam dahpot mahtoi, tutang behti ijo tahkan kolunon tuh, tonokiri umba ijo tahkan soruga, ang ohkot rih punai nyolung inon ijo tonyurat a'ang Surat Borasih, ‘‘Popahtoi ius tonolon; komanang jari sapai!’’

⁵⁵ ‘‘O Popahtoi ang umohkah komanang'mu? O popahtoi, ang umoh wisa'mu?’’

⁵⁶Wisa popahtoi iorih dusa, tutang dusa nguan gawiuoh nguha hukum agama.

⁵⁷Tahpi torimakasih ahkan Pohotala: Io nonga ahkan ihto komanang nguha Yesus Kristus Tuhan ihto!

⁵⁸Bain kotului rih, Konduang-konduang ijo tongasih, hondakrih ihkam ba'as tutang tehen. Bogawirih turus ahkan Tuhan honong tu'u-tu'u, bain ihkam ngota'an ijo paring ijo ihkam nguaioh ahkan Tuhan, eam ahkan ngohus!