Read Ot Danum KOLOSE 3 Bible Online

KOLOSE 3 - Ot Danum bible

KOLOSE 3

¹ Ihkam jari tonombolumoh hoduli hombo-homboh umba Kristus. Bain orih harus ihkam bousaha ahkan ngondahpot hal-hal ijo ang soruga, ang amoh Kristus moretah hihco umba Pohotala.

²Potoharep tiruk'kam aang hal-hal ijo ang anan, ara aang hal-hal ijo ang kolunon.

³Kotului ihkam ius mahtoi, tutang pombolum ihkam bosuhuk hihco Kristus ang a'ang Pohotala.

⁴Nah, tohasak pombolum'kam ijo sojahti orihrih Kristus, tutang amat Io korinah noin, ihkam ka'a ahkan lombut hombo-homboh umba Io a'ang kohajoi-Oh!

⁵Kotului rih munuoh rih kojolik-kojolik kolunon ijo monderoh arop'kam, kolou kokihal, hal-hal ijo eam sanonoh, kojolikbolai, konohuang ijo ja'at, tutang kokuhu (tului kokuhu anairih kolou umba nyembah dewa).

⁶Hal-hal somahcam orihrih ijo mopolombut kosangit Pohotala toharep ulun-ulun ijo eam mone'etoh.

⁷Lomoi ihkam bongon ka, numbun kojolik-kojolik rih, ang ohkot ihkam konowasa baiuoh.

⁸Tahpi huntuh hondakrih ihkam dian hal-hal ijo ja'at tahkan arop'kam; a'ai hino bosingi, ata'ai ngamuk, ata'ai ngina nanyam bohiri toharep ulun bohkon. Ara samasino nyoluka tahkan nyaman'kam auh-auh cahci mahki, ata'ai auh ijo kojilok.

⁹ Ara mobula ihco umba ijo bohkon, kotului pombolum ijo lomoi umba kokaro sipat-Oh ius ihkam molohkakoh.

¹⁰ Ihkam huntuh jari tononga pombolum ijo bohua. Ihkam anairih kolunon bohua, ijo rahat tombohua toturus bain Pona'oioh, yorih Pohotala, numbun tapai-Oh bongoi. Maksudoh iorih mangat ihkam ngosono Pohotala honong soporuna.

¹¹Kolou akibat tahkanmba rih dilaprih kokaron kobohkon-kobohkon holat ulun Yahudi tutang bohkon Yahudi, ulun bosunat, tutang ulun ijo eam bosunat, eam anai hino kobohkonoh, holat ulun bohkonuhtus tutang ulun biadab holat jihpon tutang ulun morodehka, tului Kristus anairih koparing-paringoh tutang Io hihco umba iro paringoh!

¹² Konduang anairih ukup Pohotala. Pohotala ngasih ihkam tutang mitih ihkam ahkan monjadi aiu-Oh ijo khusus. Iorih, kotuluioh ihkam harus pokarah balos ngasi, ihkam harus pios ahtoi, randah ahtoi, bolomu lembai, tutang ba'as ngarot.

¹³ Ihkam harus sabar, ihco umba ijo bohkon, tutang saling ngapun amat anai ijo ngina dondam toharep ijo bohkon. Tuhan hawui sanang ahtoi ngapun ihkam, jadi ihkam ka harus kani ngapun ihco umba ijo bohkon.

¹⁴Tutang ijo boguna, iorih: Ihkam harus saling mongasih. Kotului kasih orihrih ijo pohihco Konduang-konduang paringoh nyiring monjadi soporuna.

¹⁵Hondakrih koputusan-koputusan'kam konahtuh bain kobuah ijo tononga bain Kristus, ang luwang ahtoi'kam. Tului Pohotala na'ah ihkam ahkan monjadi ramun ihco bereng mangat ihkam bolum a'ang kobuah tahkan Kristus orih. Hondakrih ihkam botorimakasih.

¹⁶ Hondakrih ajar-ajar Kristus ijo tuwi borehkat nyorap ahkan luwang ahtoi'kam. Hondakrih ihkam saling majar tutang saling nonga tingak sokopihtar soduondahpot. Monyanyioh rih masmur tutang tara-tara hawui lagu-lagu rohani; monyanyi iou ahkan Pohotala, honong nanyam norimakasih ang luwang ahtoi'kam.

¹⁷Kokaro inon ijo ihkam nguaioh ata'ai nuhtuioh, harus rih tonguan tutang tonuhtui ngosan aran Tuhan Yesus. Botorimakasih ahkan Pohotala, Amai, ahkan inon ijo tonguan Yesus bagi'kam.

¹⁸ Konduang-konduang ijo monjadi oruh! Te'etrih umba bosai'kam, tului kodorih rih koharusoh konuan'kam kolou ulun Kristen.

¹⁹ Konduang-konduang ijo monjadi bosai! Ngasi-nyayang oruh'mu. A'ai kasar toharep iro.

²⁰ Anak-inyam! Anairih koharus ihkam kolou ulun Kristen ahkan toturus te'et umba amai inai, tului orihrih ijo ngojorih ahtoi Pohotala.

²¹ Konduang-konduang ijo monjadi Amai! Ara ngoporos ahtoi anak-anak'kam nyiring iro monjadi putus asa.

²² Konduang-konduang ijo monjadi jihpon! A'ang kokaro hal pios ihkam te'et umba tepun'kam ijo ang kolunon tuh. Ara te'et ahkan iro baya ang ohkot iro rahat nontoani ihkam, tului ihkam jolik tonara. Ngote'etrih iro umba ahtoi ijo ihlas, kotului ihkam mohoromat Tuhan.

²³Gawi inon iou ijo tononga ahkan'kam, hondakrih ihkam nguaioh umba kotuwi ahtoi, koloujahka Tuhanrih ijo ihkam haluoh, tutang eam baya ulun.

²⁴Ingatrih ijo ihkam ahkan norima upah tahkan Tuhan. Inon ijo tonahtap Tuhan ahkan ukup Aiu, orihrih ijo ahkan tononga ahkan'kam. Kotului tepun, ijo kotu'uioh rahat tohalu bain ihkam, anairih Kristus bongoi.

²⁵ Tutang iai ka ijo nguan kosalan, ahkan ngohtun kosalan-kosalanoh rih; tului Tuhan eam nopahjah baui.