Read Ot Danum 1 KORINTUS 9 Bible Online

1 KORINTUS 9 - Ot Danum bible

1 KORINTUS 9

¹Eamkah ahku ulun morodehka? Eamleh ahku tuh rasul? Kuwoh ahku jaha pu'u nohto Yesus, Tuhan ihto? Kuwoh ihkam eam bua gawik'ku ahkan Tuhan?

²Amatka ulun-ulun bohkon eam kani ngahku ahku kolou rasul, paling honjiot ihkam ngahku orih! Tului pombolum'mu kolou ulun Kristen, anairih bukti ahku ihcobehti rasul.

³Amat ulun nosalan ahku, ahku ahkan mutah numbuntuh.

⁴Inon ahku eam bohak, norima ukun tutang korih tului angkonuak'ku?

⁵Kuwoh ahku eam bohak ngomin oruh'ku ijo Kristen homboh ahku aang ponomuoi'ku, kolou ijo konuan bain konduang-konduang Tuhan Yesus, tutang bain rasul-rasul bohkonoh, totame Petrus?

⁶Ata'ai tihkas Barnabas tutang ahku iou ijo pahtut ngurah ukus'ku bongok?

⁷Eam aro jolahan sorodadu ijo pahtut ngurah ukus aropoh bongoi, ang luwang posukan kolahi! Eam anai pongumo ijo ngombulan anggur ang pobulanoh, turus eam kuman bua anggur rih tahkan pombulan orih! Eam anai sokahtik ijo mohaga tobirioh, turus eam ngorih susu tahkan tobiri-tobirioh rih!

⁸Ahku nohouang orih eam baya hogalang ijo kopahtutoh a'ang kopu'u nyinong ondou, tahpi tului Surat Borasih nohouohrih hal rih ka'a.

⁹ Ang luwang buhku Museh tonyurat, ‘‘Sahpi ijo rahat ngihik paroi ahkan ngihik luang paroi tahkan pahting ara mangop bauioh.’’ Sahpirih ijo nohtoani Pohotala?

¹⁰Ata'ai orih konohuangoh ahkan ihto? Puna orih tonyurat ahkan ihto. Tului ulun ijo nguan umo tutang ulun ijo morasih paroioh, jari kopahtutoh nguangawiu honong harapoh ahkan norima 'cokabagi tahkan bua gawiu rih.

¹¹ Ihkai ius monyi bonyi Rohani ang luwang pombolum'kam. Mahka amat ihkai ngohtom borehkat-borehkat ramun kolunon tahkan ihkam, inon orih rimai ihkai nutut labih aro tahkan'kam?

¹²Amat ulun-ulun bohkon anai hak bokoharap tuh tahkan ihkam, eamkah ihkai labih bohak hino tahkan iro? Tahpi ahku jaha nguna hak orih. Tobalikoh, ahku labih jolik ngohtun kokaron angihco, tahkan mopolombut angihco hal ijo mongapeng monyiar Kabar Hinut tohou Kristus.

¹³ Konduang puna kota'an ijo ulun ijo bogawi ang luwang Lohpou Pohotala norima ukun iro, tahkan Lohpou Pohotala. Tutang ulun-ulun ijo hogoguan unuk nonga porahpah, duon bagi tahkan porahpah ijo tonosorah ang anan.

¹⁴ Kodorih ka'a Tuhan jari nuhkas, ijo ulun ijo mborihtaoh Kabar Hinut rih koharusoh duon upahoh tahkan tomorihtaoh rih.

¹⁵Tahpi jaha pu'u ahku hapa angihco ka tahkan hak-hak rih. Tutang ahku nyurat surat tuh, eam ka'a hawui konohuang mangat hal-hal rih, konuan uhuntuh toharep ahku. Labih pios ahku mahtoi tahkan nihou hal ijo ahku namamoh rih.

¹⁶Tului, amat orih baya soal mborihta Kabar Hinut tahkan Pohotala, mahka ahku eam anai hak monamam-namamoh, kobain Pohotala jari nyuhu ahku ahkan nguaioh. Colahka ahku, amat ahku eam mborihta Kabar Hinut rih.

¹⁷Jahkaoh ahku nguan gawik orih, ngosan konohuang'ku bongok, mahka ahku tou moharap ahkan dahpot upah. Tahpi ahku mborihta Kabar Hinut rih, puna tului koharusoh. Ahku sonuhu bain Pohotala ahkan nguan orih.

¹⁸Amat kodorih upah'ku inon? Jituh upah'ku; ijo ahku dahpot mborihta Kabar Hinut rih, tutang eam ngombahat ihcobehti ka ahkan bohatik'ku, tului ahku eam nyawot hak-hak'ku, kolou numbun borihta Kabar Hinut rih.

¹⁹Ahku tuh eam jihpon ia-iai ka; ahku morodehka. Oluka kodorih, ahku jari ngonjorian arop'ku tuh, jihpon ahkan paring ulun. Ahku nguan angrih mangat ahku duon ngonduon, sopira duon ulun ahkan Kristus.

²⁰Toharep ulun-ulun Yahudi, ahku nguanang kolou ulun Yahudi, mangat ahku tou, ngondahpot ulun Yahudi ahkan Kristus. Toharep ulun-ulun ijo bolum numbun hukum Museh, ahku nguanang koloujahka ahku konarut aang hukum rih, oluka ahku kotu'uioh eam konarut aangoh. Ahku duon nguan orihrih mangat ahku dahpot nguhut iro monjadi murid Yesus Kristus.

²¹Toharep ulun bohkon Yahudi, ahku nguanoh kolou ihcobehti bohkon Yahudi, ijo bolum ang luar hukum Museh. Ahku nguan orih rih, mangat ahku tou nguhut iro monjadi murid Kristus. Tahpi orih eam rimai, ijo ahku eam te'et umba poretah-poretah Pohotala; ahku mahi-mahi konowasa bain poretah-poretah Kristus.

²²Ang tohun ulun-ulun ijo koyakinoh eam ba'as, ahku ka nguanang kolou ihcobehti ijo koyakinoh eam ba'as, mangat ahku duon nguhut iro monjadi murid Kristus. Pendekoh, ahku ngonjorian pari-paringoh ahkan paring ulun mangat umba jalan ijo koloukuwoh ka, ka'a ahku duon monyolamat ihcokobagi tahkan iro.

²³Paring orih rih ahku nguai kotului Kabar Hinut tahkan Pohotala rih, mangat ahku ka'a taput tomorehkatoh.

²⁴Konduang puna ta'an, ijo ang a'ang hosolanja, koparing ulun umba nokoru, tahpi baya ihcobehti ulun norima hadiah. Bain tului orih, nokoru kodorih kolouoh, nyiring Konduang norima hodiahoh.

²⁵Nyinong ulun ijo rahat a'ang bolatih, nahan arop a'ang kokaron hal-hal. Io nguan hal orih tului io jolik tonyaling umba modali hadiah rih, iorih modali ijo bojoin rusaknihou. Tahpi ihto tuh nahan arop aang kokaron hal, kotului ihto jorik tonyaling umba modali ijo eam duon rusaknihou.

²⁶Orih koluluioh ahku nokoru nihtu tihtui ijo botitu. Kolou aangulun hotanding botinju, ahku eam moninju borangai.

²⁷Ahku nolua behtik'ku bolatih honong karas nyiring ahku dahpot mongowasaoh. Ahku nguan kolouorih rih, tului ahku eam kani nyiring nyolung, ijo jari ahku ngihit ulun bohkon umba a'ang solanja rih, ahku bongok tonulak.