Read Ot Danum GALATIA 3 Bible Online

GALATIA 3 - Ot Danum bible

GALATIA 3

¹Konduang-konduang ulun-ulun Galatia! Ihkam kotu'ui uong! Inonrih ihkam jari kona pongaroh iai? Pompahtoi Kristus ang sopolahki jari ahku monarangoh hawui botarang-tu'uoh ahkan'kam.

²Cuba nyorihta ahkak'ku ihco hal tuh; Kuwohrih ihkam jari norima Roh Pohotala tului molalus hukum agama, ata'airih tului ihkam jari ngonih Kabar Hinut tahkan Pohotala, tutang porocaya umba Yesus Kristus?

³Ombai ihkam kolourih uong! Ihkam jari nopara bolum bohua umba Roh Pohotala, ombai uhuntuh ihkam kani dahpot kosoporunaoh, umba koba'as ihkam bongom?

⁴Ngahus iourih paring ijo ihkam ngomooh rih? Ombairih ngahus!

⁵Pohotala nonga Roh-Oh ahkan'kam, tutang nguan kohelan-kohelan ang louk ihkam. Inonrih Pohotala nguan orih kotului ihkam numbun hukum Agama, ata'ai kotului ihkam ngonih Kabar Hinut rih tutang porocaya umba Kristus?

⁶ Orih sama kolou ijo tonyurat ang Surat Borasih tohou Abraham — koloutuh, ‘‘Abraham porocaya umba Pohotala tutang kotului koporocayaoh rih io tonorima bain Pohotala kolou ulun ijo ngojorih ahtoi Pohotala.’’

⁷ Jadi, hondakrih ihkam borondong, ijo ulun ijo moro-morong lihit Abraham anairih ulun ijo porocaya umba Pohotala.

⁸ Surat Borasih jari nohto labih soun, ijo Pohotala mongonduon ulun-ulun bohkon Yahudi, hokopios hoduli umba Pohotala, amat iro porocaya umba Io. Kabar Hinut rih tonyorihta labih houn ahkan Abraham ang bowotoh tuh, ‘‘Nguha ihko, Pohotala ahkan mborehkat paring ukup kolunon, ang isun tana.’’

⁹Abraham porocaya mahka io tomborehkat. Kodorih ka'a paring ulun ijo porocaya ahkan tomborehkat hombo-homboh Abraham.

¹⁰ Ulun-ulun ijo mokuak aropoh umba hukum agama, paringoh bolum ang pinda tulut. Tului luwang Surat Borasih tonyurat, ‘‘Ulun ijo eam bokehtep, molalus paring ijo tonyurat ang Buhku Hukum Agama tonulut Pohotala!’’

¹¹ Eam ihcobehti ka ijo hokopios umba Pohotala bain kotului molalus hukum agama. Hal orih jari tongorinah ang Surat Borasih, ‘‘Baya ulun ijo porocaya umba Pohotala, nyiring kohihcooh umba Pohotala hokopios hoduli, ahkan bolum!’’

¹² Tahpi hukum agama eam tonogalang ngosan porocaya. Ang Surat Borasih tonyurat, ijo ulun ijo molalus hukum agama, ahkan bolum tului hukum rih.

¹³ Tahpi Kristus momorodehka ihto tahkan tulut hukum agama. Io nguan rih hawui mohonou arop-Oh tonulut tului ihto. Tului ang Surat Borasih tonyurat, ‘‘Tonulut ulun ijo mahtoi tonokuak ang kahju.’’

¹⁴Kristus nguan kodorih mangat borehkat ijo tobowot Pohotala ahkan Abraham tononga ka'a ahkan ulun-ulun bohkon Yahudi. Honong kodorih, ihto ka'a ijo porocaya umba Pohotala, dahpot norima Roh ijo tonobowot bain Pohotala rih.

¹⁵Konduang-konduang! Piosrih ahku hapa sutu tahkan ponyombang nyinong-ondou. Amat ulun nguan ihco ihkatan bowot, tutang bowot rih jari tonosah, mahka eam aro ihcobehti ka duon mbalangoh bowot rih ata'ai ndahang angihco ka ahkaioh.

¹⁶ Bowot-bowot Pohotala tonapa bain Pohotala bagi Abraham tutang bagi ulun lihit Abraham. A'ang Surat Borasih eam tonyurat, ‘‘Tutang bagi ulun-ulun lihit Abraham,’’ ijo rimai aro ulun. Ijo tonyurat ang anan anairih ‘‘tutang bagi ulun lihit'mu,’’ rimai ihcobehti iou, iorih Kristus.

¹⁷ Ijo kani ahku nyorihtaoh ang ohtoi, iorih tuh; bowot Pohotala jari konuan tutang tonosyah labih houn. Hukum Agama ijo tononga 430 toun pongohino, eam duon mombatal ponosahoh hawui ngudap bowot Pohotala rih.

¹⁸ Tului amat ponongan Pohotala bokuak umba hukum agama, mahka orih, bohkon hino pononga ijo tonobowot. Molekan tului Pohotala jari monobowotoh ahkan Abraham, mahka Pohotala nongaoh orih ahkaioh.

¹⁹Amat kodorih, ahkan inon hukum agama tononga? Puhtahoh iorih ijo hukum rih tondahangoh unuk ngorinah polanggaran ulun. Hukum Agama rih hapan, baya nyiring lombutoh ihcobehti lihit Abraham, ijo konohawot ang luwang bowot Pohotala ahkan Abraham. Hukum Agama rih tonuhtui bain molehkat-molehkat umba poholat ihcobehti kolunon.

²⁰Nah, harus anai duo pihak, punai porulu ihcobehti poholat. Tahpi Pohotala eam porulu poholat, tului Io bongoi ijo ngatuhoh.

²¹Kuwohrih orih, rimaioh ijo hukum agama bolawan umba bowot Pohotala? Punai iou eam! Tului amat hukum agama tononga, ahkan monyorah pombolum ahkan kolunon, mahka ulun duon hokopios umba Pohotala nguha hukum agama.

²²Tahpi ang luwang Surat Borasih tonyurat ijo paring ukup kolunon anai ang pinda kowasan dusa. Tului rih pononga ijo tonobowot hogalang koporocaya umba Yesus Kristus, tononga ahkan iro ijo porocaya.

²³Sounumba johcok ohkotoh ahkan porocaya umba Kristus, ihto tonojaga rapat bain hukum agama; ihto kolou topahkot nyiring ijo koporocaya rih korinah.

²⁴Honong kodorih hukum agama monjadi kolou pongawas ihto, johcok Kristus lombut, ahkan nguan ihto hokopios hoduli umba Pohotala, kotului ihto porocaya umba Yesus Kristus.

²⁵Huntuh, kotului jari ohkotoh kolunon dahpot porocaya umba Kristus, mahka ihto eam hino tonongawas bain hukum agama.

²⁶Tului ihkam porocaya umba Kristus Yesus, mahka ihkam hihco umba Io; tutang bain kotului orih ihkam monjadi anak-anak Pohotala.

²⁷Ihkam paringoh jari tonopondus ngosan aran Kristus, jadi ihkam jari norima aang arop'kam sipat-sipat Kristus bongoi.

²⁸A'ang hal tuh, eam hino anai kobohkon holat ulun Yahudi tutang ulun bohkon Yahudi, holat jihpon tutang ulun morodehka, holat ulunbahkas tutang ulunbawi. Konduang paringoh ihco tului Kristus Yesus.

²⁹ Amat ihkam ain Kristus, mahka ihkam anairih lihit Abraham. Tutang ihkam ahkan norima inon ijo tonobowot Pohotala.