Read Ot Danum GALATIA 6 Bible Online

GALATIA 6 - Ot Danum bible

GALATIA 6

¹Konduang-konduang! Amat ihcobehti sombang nguan ihco dusa, hondakoh ihkam ijo bolum numbun Roh Pohotala, niting ulun rih buli nitoi jalan ijo morong. Tahpi ihkam harus nguan orih umba bolomu lembaiahtoi, tutang bojaga a'ai nyiring ihkam bongom taputtonihkos ka'a.

²Hondakoh ihkam saling hokodohop ngohtun puat ulun bohkon ka'a mangat umba kolourih ihkam moneet poretah Kristus.

³Amat ihcobehti ngohu aropoh boguna, podahal eam, ulun rih ngobalik aropoh bongoi.

⁴Nyinong ulun harus moriksa bongoi inonrih hadatdasaroh rih pios ata'ai ja'at. Amat pios io tou komo tamam ngosan hal rih. Tahpi eam usah io monyamaoh umba inon ijo tonguan ulun bohkon.

⁵Kotului nyino-nyinong ulun harus ngohtun puat aiu bongoi.

⁶Ulun ijo norima ajar Kristus, hondakoh hobagi umba guruoh, paring ijo pios, ijo jari anai aang io.

⁷A'ai konobalik. Pohotala eam duon tongonjea! Inon ijo tongombulan orih ka ijo ahkan tongohtom.

⁸Amat ulun ngombulan numbun tobiat kolunoioh, io ahkan ngohtom popahtoi tahkan tobiatoh rih. Tahpi amat io ngumbulan numbun totiring Roh Pohotala, io ahkan ngohtom pombolum sojahti tutang kototahiu tahkan Roh Pohotala.

⁹Kotului rih, ara ihto monjadi peda nguan hal-hal ijo pios; bain amat ihto eam tondo nguan hal-hal rih, sino jaha ihto ahkan ngohtom buaoh.

¹⁰Jadi, kotahin anai kosapet bagi ihto, hondakrih ihto nguan ang pios ahkan paring ulun, mombahtang sino ahkan konduang-konduang ihto ijo hihco koporocaya.

¹¹Nontoani pio-pios bagian tuh, ijo ahku nyurat bongok umba hurup 'jo hajo-hajo.

¹²Ulun-ulun ijo kani nyuhung aropoh umba hal-hal carakonanak, iro ijo bousaha, jojuan ihkam numbun poroturan sunat. Tahpi iro nguan rih baya mangat iro eam tonoporos ulun Yahudi bain kotului sopolahkin Kristus.

¹³Ulun-ulun ijo nutut poroturan sunat ka eam molalus hukum agama. Tahpi iro kani ihkam tonyunat, mangat iro dahpot monamamoh, ijo ihkam te'et umba poroturan rih.

¹⁴Tahpi ahku samasino eam kani monamam inon ka, bohkonumba Tuhan ihto Yesus Kristus ijo jari mahtoi tomahpak. Kobain orihrih, kotului Io jari mahtoi tomahpak mahka kolunon eam hino bororima ino-inon bagi'ku. Tutang toharep kolunon tuh, ahku ka'a kolo-kolou ius mahtoi.

¹⁵Tonosunat ata'ai eam tonosunat, orih eam boguna. Ijo boguna io rih monjadi ulun bohua.

¹⁶Bagi ulun-ulun ijo bolum umba tiruk rih, tutang kodorih ka'a bagi paring ukup ain Pohotala, ahku harap Pohotala ahkan nonga kosanang tutang ponongaasi-Oh.

¹⁷Toturusoh, a'ai ihcobehti ka nyusah ahku hino, tului ang behtik'ku anai tanda-tanda ijo ahku murid Yesus.

¹⁸Keleh Tuhan ihto Yesus Kristus hototurus mborehkat Konduang-konduang. Amen. Horomat ihkai, Paulus