Read Ot Danum PILIPI 2 Bible Online

PILIPI 2 - Ot Danum bible

PILIPI 2

¹Ihkam ba'as, kotului ihkam hihco umba Kristus. Tutang ihkam tonoapung kotului Kristus ijo ngasi ihkam! Ihkam toniting Roh Pohotala, tutang ihkam ka'a saling hosita tutang saling hobalos kasih ihco umba ijo bohkon.

²Nah, cuba ihkam moro-morong nyanang ahtoi'ku umba hal-hal tuh: Bolum ihcoahtoi umba kasih ijo sama, umba tiruk ijo sama tutang titun ijo sama.

³Ara nguan aang'co, tului kojuan kogunan arop bongon, ata'ai ahkan mopojuhu arop. Sobalikoh hondakrih ihkam nyino-nyinong honong randah ahtoi tutang ngohu ulun bohkon labih pios tahkan arop bongon.

⁴Nohtoani kogunan ulun bohkon; ara tihkas kogunan ahkan arop bongon.

⁵Kohondakrih ihkam, bo-homboruan kolou Yesus Kristus.

⁶Aang dasaroh Io sama umba Pohotala, tahpi Io eam komo ijo koada'ai-Oh ijo kopohotalai rih harus tonohtahan-Oh.

⁷Sobalikoh, Io molohkak paringoh turus monjadi sama kolou ihcobehti jihpon. Io monjadi kolou kolunon, tutang gihtan bolum kolou kolunon.

⁸Io mogominda arop, tutang bolum honong te'et ahkan Pohotala nyiring mahtoi — yorih mahtoi nyopolahki.

⁹Tului orihrih Pohotala ngahtang Io soisung-isungoh, hawui nonga ahkai-Oh kowasa ijo labih hajo tahkan paring kowasa ijo bohkon.

¹⁰ Mahka bagi mohoromat Yesus, paring angbolum ijo ang soruga, tutang ijo ang tana, hawui ijo pinda tana, ahkan nyembah Io.

¹¹Iro paringoh ahkan mongahku ijo Yesus Kristusrih Tuhan; umba kodorih Pohotala, Amai tonohoromatoh.

¹²Tului orih, Konduang-konduang ijo tonokasih, kolouumoh ihkam toturus te'et umba ahku, aang ohkot ahku anai ang louk ihkam, mahka labi-labih huntuh ang ohkot hokomahcu, hondakrih ihkam tahtap te'et umba ahku. Ihkam ius tonyolamat bain Pohotala, jadi ngurahjalan turus mangat kosanang'kam monjadi soporuna. Nguan ang orih rih honong horomat tutang ponumbun ahkan Pohotala,

¹³kotului Pohotala bongoi, ijo bogawi ang luwang arop'kam, ahkan nguan ihkam rela tutang sanggup nyanang ahtoi Pohotala.

¹⁴Nguan iou rih kokaron aangihco hawui ara bokuhtu-kuhtuk ata'ai hojawab.

¹⁵ Honong kodorih ihkam ngorinah, ijo ihkam anairih anak-anak Pohotala ijo eam bosala, ijo bolum honong tulus tutang morong ang tohun-tohun ulun ja'at tutang bodosa. Tutang aang ohkot ihkam monyiaroh ahkan ihro borihta, ijo nonga pombolum, hondakrih ihkam monjadi singah iro kolou koloang monyingah, kolunon. Amat ihkam bolum kolourih, noin anai alasan bagi'ku, ahkan komo tamam tohou ihkam, ang ohkot Yesus Kristus lombut huli. Orih buktioh ijo kolahik'ku eam sia-sia, tutang gawik'ku anai buaoh.

¹⁷Mihkohtou ahku ahkan tomunu, tutang dahak'ku monjadi kolou porahpah tusuh ang ngosan inon ijo ihkam monyorahoh ahkan Pohotala, kolou tanda ijo ihkam porocaya umba Io. Amat puna orih harus kolourih, ahku norimakasih ngosan hal rih tutang umba jorih homboh ihkam.

¹⁸Kodorih ka'a hondakoh ihkam ka nginyam sanang tutang umba kojorih honong ahku.

¹⁹Ahku porocaya ijo umba pandohop Tuhan Yesus ahku jeleng dahpot nyuhu Timoteus nokuh ihkam, mangat ahku dahpot tohibur bain borihta tohou ihkam.

²⁰Tihkas Timoteus iou ihco-ihcooh ijo sojiwa umba ahku, tutang tu'u-tu'u niruk kosanang'kam.

²¹Paring ijo bohkonoh baya urusan aiu bongoi iou, eam kogunan Yesus Kristus.

²²Ihkam bongom ius nohto buktioh ijo Timoteus boguna. Io ius bogawi paham homboh ahku, ahkan mborihta Kabar Hinut tahkan Pohotala. Ihkai duo kolou anak umba amai iou.

²³Bain kotului rih, jeleng ulimba ahku ngota'an kolouamoh porokara ahku kolaiu noin, ahku ahkan nyuhu io nokuh ihkam.

²⁴Ahku porocaya ijo umba pondohop Tuhan, ahku bongok ka eam tahi hino ahkan masap ihkam ka'a.

²⁵Tohou konduang ihto Epafroditus ijo ihkam nyuhu mangat dohop ahku, ahku komo porulu ahkan nyuhu io hoduli ahkan ihkam. Io ius mambai ahku a'ang gawi tutang kolahik'ku.

²⁶Io rindu sino umba Konduang paringoh, tutang io, gelisah, kotului ihkam jari dahpot kabar ijo io mondam.

²⁷Puna tu'u io mondam nyiring kani palus. Tahpi Pohotala masi umba io; tutang eam tihkas ahkaioh iou tahpi ahkak'ku ka'a, mangat ahku ara monjadi labih sedih hino.

²⁸Orih kotuluioh, mahi hajo ka'a kojolik'ku ahkan nyuhu io buli nokuh'kam, mangat ihkam jorih hino amat ihkam hosombang umba io, tutang ahtoi'ku ka monjadi teneng.

²⁹Jadi, nyambutrih io umba paring kojorih ahtoi kolou ihcobehti konduang ijo ihco koporocaya. Moregaiou paring ulun ijo kolou io.

³⁰Ahkan gunan gawin Kristus, io korenga iou mahtoi; io nyarah hasongoh, ahkan nonga pondohop ahkak'ku, ngosan aran ihkam.