Read Ot Danum GALATIA 4 Bible Online

GALATIA 4 - Ot Danum bible

GALATIA 4

¹Tahpi porulu ahku mongingatoh: Kotahin ihcobehti ahli warih magun pinda umur, anai ulun ijo nohtoani io, tutang hogoguan inon kogunan-kogunan aiu nyiring io johcok umur ijo tonahtap bain amaioh.

²Io tonohaga kolou ihcobehti jihpon, olu ka kotu'ui io tepuioh tahkan paring ponahtou rih.

³Kodorih ka'a umba ihto: Kotahin ihto magun jaha oko, ihto tonojihpon bain roh-roh ijo bokowasa ang kolunon tuh.

⁴Tahpi ang ohkotoh ijo kona, Pohotala nyuhu Anak-Oh nokuh kolunon. Anak-Oh rih tonganak bain ihcobehti bawi, tutang bolum ang pinda kowasan hukum agama.

⁵ Honong kodorih, Io momorodehka ulun-ulun ijo bolum ang pinda kowasan hukum agama; mangat ihto ka dahpot monjadi anak-anak Pohotala.

⁶Kotului ihkam anairih anak-anak Pohotala, Pohotala nyuhu Roh Anak-Oh nyolong nohkuh ahtoi Konduang tutang ahtoi'ku, iorih Roh ijo na'ah, ‘‘Amai, yoh Amai-Ku.’’

⁷Jadi ihkam eam hino jihpon molekan anak. Tutang kotului ihkam anak Pohotala, mahka Pohotala ahkan nonga ahkan'kam paring angihco, ijo tonyodia-Oh ahkan anak-anak-Oh.

⁸Lomoi ihkam eam kosono Pohotala, orih kotuluioh ihkam monjadi jihpon tahkan kowasa-kowasa ijo ihkam ngohu kolou pohotala, tahpi kotu'uioh bohkon Pohotala samasino.

⁹Tahpi uhuntuh ihkam ngosono Pohotala, ata'ai labih kona hino, Pohotala ngosono ihkam. Nah, ombai ihkam kani buli hino ahkan roh-roh kolunon tuh, ijo bolomu tutang porosbolum? Ombai ihkam kani nohojihpon hino bain roh-roh rih?

¹⁰Ihkam pesta ang ondou-ondou ijo botitu, bulan-bulan ijo botitu, tutang toun-toun ijo botitu.

¹¹Ahku kowatir, ara-ara koheka koujuh'ku, ahkan ihkam nyia-nyia iou.

¹²Konduang-konduang! Ahku nyawot honong paham mangat ihkam monjadi kolou ahku. Kotului ahku ka'a jari monjadi kolou ihkam. Ihkam eam nguan angihco ka, ijo sala toharep ahku.

¹³Ihkam puna magun ingat inon ijo kotuluioh ahku ang pahtukoh mborihta Kabar Hinut rih ahkan'kam. Kotuluioh, iorih, tului ahku buah koporos.

¹⁴Ang ohkot rih ihkam eam ngomo kojilok toharep ahku, oluka koada'an behtik'ku kolou tihkos ijo hajo bagi'kam. Ihkam malah norima ahku kolou norima molehkat Pohotala ata'ai kolou norima Kristus Yesus bongoi.

¹⁵Ihkam sanang sino aang ohkot rih. Tahpi uhuntuh ang umoh kosanang rih? Ahku kota'an ijo aang ohkot rih ihkam rela ngoruit mahtan'kam bongom, ahkan nongaoh ahkak'ku amat orih duon tononguan.

¹⁶Inonrih ihkam uhuntuh jari ngohu ahku kolou musuh, tului ahku ngorinah ijo tu'u ahkan'mu?

¹⁷Ulun-ulun ijo bohkon rih, umba tuwi somangat ngurah ihkam, tahpi maksud-maksud iro eam pios. Iro baya jolik mahtot kohihco umba ihkai, mangat ihkam nutut iro umba tuwi somangat.

¹⁸Puna pios ahkan bosomangat, a'ang hal-hal ijo pios, asar toturus kodorih tutang a'ai baya amat ahku, anai sama-sama umba ihkam.

¹⁹Anak-anak'ku ijo tonokasih! Ahku uhuntuh ngarot hino tului ihkam. Ahku ngarot, kolou ihcobehti inai ngarot ang ohkot nganak anakoh. Ahku ahkan hototurus ngarot, amat sipat-sipat Kristus jaha totanom ang arop'mu!

²⁰Ahku rindu sino, tohko ang tohu-tohun ihkam uhuntuh, mangat ahku dahpot bopander umba'kam, umba auh ijo bohkon, tului ahku jari eam ta'an, kani nguan inon hino umba ihkam!

²¹Konduang-konduang ijo kani bolum ang pinda kowasan hukum-hukum agama, cuba ngonih ahku! Ahku ahkan nyorihta ahkan'kam inon ijo kotu'uioh tonyurat a'ang Surat Hukum Museh.

²² Ang anan tonyurat, ijo Abraham tepun duo behti anak. Inai tahkan anak ijo ihco, anairih ihcobehti jihpon; tutang inai tahkan anak ijo bohkonoh rih, anairih ihcobehti ijo morodehka.

²³Anak tahkan bawi ijo monjadi jihpon, konanak biasa tului kohondak ulun. Tahpi anak ijo konanak tahkan bawi ijo morodehka, konanak kotului tonobowot Pohotala.

²⁴Tuh dahpot tohapa kolou tindung. Duo behti bawi rih tonindung umba duo bowot: ijo ihcooh boasar tahkan puruk Sinai — orihrih Hagar; anak-anakoh konanak kolou jihpon.

²⁵Jadi, Hagar orihrih puruk Sinai, ang lowun ulun Arab. Io nopengan umba kota Yerusalem, umba paring pondudukoh ijo uhuntuh ius monjadi jihpon.

²⁶Tahpi Yerusalem ijo ang soruga rih, anairih Yerusalem ijo morodehka, tutang, iorih inai ihto.

²⁷ Kotului ang luwang Surat Borasih tonyurat, ‘‘Jori-jorih ihko o bawi tomanang, ijo eam pu'u nganak! Bororami hawui bososurak-molahap O ihko ijo eam pu'u komo poros nganak! Bain bawi ijo tonohtah bosaioh ahkan dahpot labih aro anak, tahkanmba bawi ijo bolum umba bosaioh.’’

²⁸Konduang-konduang! Ihkam bongom anai rih anak-anak ain Pohotala ijo konanak tului bowot Pohotala; ihkam sama kolou Isaak.

²⁹ Ang ohkot rih anak ijo konanak numbun konohuang kolunon, ngoporos anak ijo konanak kotului konohuang Roh Pohotala. Kodorih ka'a uhuntuh.

³⁰ Tahpi inonrih ijo tonyurat luwang Surat Borasih? Ang anan tonyurat koloutuh: ‘‘Muhko jihpon bawi rih homboh anakoh, kobain anak tahkan jihpon bawi rih, eam ahkan monjadi ahli warih homboh anak tahkan bawi morodeka rih.’’

³¹Jadi, Konduang-konduang; ihto tuh bohkonoh anak-anak tahkan ihcobehti jihpon bawi; tahpi ihto anai anak-anak tahkan bawi morodehka rih.