Read Ot Danum PILIPI 4 Bible Online

PILIPI 4 - Ot Danum bible

PILIPI 4

¹Tului orih, Konduang-konduang'ku ijo tonokasih, kolouorih hondakoh ihkam bolum hawui tu'u-tu'u porocaya umba Tuhan. Ahtoi'ku rindu umba'kam! Ihkam monamam ahku ijo nguan ahku jorih.

²Konduangbawi Euodia tutang Konduangbawi Sintike! Ahku nyawot hawui paham umba ihkam, ahkan Konduangbawi hihcoahtoi kolou ulun-ulun ijo bokoporocaya.

³Ahkan jolahak'ku ijo tehen, ahku nyawot ka'a mangat Konduang dohop koduo ulunbawi rih. Iro jari nguan gawiu paham umba ahku ahkan mborihta Kabar Hinut tahkan Pohotala, sama kolou Klemen tutang paring iro bohkon ijo bogawi hombo-homboh ahku. Aran-aran iro anai tonyurat luwang Buhku Ulun Bolum.

⁴Keleh ihkam toturus jorih, kotului ihkam jari bolum hihco umba Tuhan. Sino hino ahku nuhtui, ‘‘jorihih’’.

⁵Hondakrih paring ulun duon nohto sikap'kam ijo pios ahtoi. Tului eam tahi hino Tuhan ahkan lombut.

⁶Ara kowatir tohou inon ka'a. A'ang kokaro hal, bodo'a tutang nyapai sawot'kam ahkan Pohotala. Inon ijo ihkam kani, sumanorih toturus ahkan Pohotala hawui ngohawot torimakasih.

⁷Mahka kosanang tahkan Pohotala ijo eam haraptou dahpot tohorahti kolunon, ahkan monjaga ahtoi tutang tiruk'kam ijo jari hihco umba Kristus Yesus.

⁸Laiuoh, Konduang-konduang, nyuangrih tiruk'kam umba hal-hal borega, ijo pahtut tonara, yorih hal-hal ijo morong, ijo tonohoromat, ijo adil, borasih, manih, tutang pios.

⁹Nitoioh rih, inon ijo ihkam bolajaroh tutang torima tahkan ahku; pios tahkan tuhtui-tuhtui, oluka tahkan konuak-konuak'ku. Pohotala tohasak kosanang ahkan homboh ihkam.

¹⁰Aang pombolum'ku ijo hihco umba Tuhan, ahku nginyam sanang sino, tului ulijari kodorih kotahiou, huntuh ihkam sapet hino niruk koada'an'ku. Maksud'ku eamoh ijo ihkam jari nolingou ahku, tahpi eam anai kosapet ahkan mongorinahoh.

¹¹Ahku nyorihta tuh eam tului ahku tahpas, tului ahku jari bolajar nanyam puas umba inon ijo anai.

¹²Ahku jari nyuru pombolum serba tahpas, tutang ka'a bolum umba kolowi. Ahku jari ngosono rahasiaoh ahkan noharep, koada'an ijo koloukuwoh ka ka'a; pios koada'an makmur oluka koada'an porosbolum, pios koada'an molowi; oluka koada'an kotahpas.

¹³Umba kowasa ijo tononga Kristus ahkak'ku, ahku anai koba'as ahkan noharep kokaron kolou koada'an.

¹⁴Tahpi ihkam jari dohop ahku ang luwang kosusah'ku tutang inon ijo ihkam nguai rih puna pios.

¹⁵ Konduang-konduang ulun Pilipi! Ihkam bongom kota'an tu'u ijo kotihka ahku nohtah Makedonia lomoi, ang ohkot Kabar Hinut rih ahku nyiaroh aang pahtuk tikatoh, ihkam tihkas ihco-ihcooh ukup ijo dohop ahku; ihkam ihco-ihcooh ijo umba nginyam utung rugi hombo-homboh ahku.

¹⁶ Kotihka ahku ang Tesalonika tutang porulu pondohop, jari labih tahkan sino tikat, ihkam ngirim pondohop ahkak'ku.

¹⁷Orih eam rimai ahku baya jolik norima pononga. Ijo ahku jolikoh iorih, mangat ahku duon nohto bua-bua ijo mondahang koutung'kam.

¹⁸ Ahku jari norima paringoh — malah molowi tahkanmba sukup! Paring pononga ijo ihkam ngirim ahkak'ku, jari ahku torima tahkan Epafroditus. Huntuh ahku anai ngina paring ijo ahku poruluoh. Pononga-pononga tahkan ihkam rih, anairih kolou buanharum ijo tonyorah ahkan Pohotala tutang ijo tonorima bain Pohotala honong sanang ahtoi.

¹⁹Pohotala ijo ahku nyembah, ijo nusuh tahkan kotahtouoh a'ang Kristus Yesus, ahkan monuwi kokaro koporulu'kam.

²⁰Tonotara ahkan Pohotala Amai ihto turus-jaham. Amen.

²¹Nyapaiohrih tabe aik'ku ahkan sohopus ukup Pohotala ijo hihco umba Yesus Kristus. Tutang norima hino tabe tahkan konduang-konduang ijo anai homboh ahku ang ohtoi.

²²Paring ukup Pohotala ang lowu tuh, ijo pahtukoh iro ijo tahkan istana Kaisar, ngirim tabe ahkan ihkam.

²³Keleh Tuhan Yesus Kristus mborehkat Konduang paringoh. Horomat ihkai, Paulus tutang Timoteus