Read Ot Danum 1 KORINTUS 4 Bible Online

1 KORINTUS 4 - Ot Danum bible

1 KORINTUS 4

¹Ngohurih ihkai pohalu-pohalu Kristus ijo botanggung-jawab mborihtaoh rancana-rancana Pohotala ijo jaha tongota'an kolunon.

²Ijo pahtu-pahtuk tonutut tahkan pohalu ijo kodorih, iorih ijo io bokehtep umba tuanoh.

³Bagi ahku, eam jadi soal kuwoh ijo ihkam — ata'ai iai ka — ka'a tirukoh tohou arop'ku. Malah inon ijo ahku bongok nirukoh, tohou arop'ku bongok ka, eam monjadi soal.

⁴Ahku eam komo bosala a'ang hal inon ka ka'a, tahpi orih eam bukti ijo ahku puna eam bosala. Tuhan bongoi ijo nuhkas ahku bosala ata'ai eam.

⁵Kobain orih, tului jaha ohkotoh, ara ihkam joi-join nuhkas, ijo ihcobehti bosala ata'ai eam. Ngindoi iou nyiring Tuhan lombut noin. Io iou ijo ahkan nguap paring rahasia-rahasia, ijo bosuhuk a'ang kopindong. Iorih ijo ahkan ngahkas paring niat ijo hotuyuk ang luwang ahtoi ulunkolunon. Ang ohkot rih punai nyinong behti norima tahkan Pohotala tara ijo pahtut tonorimaoh.

⁶Konduang-konduang! Ahkan gunan'kam, ahku jari kehpan paringoh rih ahkan Apolos tutang ahkan arop'ku bongok. Konohuangoh mangat tahkan sutu ihkai rih, ihkam dahpot bajar inon rimai auhtuh, ‘‘Nambitrih aang aturan ijo anai.’’ Honong kodorih eam ihcobehti ka tahkan ihkam dahpot tara-tara umba ihcobehti, turus mohina ijo bohkon.

⁷Iai ijo ngonjadi Konduang labih tahkan ulun bohkon? Eamlah dolang aang'co Konduang norimaoh tahkan Pohotala? Jadi ombai kani ngojuhu arop, kolo-kolou inon ijo anai aang Konduang rih, eam ang'co ijo tononga?

⁸Puna ihkam eam porulu ino-inon hino! Ihkam jari tahtou! Ihkam jari monjadi lahca! Tutang ihkai eam. Eaminon kopiosoh amat ihkam tu'u morong monjadi lahca, mangat ihkai duon moretah homboh ihkam.

⁹Kotului numbun tiruk'ku, ihkai karon-rasul, ius tonapa bain Pohotala, kolou tutunan ang boun ulun tutang bola molehkat. Ihkai kolou ulun-ulun hina ijo tonipa umba hukum mahtoi ang boun ulun aro tutang tonolahap kobain kolunon.

¹⁰Kotului Kristus, ihkai anairih ulun ijo uong, tutang ihkam ulun Kristen ihco ahpik! Ihkai bolomu, ihkam ba'as! Ihkai tonocela, tutang ihkam tonyanjung-nyanjung.

¹¹Johcok uhuntuh ihkai nginyam kolou, tutang tohjahbolai! Hahtin ihkai tisa ijo ang behtin ihkai iou; ulun nyiksa ihkai; ihkai eam dahpot unuk ijo nehtep;

¹² ihkai gawin paham ahkan ngurah napakah. Amat ihkai tonulut, ihkai malosumba borehkat, amat ihkai konoporos ihkai sabar.

¹³amat ulun ngonja'at-ja'at ihkai, ihkai malosoh umba auh-auh ihco manih. Ihkai eam labih tahkan luhtik-puhuk kolunon tuh; nyiring uhuntuh ihkai magun tonongohu kolou luhtik-puhuk tana.

¹⁴Ahku nyurat tuh ahkan'kam, eamrih ahkan nguan ihkam jadi ngomia, tahpi ahkan ningak ihkam kolou dolang anak aik'ku bongok.

¹⁵Kobain ahku ijo monjadi amai ihkam, oluka tousama kolou ulun Kristen, ihkam ius tepun sopulu ribu guru. Ang luwang pombolum'mu kolou ulun-ulun ijo ihco umba Kristus, ahku ijo monjadi amai ahkan'kam, kotului ahku ijo ngomin Kabar Hinut tohou Kristus ahkan'kam.

¹⁶ Kotului orih ahku nyawot honong paham mangat ihkam, nuhtut sutu ahku.

¹⁷Ahkan orihrih ahku jari nyuhu Timoteus masap ihkam. Monjadi murid Kristus, io sama kolou anak'ku bongok ijo ahku ngasioh. Io anak'ku ijo duon tomorocaya. Noin io ahkan mopingat ihkam, tohou cara bolum ijo ahku nihtoioh, ulijari porocaya umba Kristus, iorih cara bolum ijo ahku majaroh ang nyinong ukup, ang umoh ka'a.

¹⁸Pira-pira ulun ang louk'kam, jari monjadi bojuhu, kobain iro eam ngohu, ahku eam ahkan lombut nakuh'kam.

¹⁹Tahpi amat Tuhan mongijin, ahku ahkan lombut ka'a nokuh ihkam eam tahi hino. Noin ang ohkot orih rih, ahku ahkan nohto ka'a, inon ijo duon konuan kobain ulun-ulun ijo bojuhu orih; eam baya tuhtui iro iu.

²⁰Tului amat Pohotala moretah ang pombolum ihcobehti, hal orih tobukti ang koba'as pombolum ulun rih, eam bain tuhtui-tuhtuioh.

²¹Jadi, ngopili iou inon ijo ihkam labih jolikoh! Inon ihkam kani ahku lombut mangat majar ihkam hawui karas, ata'ai ahku lombut majar hawui kolomun auh tutang ngasi nyayang?