Read Ot Danum GALATIA 2 Bible Online

GALATIA 2 - Ot Danum bible

GALATIA 2

¹ Opat balas toun pongohino, ahku hoduli nokuh Yerusalem homboh Barnabas hawui ngomin Titus ka'a.

²Ahku tulak nokuh Yerusalem, tului Pohotala jari ngorinah ahkak'ku ijo ahku pahtut tulak. Tutang aang ihco puhpung ijo khusus, umba okon-okon ang anan, ahku monarang ijo ahku mborihta Kabar Hinut, ahkan ulun-ulun bohkon Yahudi. Tului ahku eam kani usaha'ku ijo houn, oluka ijo uhuntuh, baya sia-sia.

³Titus ijo homboh umba ahku io anairih ihcobehti Yunani, tahpi io eam tonopaksa umba poroturan sunat.

⁴Oluka anai ulun-ulun ijo hojojuan hal rih. Iro anairih ulun-ulun ijo nosolat nokuh luwang barih ihto, tutang nyoruwa kolou konduang. Iro nyolong honong toni-tonih ahkan nyolidik komorodehka ijo anai aang ihto, kotului ihto hihco umba Kristus Yesus. Iro kani mombuli ihto, aang koada'an ijo pahtuk lomoi kolou jihpon,

⁵tahpi ihkai eam monyorah honjiot ka ahkan iro, kotului ihkai kani monjaga mangat Kabar Hinut rih tahtap borasih ahkan ihkam.

⁶ Olu kodorih, eam anai hal-hal bohua ijo tonyawot tahkan ahku bain ulun-ulun ijo tongohu bosewut — ahkak'ku earo kobohkoi amat iro bosewut ata'ai eam, kotului Pohotala eam nopahjah baui.

⁷Sobalikoh ulun-ulun ijo tongohu bosewut rih mongahku ijo Pohotala jari nyuhu ahku ahkan mborihta Kabar Hinut rih ahkan ulun bohkon Yahudi, sama kolou Io jari nyuhu Petrus, ahkan mborihta Kabar Hinut rih ahkan ulun Yahudi.

⁸Kotului Pohotala nonga ahkan Petrus koulih ahkan monjadi rasul ulun Yahudi, nongarih ka'a ahkak'ku koulih ahkan monjadi rasul ulun bohkon Yahudi.

⁹Yakobus, Petrus tutang Yohanes ijo gihtanoh ijo monjadi okon-okon ukup, mongahku ijo Pohotala jari nonga ahkak'ku tugas khusus tuh. Mahka iro hojuluk longo umba Barnabas tutang ahku, kolou tanda bosohabat. Turus iro tutang ihkai sotuju, ijo ihkai ahkan bogawi ang holat uhtus-uhtus ijo bohkon Yahudi, tutang iro ang tohun ulun Yahudi.

¹⁰Ihco-ihcooh ponyawot iro, iorih, mangat ihkai nohtoani ulun porosbolum. Tutang ahku puna sanang nguan hal orih.

¹¹Kotihka Petrus lombut nokuh Antiokhia, ahku nantang io hawui tara-tarang, kotului tindakoh sala.

¹²Aang pahtukoh io tuot kuman hombo-homboh konduang-konduang ijo bohkon ulun Yahudi. Tahpi uli ulun-ulun sonyuhu Yakobus lombut, io njayong aropoh tahkan konduang-konduang orih ijo bohkon ulun Yahudi, tutang eam kani hino kuman umba iro, tului mihkoh toharep ulun-ulun ijo kani, mangat paring ulun tonyunat.

¹³Konduang-konduang ulun Yahudi ijo bohkon ka'a, umba pura-pura kolou Petrus, nyiring Barnabas ka topongaroh ahkan sihkap kolou iro.

¹⁴Kodorih ahku nohto ijo iro eam bosihkap sorurui umba komorong Kabar Hinut rih, ahku nuhtui umba Petrus ang husuk paring ulun ijo tuot ang anai, ‘‘Amat Konduang kolou ulun Yahudi jari bolum kolou ulun bohkon Yahudi, ombai Konduang uhuntuh hojojuan ulun-ulun bohkon bolum kolou ulun Yahudi?’’

¹⁵Puna numbun ihkaikonanak, ihkai tuh anairih ulun Yahudi tutang eam, ‘‘Ulun bohkon Yahudi ijo bodusa.’’

¹⁶ Oluka kodorih ihkai ta'an, ijo ulun hokopios hoduli umba Pohotala, baya tului porocaya umba Yesus Kristus tutang eam tului molalus hadat agama. Ihkai bongon ka, porocaya umba Yesus Kristus, mangat ihkai hokopios umba Pohotala nguha koporocayan 'kai rih, eam kotului ihkai molalus hadat agama. Tului umba molalus hukum agama, eam ihcobehti ka duon hokopios hoduli umba Pohotala.

¹⁷Ihkai bousaha hokopios huli umba Pohotala nguha pombolum hihco umba Kristus. Tahpi amat ulirih nguan ijo kolouorih, korinah ihkai magun ‘‘ulun-ulun bodusa,’’ ka'a kolou ulun-ulun bohkon Yahudi; inonrih tuh rimaioh ijo Kristusrih ijo kotuluioh ihkai bodusa? Botantu iou eam!

¹⁸Amat ahku nopara nombok hoduli pola hukum agama ijo jari ahku ngahkasoh, mahka ahku ngorinahrih ijo ahku jari monjadi polanggar hukum.

¹⁹Tahpi ahku jari mahtoi toharep hukum agama — tomunu bain hukum rih bongoi — mangat ahku dahpot bolum bagi Pohotala. Ahku jari tomahpak umba Kristus.

²⁰Uhuntuh bohkon hino ahku ijo bolum, tahpi Kristus ijo bolum luwang behtik'ku. Pombolum tuh ijo ahku ngumangoh huntuh, anairih pombolum bain porocaya umba Anak Pohotala ijo ngasih ahku, tutang ijo jari nyorah arop-Oh, ahkak'ku.

²¹Ahku eam nawah pononganasi Pohotala. Amat kohihcon ulun umba Pohotala monjadi pios hoduli, kotului molalus hukum agama rih, rimai popahtoi Kristus eam anai gunaioh!