Read Ot Danum EPESUS 3 Bible Online

EPESUS 3 - Ot Danum bible

EPESUS 3

¹Orih kobainoh ahku, Paulus, tonyihpir kotului Kristus Yesus ahkan gunan ihkam ijo bohkon Yahudi.

²Botatu ihkam jari ngonih ijo Pohotala, tului kohinut ahtoi-Oh ius nonga ahkak'ku gawi tuh demi gunan'kam.

³Pohotala ngorinah rahasia rancana-Oh tutang mborihta orihrih ahkak'ku. (Tohou hal tuh jari ahku nyuratoh ang diang honong iwak,

⁴ tutang amat ihkam mombasaoh, ihkam ahkan ngumang rahasia tohou Kristus kolou ahku ngumangoh.)

⁵Lomoi rahasia orih eam pu'u tomborihta ahkan ulun, tahpi huntuh Roh Pohotala ius ngorinahohrih ahkan rasul-rasuloh tutang nabi-nabi-Oh.

⁶Rahasia rih, iorih tuh: Nguha Kabar Hinut rih, ulun bohkon Yahudi umba nginyam borehkat-borehkat Pohotala, ijo lomoi tonahtap tihkas ahkan ulun Yahudi. Ulun-ulun bohkon Yahudi jari monjadi ramu tahkan behti ijo sama, tutang umba norima inon ijo tonobowot Pohotala nguha Kristus Yesus.

⁷Pohotala nonga ahkak'ku pononga — iotuh gawi — ahkan mborihta Kabar Hinut rih. Ahku norima pononga rih nguha kowasan Pohotala ijo bogawi ang luwang arop'ku.

⁸Ang louk paring ukup Pohotala, ahkurih ijo paling hina. Tahpi Pohotala nonga ahkak'ku pononga tuh, gawi ahkan mborihta ahkan ulun-ulun bohkon Yahudi, Kabar Hinut tohou kotahtou Kristus ijo eam anai koopahoh;

⁹tutang ka'a mangat nguha ahku paring ulun taan, koloukuwoh Pohotala, Pona'oi aangpindalangit tuh, molalus rancana-Oh ijo tahkan hounlomoi tonosuhuk ahkan kolunon.

¹⁰Maksud Pohotala iorih, mangat huntuh, nguha ukup, paring ijo nambit kokuwasa'an ang pindalangit ngota'an kopihtaran Pohotala, a'ang dolang mahcam tapaioh.

¹¹Pohotala nguan rih tohorong umba rancana-Oh ijo kototahiu, ijo tononguai-Oh hawui nguha Kristus Yesus Tuhan ihto.

¹²Honong porocaya umba Kristus tutang kotului hihco umba Io, ihto tononga komorodehka ahkan ngondoni Pohotala honong tuwi koporocayaan.

¹³Kobain rih sawot'ku iorih; a'ai mihkoh tohou inon ijo ahku ngarot tului ihkam, bain paringoh rih anairih ahkan kopios'kam.

¹⁴Bain kotului orihrih ahku suhkuntu'ut ang toharep Amai.

¹⁵Tahkan Iorih nyinong jolahan ang soruga tutang ang tana norima sipat-Oh ijo khusus.

¹⁶Ahku bodo'a keleh Pohotala ijo tonohoromat jorih ahkan ngomba'as homboruan'mu umba Roh Aiu.

¹⁷Keleh kotului ihkam porocaya umba Kristus, Kristus mohcon ang luwang ahtoi'kam tutang pombolum'kam hogalang tutang konowasa kobain kasih.

¹⁸Ahku bodo'a keleh hombo-homboh umba paring ukup Pohotala, ihkam dahpot nosotoh, eaminon kolombahoh, tutang kombuioh hawoi isungoh, tutang kotimboioh sitan Kristus,

¹⁹ijo umba akal kolunon eam duon tongumang sotimbon-timbon-Oh. Keleh ihkam kosono sitan Kristus rih, nyiring ihkam tuwi umba pombolum Pohotala ijo soporuna.

²⁰Umba kowasan Pohotala ijo giat bogawi ang luwang arop ihto. Pohotala dahpot nguan mahcu labih aro, tahkan inon ijo dahpot ihto nyawot ata'ai nirukoh.

²¹Hondakoh Pohotala tonohoromat turun tomurun ang luwang ukup, nguha Kristus Yesus. Tararih ahkan Pohotala turus-jahamoh. Amen.