Read Ot Danum EPESUS 2 Bible Online

EPESUS 2 - Ot Danum bible

EPESUS 2

¹ Lomoi ihkam mahtoi socara rohani tului ihkam bodusa tutang noturung poretah-poretah Pohotala.

²Ang ohkot rih ihkam nutut tobiat-tobiat kolunon tuh; rimai ihkam te'et umba kowasa ang pinda langit, iorih roh ijo huntuh mongowasa ahtoi, ulun-ulun ijo eam te'et umba Pohotala.

³Lomoi ihto paringoh sama ka'a umba iro; ihto bolum numbun tobiat kolunon ihto, tutang nguan inon ijo monyanang behti tutang tiruk ihto. Ang ohkot rih ihto anairih ulun-ulun ijo kona kosangit Pohotala ka'a, sama kolou ulun-ulun bohkon.

⁴Tahpi eaminon kohajoi kolomun ahtoi Pohotala! Io kodorih ngasi ihto,

⁵nyiring ang ohkot ihto magun mahtoi socara rohani kotului koturung-koturung ihto, Io mombolum ihto hoduli hombo-homboh umba Kristus. Jadi tihkasrih kotului kopiosoh ahtoi Pohotala, ihkam tonyolamat kobaiu-Oh.

⁶Kotului ihto hihco umba Kristus Yesus, Pohotala ngomonyun ihto hoduli hombo-homboh Io, mangat ihto moretah ka'a hombo-homboh Io ang luwang soruga.

⁷Pohotala nguan orih, mangat aang jaman ijo ahkan lombut kolunon dahpot nopahjah eaminon kohajoioh asin Pohotala. Asiu rih tongorinah Pohotala, nguha kohinut ahtoi-Oh ahkan ihto, umba poholat Kristus Yesus.

⁸Pohotala mongasih ihkam, orih kotuluioh Io kani nyolamat ihkam, kotului ihkam porocaya umba Yesus. Kosolamat ihkam rih, eam tahkan bua usaha'kam bongom. Orih anairih ponongan Pohotala. Jadi, eam aro ihcobehti ka ijo dahpot mopojuhu aropoh tohou hal orih.

¹⁰Ihto anairih tona'oi Pohotala, tutang nguha Kristus Yesus, Pohotala napa ihto, mangat ihto nguan hal-hal ijo hinut ijo jari tonahtap baiu-Oh ahkan ihto.

¹¹Konduang-konduang ijo bohkon ulun Yahudi! Ingatrih pombolum'kam aang ohkot lomoi. Ihkam konohawot ‘‘ulun eam bosunat’’, bain ulun Yahudi ijo ngahku arop tonosunat (maksudoh ijo ius ngondahpot tanda ijo tonapa ulun ang behtin iro).

¹²Aang ohkot rih ihkam eam hihco umba Kristus; ihkam anairih ulun bohkonuhtus, ijo eam tosolong ukupjolahan konopili Pohotala. Ihkam eam nyolong a'ang pohtong bowot ijo tonapa Pohotala umba ukup-Oh. Ihkam bolum luwang kolunon tuh, eamanai harapan tutang eamanai Pohotala.

¹³Tahpi huntuh, kotului ihkam jari hihco umba Kristus Yesus, ihkam ijo lomoi mahcu, jari nokondoni bain popahtoi Kristus.

¹⁴Kotului Kristus bongoi anai pongobuah ihto. Io mompohihco ulun-ulun Yahudi tutang ulun-ulun bohkon Yahudi, monjadi ihco uhtus. Dinding pomisah, holat iro, iorih komusuh, jari tongolonyuh bain Kristus honong nyorah arop-Oh bongoi.

¹⁵ Hukum agama Yahudi hawui poretah-poretah tutang aturan-aturan-Oh jari tongudap bain Kristus, mangat duo uhtus rih monjadi ihco uhtus kolunon bohua, ijo hihco umba Io. Umba cara orihrih Kristus ngonjorian kobuah.

¹⁶ Kobain popahtoi-Oh ang sopolahki, Kristus mopohihco duo uhtus rih, tutang ngobuah iro umba Pohotala, nyiring dilaprih komusuh rih.

¹⁷ Orih kobainoh Kristus lombut ahkan mborihta Kabar Hinut tohou kobuah rih ahkan'kam; pios ahkan ihkam ulun bohkon Yahudi ijo lomoi mahcu umba Pohotala, oluka ahkan ulun Yahudi ijo doni umba Pohotala.

¹⁸Umba poholat Kristus ihto paring — pios ulun Yahudi, oluka ulun bohkon Yahudi — kobain Roh Pohotala ijo ihco, dahpot ngondoni Amai.

¹⁹Kobain orih, ihkam eam hino barih ulun bohkonuhtus ata'ai ulun luar. Ihkam huntuh anairih sama-sama uhtus ukup ain Pohotala. Ihkam anairih anak-anak jolahan Pohotala.

²⁰Ihkam ka tonombok ang ngosan galang, ijo tongina bain rasul-rasul tutang nabi-nabi, hawui Kristus Yesus kolou bahtu ijo mombahtang.

²¹Iorih ijo nyusun sohopus pangun orih monjadi Lohpou Pohotala ijo khusus ahkan Tuhan.

²²Tului bolum hihco umba Kristus, ihkam ka'a rahat topangun, homboh ulun-ulun bohkon monjadi ihco kobawak lohpou ahkan Pohotala; ang anan Pohotala mohcon umba Roh Aiu.